ރަށްރަށުގެ މަގުބައްތި ރައްކާތެރިކަމުގެ މިންގަނޑަށް ފައްތަން ކައުންސިލްތަކަށް ދިން މުއްދަތު ހަ މަހަށް އިތުރުކޮށްފި ކަމަށް، ލޯކަލް ގަވަމެންޓް މިނިސްޓާރު އާދަމް ޝަރީފް އުމަރު މިއަދު ވިދާޅުވެއްޖެއެވެ.
މާލޭ ސިޓީ ކައުންސިލަށް އަލަށް އިންތިޚާބުވި ތިން ކައުންސިލަރުންގެ ހުވާ ކުރުމުގެ ރަސްމިއްޔާތުގައި އާދަމް ޝަރީފް ވިދާޅުވީ، މިދިޔަ މަހުގެ ތެރޭގައި ކައުންސިލްތަކަށް ދިމާވި އެންމެ ބޮޑު ގޮންޖެހުމަކީ 30 ދުވަހުގެ ތެރޭގައި މަގުބައްތިތައް ރަނގަޅު ނުކޮށްފި ނަމަ ކަރަންޓު ކަނޑާލާނެ ކަމުގެ އިންޒާރު ލިބުން ކަމަށެވެ.
ފެނަކައިން ބައެއް ރަށްރަށުގެ މަގުބައްތިއަށް ކަރަންޓު ދޫކުރުން ހުއްޓާލާނެ ކަމަށް ބުނީ، ރ. އުނގޫފާރުގައި މަގުބައްތިއަކުން ކުޑަކުދިންތަކެއް ކަރަންޓުގައި ޖެހުނު ހާދިސާގައި ޒުވާނަކު ނިޔާވުމާ ގުޅިގެން އެ ކޯޕަރޭޝަނުން ރަށްރަށުގެ މަގުބައްތީގެ ހާލަތު ބެލުމަށް ފަހުގައެވެ.
އެ މަސައްކަތް ނިންމަން މިދިޔަ މެއި މަހު ފެނަކައިން ދިން މުއްދަތު ދެ ފަހަރެއްގެ މަތިން އިތުރުކޮށްފައިވާއިރު އެންމެ ފަހުން ދީފައި އޮތް މުހުލަތަކީ މިމަހުގެ 21 ވަނަ ދުވަހާ ހަމައަށެވެ.
މީގެ ކުރިން އާދަމް ޝަރީފް ވަނީ އެ މަސައްކަތް ކުރުމަށް 85 މިލިއަން ރުފިޔާ ޚަރަދު ވާނެ ކަމަށް ބެލެވޭއިރު، މުއްދަތު ވެސް އިތުރު ކުރުމާ ގުޅޭ ގޮތުން މަޝްވަރާކުރައްވާނެ ކަމަށް ވިދާޅުވިއެވެ. އެގޮތުން ފެނަކައާއި ޔުޓިލިޓީ ރެގިއުލޭޓަރީ އޮތޯރިޓީ އާއި ސަރުކާރުގެ އެހެން މުއައްސަސާތަކައެކު ބޭއްވި މަޝްވަރާތަކަށް ފަހު މިހާރު އެ މުއްދަތު ހަ މަހަށް އިތުރުކޮށްފައިވާ ކަމަށް އޭނާ ވިދާޅުވިއެވެ.
"އިރާދަކުރެއްވިއްޔާ ފެނަކައާއި ރެގިއުލޭޓަރީ އޮތޯރިޓީއާއި އަދި ފިނޭންސް މިނިސްޓްރީއާއެކުގައި މަސައްކަތްކޮށްގެން އަޅުގަނޑުމެން މަސައްކަތް ކުރަމުން މިދަނީ ތިން މަސް ނުވަތަ ހަ މަސް ދުވަހުގެ ތެރޭގައި ޕްލޭނެއް އެކުލަވާލެވި އެ ޕްލޭންގެ ދަށުން ރަށްރަށުގެ މަގުބައްތިތަކުން ކަރަންޓު ކަނޑާލުމުގެ މައްސަލައަށް ހައްލެއް ހޯދައި ދިނުމުގެ މަސައްކަތް ކުރުން،" އޭނާ ވިދާޅުވިއެވެ.
އާދަމް ޝަރީފް ވިދާޅުވީ، ކައުންސިލްތަކަށް ދިމާވާ މިފަދަ ކޮންމެ މައްސަލައެއްގައި، ޚާއްސަކޮށް ރައްޔިތުންނަށް ތަކުލީފުތައް ދިމާވާ މައްސަލަތަކުގައި ސަރުކާރުން ފުރިހަމައަށް ޒިންމާ އަދާކުރާނެ ކަމަށެވެ.
މިދިޔަ މަހުގެ 20ގައި ބޭއްވީ މާލެ ސިޓީ ކައުންސިލްގެ ބައި އިލެކްޝަންގައި މައްޗަންގޮޅި މެދު ދާއިރާއާއި، ހެންވޭރު ހުޅަނގު ދާއިރާ އާއި ހުޅުމާލެ ދާއިރާއަށް ކައުންސިލަރުން ހޮވުމަށް ބޭއްވި އިންތިޚާބުގައި ވާދަކުރެއްވީ ވެރިކަން ކުރާ ޕީއެންސީއާއި އިދިކޮޅު އެމްޑީޕީގެ ކެންޑިޑޭޓުންނެވެ. އެ ތިން ގޮނޑި ވެސް ކާމިޔާބު ކުރީ ޕީއެންސީންނެވެ. އެއީ:
- މައްޗަންގޮޅި މެދު ދާއިރާ ކައުންސިލަރު: ފާތިމަތު އިޝާން
- ހުޅުމާލެ ދާއިރާ ކައުންސިލަރު: އަލީ އައިމަން
- ހެންވޭރު ހުޅަނގު ދާއިރާ ކައުންސިލަރު: ފާތިމަތު ޝައުފާ ސަލީމް
އެ ތިން ކައުންސިލަރުން މިއަދު މަގާމުގެ ހުވާކުރެއްވިއިރު، އެ ގޮނޑިތައް ހުސްވީ ނިމިދިޔަ ރައްޔިތުންގެ މަޖިލީހުގެ އިންތިޚާބުގައި އެ ކައުންސިލްގެ ތިން މެންބަރަކު މަޖިލީހަށް އިންތިޚާބުވުމާ ގުޅިގެންނެވެ.