ބޭންކް އޮފް މޯލްޑިވްސް (ބީއެމްއެލް) އެޕާއި އިންޓަނެޓް ބޭންކިން ބޭނުންނުކުރެވި، ގިނައިރުތަކެއް ވެއްޖެއެވެ.
ބީއެމްއެލްއިން މިއަދު ހެނދުނު 7:51ގައި އެކްސްގައި ކޮށްފައިވާ ޕޯސްޓެއްގައި ވަނީ ޓެކްނިކަލް މައްސަލައެއްގެ ސަބަބުން އެޕާއި އިންޓަނެޓް ބޭންކިން ބުރޫ އަރައިފައިވާ ކަމަށެވެ.
އެ މައްސަލަ ވީހާވެސް އަވަހަށް ހައްލު ކުރުމަށް މަސައްކަތް ކުރަމުން އަންނަ ކަމަށާއި އެ ވަގުތުތަކުގައި ދިމާވެދާނެ ދަތިތަކަށް މައާފަށް އެދޭ ކަމަށް ބޭންކުން ބުނެފައިއެވެ.
ބީއެމްއެލްއިން އެ ޕޯސްޓު ކުރުމުގެ ކުރިން ވެސް ބައެއް މީހުން ވަނީ ސޯޝަލް މީޑިއާގައި ކަންބޮޑުވުން ފާޅުކުރަން ފަށައިފައެވެ. އަދި ކުޑަކުދިން ސްކޫލަށް ދާ ވަގުތާއި މީހުން އޮފީހަށް ދާ ވަގުތުތަކުގައި އެފަދަ މައްސަލަތައް ދިމާވުމުން އުނދަަގޫތައް އިތުރުވެފައިވާކަން އެ މީހުން ފާހަގަކޮށްފައިވެއެވެ.
ބީއެމްއެލްގެ އޮންލައިން ޚިދުމަތްތަކަށް މިދިޔަ ބުރާސްފަތި ދުވަހު ވެސް ބުރޫއެރިއެވެ.
އެ ފަހަރު ބޭންކުން ބުނީ އެ މައްސަލަ ދިމާވީ ޕޭމަންޓް ޕްރޮސެސް ކުރުމުގައި 'ހިއުމަން އެރާ'އެއްގެ ސަބަބުން އޮޅިގެން އެކައުންޓުތަކަކަށް ފައިސާ ޖަމާކުރެވުނު ކަމަށެވެ. ނަމަވެސް އެ އެކައުންޓްތައް ދެނެގަނެ، އެ މައްސަލަ ހައްލުކޮށް، ފައިސާ ހޯދައިފައިވާ ކަމަށް ބީއެމްއެލްއިން އޭރު ބުނެފައިވެއެވެ.