އީރާނުން އެއް ދުވަހާ 29 މީހުންނަށް މަރުގެ އަދަބު ދީފިއެވެ.
އޭގެ ތެރެއިން 26 މީހުންނަށް މަރުގެ އަދަބު ދިނީ ގްރޫޕެއް ގޮތަށް އެއް ޖަލެއްގައި ބައިތިއްބައިގެންނެވެ.
އީރާނުން އެ މީހުން ދަންޖައްސައިފައި ވަނީ 2022 ވަނަ އަހަރުގެ މުޒާހަރާތަކާ ގުޅުންހުރި މީހަކަށް މަރުގެ އަދަބު ދިން މައްސަލައިގައި ބައިނަލްއަގުވާމީ ފާޑުކިޔުން އެ ގައުމަށް އަމާޒުވެފައިވާ ދަނޑިވަޅެއްގައެވެ.
ނޯވޭގައި ހުންނަ އީރާން ހިއުމަން ރައިޓްސްއިން ބުނީ, ވެރިރަށް ތެހެރާނުގެ ބޭރުގައި އޮންނަ ކަރާޖުގެ ގެޒެލް ހެސާ ޖަލުގައި 26 މީހަކަށް މަރުގެ އަދަބު ދީފައިވާއިރު، އިތުރު ތިން މީހަކު މަރާލާފައިވަނީ ކަރާޖުގެ ސިޓީ ޖަލުގައި ކަމަށެވެ.
މަރުގެ އަދަބު ދިން މީހުންގެ ތެރެއިން އަފްޣާނިސްތާނުގެ ދެ ރައްޔިތުންގެ މައްޗަށް ވަނީ މީހަކު މަރާލިކަމުގެ ދައުވާއާއި މަސްތުވާތަކެއްޗާ ގުޅުން ހުރި އަދި ރޭޕްގެ ދައުވާ ސާބިތުވެފައެވެ.
ޗައިނާ ފިޔަވައި އެންމެ ގިނަ މީހުންނަށް މަރުގެ އަދަބު ދިން އީރާނުން އަންނަނީ މުޖުތަމައުގައި ބިރުވެރިކަން އުފެއްދުމަށް މަރުގެ އަދަބު ބޭނުންކުރަމުން ކަމަށް އިންސާނީ ހައްގުތަކާ ބެހޭ ޖަމާއަތްތަކުން ތަކުރާރުކޮށް ތުހުމަތުކުރެއެވެ.
އަދި, 2022 ވަނަ އަހަރުގެ މުޒާހަރާތަކާ ގުޅިގެން އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ މެންބަރަކު މަރާލިކަމުގެ ކުށް ސާބިތުވި މީހަކު އީރާނުން މަރާލި މައްސަލަ ވެސް އިންސާނީ ހައްގުތަކާ ބެހޭ ޖަމާއަތްތަކުން ވަނީ ކުށްވެރިކޮށްފައެވެ.
އުމުރުން 30 އަހަރުގެ ޣުލަމްރެޒާ ރަސާއީއަކީ ފުލުހުންގެ ހައްޔަރުގައި ހުއްޓައި މަރުވި އީރާނުގެ މަހްސާ އަމީނީ މަރާލީ ފުލުހުން ކަމަށް ބުނެ 2022 ވަނަ އަހަރު ކުރި މުޒާހަރާތަކާ ގުޅިގެން މަރުގެ އަދަބު ދިން 10 ވަނަ މީހާއެވެ.
ކުރުދީ ދަރިކޮޅުގެ މަހްސާ އަމީނީ މަރުވީ، ސަރުކާރުގެ މިންގަނޑާ ޚިލާފަށް ބުރުގާ އަޅައިގެން އުޅެނިކޮށް، ސެޕްޓެމްބަރު 13، 2022 ގައި އީރާންގެ އަޚުލާގީ ފުލުހުންގެ ބެލުމުގެ ދަށަށް އޭނާ ގެންގޮސް އޭނާއަށް ކުރި އަނިޔާތަކުގެ ސަބަބުންނެވެ. މަހްސާ އަމީނީ މަރުވީ ފުލުހުން ކުރި އަނިޔާތަކުގެ ސަބަބުން އޭނާ ހޭނެތުމާ ގުޅިގެން ހޮސްޕިޓަލަށް ގެންގޮސް ފަރުވާ ދެމުން އަންނަނިކޮށެވެ.
އީރާން ހިއުމަން ރައިޓްސްއިން ބުނި ގޮތުގައި މި އަހަރުގެ މިހާތަނަށް އީރާނުން ގާތްގަޑަކަށް 345 މީހުންނަށް މަރުގެ އަދަބު ދީފިއެވެ.