މި އަހަރު ރާއްޖޭގައި ވަރަށް ކާމިޔާބުކޮށް ބޭއްވި ޔޮޓް ރެލީ ދަތުރަށް ފަހު، އަންނަ އަހަރު ވެސް މާ ފުރިހަމަކޮށް ދަތުރު ބޭއްވުމަށް މޯލްޑިވްސް އިންޓަގްރޭޓަޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ)އިން އަންނަނީ ތައްޔާރު ވަމުންނެވެ.
ދެހާސް ބާވީސް ވަނަ އަހަރު މި ޔޮޓް ރެލީ ފެށީ ހަތް ޔޮޓުން ކަމަށްވާއިރު، މިއަހަރު ބޭއްވި ތިން ވަނަ އެޑިޝަންގައި 12 ޔޮޓެއް ބައިވެރިވެ، މި އިވެންޓްވަނީ އިތުރަށް ކާމިޔާބުވެފައެވެ. އަދި އަންނަ އަހަރުގެ ރެލީއަކީ ތަފާތު އަދި ކުރިޔަށްވުރެ ކާމިޔާބު ރެލީއަކަށް ހެދުމަށް މަސައްކަތްތައް ވަނީ ފަަށައިފައެވެ.
އެ ތައްޔާރީތަކުގެ ތެރެއިން، އަންނަ އަހަރު ޔޮޓްތައް ދަތުރު ކުރާނެ ރަށްތައް ކަނޑައެޅުމަށް އެމްއައިޓީޑީސީން އަންނަނީ މިހާރުން ފެށިގެން ކައުންސިލްތަކާ ބައްދަލުކޮށް މަޝްވަރާ ކުރަމުންނެވެ. އެ މަޝްވަރާތަކަށް ފަހު، ގޮތް ނިންމާނީ ދަތުރާ ގުޅޭ ސްޓިއަރިން ކޮމިޓީންނެވެ. އެ ކޮމިޓީގައި އެމްއައިޓީޑީސީގެ އިތުރުން އިމިގްރޭޝަނާއި ކަސްޓަމްސް އަދި މެރިން ޕޮލިސް އާއި ކޯސްޓްގާޑްގެ އޮފިޝަލުން ހިމެނެއެވެ.
އެ ކޯޕަރޭޝަންގެ އުއްމީދަކީ އަންނަ އަހަރުގެ މޯލްޑިވްސް ޔޮޓް ރެލީ ގިނަ ބަދަލުތަކަކާއެކު މިއަހަރަށް ވުރެ ވެސް ފުރިހަމަކޮށް ބޭއްވުމެވެ.