އަހަރުގެ އެންމެ ފަހު ގްރޭން ސްލޭމް މުބާރާތް ކަމަށްވާ ޔޫއެސް އޯޕަން ޓެނިސް މުބާރާތުގައި ސްޕެއިންގެ ތަޖުރިބާކާރު ކުޅުންތެރިޔާ ރަފައެލް ނަޑާލް ނުކުޅޭކަން ހާމަކޮށްފިއެވެ.
އޭނާ މިކަން ހާމަކޮށްފައިވަނީ އެކްސްގައި އޭނާގެ ސަޕޯޓަރުންނާއި މުހާތަބުކޮށް އާންމު ކުރި މެސެޖެއްގައެވެ. އެ މެސެޖުގައި ބުނީ ޔޫއެސް އޯޕަންގައި ބައިވެރިނުވާން ނިންމީ އޭނާ ބޭނުންވާ ފެންވަރުގައި ކުޅެވިދާނެކަމަށް ގަބޫލް ނުކުރާތީ ކަމަށެވެ. އަދި އެމެރިކާގައި ތިބި އޭނާގެ ސަޕޯޓަރުން މިފަހަރު ހަނދާން ވާނެކަމަށާއި ނަމަވެސް އެހެން ފަހަރަކުން އަނެއްކާވެސް ދިމާވާނެކަމުގައި ހާމަކޮށްފައިވެއެވެ.
ނަޑާލްގެ މެސެޖުގައި އޭނާ ދެން ފެންނާނީ މިއަންނަ މަހު ޖަރުމަނުވިލާތުގެ ވެރިރަށް ބާލިންގައި ބޭއްވުމަށް ހަމަޖެހިފައިވާ ލެވާ ކަޕުންކަމުގައިވެސް ބުނެފައިވެއެވެ.
އަނިޔާގެ ގިނަ މައްސަލަތަކަކާ ފަހަކަށް އައިސް ކުރިމަތިލާން ޖެހިފައިވާ ނަޑާލްއަށް 2023 ވަނަ އަހަރުގެ ބޮޑުބައި އަނިޔާގެ ސަބަބުން ގެއްލުނުއިރު މިއަހަރުގެ މުޅިން ކުޅުމުގެ ތެރެއަށް އައިސް އަދިވަނީ ހަމަޖެހިލެވޭގޮތް ނުވެފައެވެ. އަދި މިހާރު ކުރިއަށްދާ އޮލިމްޕިކް ކުޅިވަރު މުބާރާތުގެ ފިރިހެން ސިންގަލްސް އާއި ޑަބަލްސްގައި އޭނާ ވާދަކުރި ނަމަވެސް ނަޑާލްގެ އެންމެ މަގްބޫލް ކޯޓުގައި އެންމެ މޮޅު ކުޅުން ދެއްކޭ ގޮތެއްނުވިއެވެ. މިގޮތުން ސިންގަލްސްގައި ދުވަސްވީ ވާދަވެރިޔާ ސާބިއާގެ ނޯވަކް ޖޯކޮވިޗް އަތުން ދެވަނަ ބުރުން ބަލިވިއިރު ޑަބަލްސްގަައި ވަނީ ތިންވަނަ ބުރުން ބަލިވެފައެވެ.
މިމުބާރާތުގައި ނަޑާލް ކުޅުނު ނަމަވެސް އޭނާގެ ކުރީގެ ކުޅުމަށް އެނބުރި ދިއުމަށް އަދި ވަގުތު ނަގާނެކަން ފެނިގެންދިޔައެވެ. އަދި މިހާރު 38 އަހަރު ވެފައިވުމުން އެފުރުސަތު ނަޑާލް އޮތް ކަމާމެދުވެސް ގިނަ ބަޔަކު އަންނަނީ ސުވާލު އުފައްދަމުންނެވެ. އަދި މިއީ އޭނާ ޓުއާގައި ބައިވެރިވާނެ ފަހު އަހަރު ކަމަށް ކުރިން ހީކުރެވިފައިވީ ނަމަވެސް ނަޑާލްގެ ފަރާތުން އެކަމަށް ސީދާ ވަކިއެއްޗެއް ބުނެފައިނުވާތީ ގިނަ ފަރާތްތަށް މިހާރުތިބީ ސުވާލު މާކެއްގައެވެ.