ފޯނެއް ވަގަށް ނެގި މީހަކު ތިން މަހަށް ޖަލަށްލާން ކްރިިނަލް ކޯޓުން ހުކުމް ކޮށްފިއެވެ.
މިއީ އަޙުމަދު ނިޝާން ނަމަކަށް ކިޔާ މީހަކު، މިދިޔަ އަހަރުގެ މެއިމަހުގެ ހަވަނަ ދުވަހު ހ. ބެނީނާގޭގައި ދިރިއުޅޭ ބަންގްލަދޭޝްގެ ރައްޔިތެއް ކަމަށްވާ ހާސިމްގެ ރެޑްމީ ބްރޭންޑުގެ މޮބައިލް ފޯނެއް ވަގަށް ނެގި މައްސަލައިގައި އޭނާގެ މައްޗަށް ކުރި ހުކުމެކެވެ.
މި މައްސަލައިގެ ދައުވާގައި ބުނެފައިވަނީ ހާސިމް ދިރިއުޅޭ ކޮޓަރީގެ ނިދާ އެނދުމަތީގައި އޮތް ބާލީހުގެ އުރަތެރޭގައި ބާއްވަފައި އޮތް ފޯނު ވަގަށް ނެގީ ނިޝާން ކަމަށެވެ.
މި މައްސަލައިގެ އަޑުއެހުމުގައ ދައުވާއަށް ފުރަތަމަ ނިޝާން އިންކާރުކުރިއެވެ. އެހެން ނަމަވެސް މައްސަލައިގައި ނިޝާންގެ މައްޗަށްކޮށްފައިވާ ދައުވާ ސާބިތު ކުރުމަށް ހެކި ހުށަހެޅުމާ އެކު އޭނާ ވަނީ ދައުވާއަށް އިޢުތިރާފުވެފައެވެ. އަދި އޭނާ ދައުވާއަށް އިއުތިރާފުވީ އެއްވެސް މަޖުބޫރުކަމެއް ނެތި، ފުރިހަމަ އިޚްތިޔާރުގައި ކަމަށް ބުނެފައިވެއެވެ.
އެ އާއެކު، ޝައްކެއް ނެތް މިންވަރަށް ނިޝާންގެ މައްޗަށް ކޮށްފައިވާ ވައްކަމުގެ ދައުވާ ސާބިތުވާ ކަމަށް ކަނޑައަޅައި، ކޯޓުން އޭނާގެ މައްޗަށް އިއްވާފައިވަނީ ތިންމަހާއި ތިން ދުވަހުގެ ޖަލު ހުކުމެކެވެ. އެއީ އޭނާ ބަންދުގައި ހޭދަކުރި 15 ދުވަހުގެ މުއްދަތު ޖަލު އަބަދުން އުނި ކުރުމަށް ފަހުގައެވެ.
މި އަހަރުގެ މިހާތަނަށް ފުލުހުން އާންމުކޮށްފައިވާ ތަފާސްހިސާބުތަކަށް ބަލާއިރު ވެސް އެންމެ ގިނައިން އެ ޚިދުމަތަށް ރިޕޯޓުކޮށްފައިވަނީ ވައްކަމުގެ މައްސަލަތެކެވެ. އެ ގޮތުން އަހަރުގެ މިހާތަނަށް ވައްކަމުގެ 2،248 ވައްކަމުގެ މައްސަލައެއް ރިޕޯޓުކޮށްފައިވެއެވެ. އަދި ފޭރުމުގެ 312 މައްސަލަ ރިޕޯޓުކޮށްފައިވެއެވެ.