ތޫނު ވަޅިއެއް ބޭނުންކޮށްގެން މީހަކަށް ހަމަލާދީ، މާރާމާރީ ހިންގި މީހެއްގެ މައްޗަށް ކްރިމިނަލް ކޯޓުން ހަތް އަހަރުގެ ޖަލު ހުކުމެއް އިއްޔެ ކްރިމިނަލް ކޯޓުން އިއްވައިފިއެވެ.
މިއީ މިދިޔަ އަހަރުގެ އޮގަސްޓު މަހުގެ 16ވަނަ ދުވަހު ރ. ރަސްގެތީމު، އިރުދޭމާގޭ އަޙުމަދު ވިޝާމަށް މާލޭ މ. ގޯލްޑަންފީލް އަޙުމަދު ނަބީލް ވަޅިއަކުން ހަމަލާދީ ޒަޚަމުކޮށްލި މައްސަލައެވެ.
މި މައްސަލައިގައި ދައުލަތުން ހުށަހެޅި ދައުވާގައިވަނީ ގ. އަރުތަވިލާގޭގެ ކޮޓަރިއެއްގައި ވިޝާމް ފެންވަރަން ހުއްޓައި، ނަބީލް އެ ފާޚާނާއިން ވިޝާމް ގަދަކަމުން ނެރެ، އޭނާ އަތުގައި އޮތް ވަޅިއަކުން ވިޝާމްގެ ނިތްކުރިއާއި ވާތްފަރާތުގެ ކޮނޑާ ދިމާއިން ބުރައްކަށްޓަށް ހަމަލާދީ ޒަޚަމްކޮށްލާފައިވާ ކަމަށެވެ.
މި މައްސަލައިގައި ބޭއްވި އަޑުއެހުމުގައި ދައުވާއަށް އިންކާރުކޮށް ނަބީލް ބުނެފައިވަނީ ދައުވާގައި ބުނާ ތާރީޚާއި ވަގުތުގައި، ވިޝާމް ދިރިއުޅޭ ގެޔަށް އޭނާ ގޮސްފައި ވެސް ނުވާނެ ކަމަށެވެ. މި މައްސަަލައިގައި ނަބީލްގެ މައްޗަށް އުފުލާފައިވާ ދައުވާއިން ދިފާއުވުމަށް އޭނާގެ ފަރާތުން ހުށަހެޅި ކިތާބީ ހެއްކަކީ ދައުލަތުން ވެސް ހެކީގެ ގޮތުގައި ހުށަހެޅި ވީޑިއޯ އެންޑް އިމޭޖް އެނާލިސިސް ރިޕޯޓެވެ.
މި މައްސަލައިގައި ދައުލަތުގެ ފަރާތުން ނަބީލާ ދެކޮޅަށް ހުށަހެޅި ހެކިވެރިޔާގެ އެއްވެސް މައުލޫމާތެއް ދޫނުކުރުމަށް ނިންމައި، ހެކިވެރިޔާގެ ހެކިބަސް ނަގާފައިވަނީ އޭނާގެ އަޑު ބަދަލުކޮށްގެން ތަފާތު ދެ ހާޒިރީއެއްގައެވެ.
ނަމަވެސް، ވިޝާމަށް ތޫނު އެއްޗަކުން ހަމަލާދިން މަންޒަރު ފެނުނު ކަމަށް ދައުލަތުން ހުށަހެޅި އެއްވެސް ހެއްކެއް ބުނެފައިނުވާ ކަމަށް ކޯޓުން ބުނެފައިވެއެވެ. ދައުލަތުން ހުށަހެޅި ހެކިވެރިޔަކު ކިޔައިދިން ގޮތުގައި މި ހާދިސާ ހިނގައިދިޔަ ވަގުތު ނަބީލާއި އިތުރު ދެ މީހުން އައިސް، ވިޝާމާ މެދު މާރާމާރީ ހިންގާނެކަމުގެ އިންޒާރު ދީފައިވެއެވެ. އަދި، މި ހަމަލާ ދިނުމަށް ފަހު، ނަބީލް އެ ތަނުން ދިއުމުން، ވިޝާމަށް ހަމަލާދީފައި އޮތް މަންޒަރު ފެނުނު ކަމަށާއި، އޭނާއަށް ހަމަލާދިނީ ނަބީލް ކަމަށް ހެކިވެރިޔާ ގާތުގައި ވިޝާމް ބުނި ކަމަށް ހެކިވެރިޔާ ކިޔައިދީފައިވެއެވެ.
މި ހާދިސާގެ ކުޑަ އިރުކޮޅެއް ފަހުން ވިޝާމް އެ ގެއިން ނުކުތް ވަގުތު ފުލުހުންނާ ވެސް ދިމާވިއެވެ. އަދި، އެ ވަގުތު ވިޝާމްގެ ހަށިގަނޑުން ދެ ތަނަކުން ޒަޚަމްވެފައިވާ ކަމަށް އޭނާއާ ދިމާވި ފުލުހުންނާ ހަވާލާދީ ކޯޓުން ބުނެފައިވެއެވެ.
މި މައްސަލައިގައި ވިޝާމަށް ހަމަލާދީފައިވަނީ ތޫނު އެއްޗަކުންކަން، ޕްރޮވިޝަނަލް ޑައިގްނޯސިސްގައި ބައިގައި މެޑިކޯ ލީގަލް ރިޕޯޓު ތައްޔާރުކުރެއްވި ޑޮކްޓަރު ވިދާޅުވެފައިވާ ކަމަށް ކޯޓުން ބުނެފައިވެއެވެ. އެއާ އެކު ކޯޓުން ކަނޑައަޅާފައިވަނީ ވިޝާމަށް ތޫނު އެއްޗަކުން ހަމަލާދިނީ ނަބީލްކަން ޝައްކެއް ނެތް މިންވަރަށް ޝަރީއަތަށް ބަޔާންކޮށްދެވިފައިވާ ކަމަށެވެ.
މި ކުށަށް ގާނޫނުގައި ކަނޑައަޅާފައިވާ އަަދަބަކީ ހަތް އަހަރާއި 10 އަހަރާއި ދެމެދުގެ ޖަލު އަދަބެކެވެ.
ނަބީލްގެ ފަރާތުން ވީހާ ވެސް ލުއި އަދަބެއް ކަނޑައަޅައިދިނުމަށް ޝަރީއަތުގައި އެދުނުއިރު، އޭނާގެ މައްޗަށް އިއްޔެ ކްރިމިނަލް ކޯޓުން ހުކުމްކުރީ ހަތް އަހަރުގެ ޖަލު އަދަބެއް ތަންފީޒުކުރުމަށެވެ.