ޣައްޒާގެ ވެރިކަންކުރާ ހަމާސް ޖަމާއަތުގެ ސިޔާސީ ގޮފީގެ ވެރިޔާ، އިސްމާއީލު ހަނިއްޔާ އީރާނުގެ ތެހެރާނުގައި ހުންނަވަނިކޮށް އަވަހާރަކޮށްލުމާ ގުޅިގެން ސިޔާސީ ގޮފީގެ އިސް ލީޑަރަކަށް ޔަހުޔާ ސިންވާރު އައްޔަންކޮށްފައިވާ ކަމަށް ހަމާސްއިން ބުނެފިއެވެ.
އިސްރާއީލުން ދެކޭ ގޮތުގައި 61 އަހަރުގެ ސިންވާރަކީ އޮކްޓޫބަރު ހަތް ވަނަ ދުވަހު ހަމާސްއިން އިސްރާއީލަށް ދިން ހަމަލާގެ މޭސްތިރިއެވެ.
ސިންވާރު މަގާމަށް އައްޔަންކުރުމަކީ އެމެރިކާއަށާއި އިސްރާއީލަށް ދިން ވަރުގަދަ އިންޒާރެއް ކަމަށާއި، އެއީ ކަންތައްތައް ނިންމުމުގައި ހަމާސްގެ އެއްބައިވަންތަކަން ދައްކުވައިދޭ ކަމެއް ކަމަށް ލުބުނާނުގެ ހަތިޔާރު އެޅި ޖަމާއަތް، ހިޒްބުﷲއިން ބުނެއެވެ.
ސިންވާރަކީ ޚާން ޔޫނިސްގެ ދެކުނުގައި އޮންނަ ޣައްޒާގެ ރެފިއުޖީ ކޭމްޕަކަށް އުފަން މީހެކެވެ. އޭނާ އަކީ އިސްރާއީލާ ގުޅިގެން އުޅޭ ކަމަށް ޝައްކު ކުރެވޭ ފަލަސްތީނު މީހުން ނައްތާލުމުގެ މަސައްކަތް ހަވާލުކޮށްފައިވާ އަލްމަޖްދު ސެކިއުރިޓީ އެޕެރެޓަސްގެ ކުރީގެ ވެރިޔާއެވެ. އޭނާ ޣައްޒާގައި ހަމާސްގެ ލީޑަރަކަށް ވެވަޑައިގަތީ 2017 ވަނަ އަހަރެވެ.
ސިންވާރަކީ އޮކްޓޯބަރު މަހުގެ ހަތް ވަނަ ދުވަހު އިސްރާއީލަށް ދިން ހަމަލާގައި، ހަނގުރާމައިގެ ޖަރީމާތަކެއް ހިންގާފައިވާ ކަމަށް ތުހުމަތުކޮށް އިންޓަނޭޝަނަލް ކްރިމިނަލް ކޯޓު އޮފް ޖަސްޓިސް (އައިސީޖޭ)ގެ ޕްރޮސިއުޓަރަކު ހައްޔަރު ކުރުމުގެ އަމުރެއް ހޯދުމަށް އެދުނު ހަމާސްގެ ބައެއް ލީޑަރުންގެ ތެރެއިން އެކަކުވެސްމެއެވެ.
ހަނިއްޔާ ޝަހީދުކޮށްލުމަކީ މުޅި މެދުއިރުމައްޗަށް ލިބުނު ކުއްލި ޝޮކެކެވެ. ގިނަ ބަޔަކު ދެކޭ ގޮތުގައި އިސްރާއީލުން ހަނިއްޔާ ޝަހީދުކޮށްލީ ޣައްޒާގައި އިސްރާއީލުން ކުރިއަށްގެންދާ ގަތުލުއާންމު ހުއްޓައިލުމުގެ މަޝްވަރާތަކަށް ހުރަސް އެޅުމަށެވެ. ހަނިއްޔާ އަކީ އެ މަޝްވަރާތަކުރުމުގައި މުހިންމު ދައުރެއް އަދާކުރެއްވި ބޭފުޅެކެވެ.
އިސްރާއީލުން ޣައްޒާގައި ހިންގަމުންދާ ލާއިންސާނީ އުދުވާނުގައި މިހާތަނަށް 39،653 މީހުން ވަނީ ޝަހީދުކޮށްލައިފައެވެ. އޭގެތެރޭގައި ގިނައީ ކުޑަކުދިންނާއި އަންހެނުން ކަމަށްވާއިރު، ޣައްޒާގެ 2.3 މިލިއަން މީހުންގެ އާބާދީގެ ތެރެއިން، ގާތްގަނޑަކަށް އެންމެން ވަނީ މަގުމަތިވެފައެވެ.
އެ ހަމަލާތަކުގެ ސަބަބުން ޣައްޒާއަށް ވަނީ މީގެ ކުރިން ނުފެންނަވަރުގެ އިންސާނީ ދަތިކަމެއް ކުރިމަތިވެ، ބަނޑުހައިނޫކަމާއި ސިއްހީ މައްސަލަތަކާ ކުރިމަތިލާންޖެހިފައެވެ.