އީރާނުގެ ތާއީދު އޮންނަ ލުބުނާނުގެ ހަތިޔާރު އެޅި ޖަމާއަތް، ހިޒްބުﷲ އިން އިސްރާއީލުގެ އުތުރަށް ޑްރޯން އާއި ރޮކެޓް ހަމަލާތަކެއް ދީފއެވެ.
ނަމަވެސް އެއީ އަދި މި މަހުގެ އެއް ވަނަ ދުވަހު އިސްރާއީލުން ޝަހީދުކޮށްލި އެ ޖަމާއަތުގެ އިސް ކޮމާންޑަރު ފުއާދު ޝުކްރު ޝަހީދުކޮށްލުމުން ހިފި ބަދަލު ހިފުމެއް ނޫން ކަމަށާއި، އެ ބަދަލު ހިފުން ކުރިއަށް އެބައޮތް ކަމަށް ހިޒްބުﷲ އިން ވަނީ ބުނެފައެވެ.
ހިޒްބުالله އިން ބުނީ އިސްރާއީލުގެ އުތުރުގެ އަކަރު ކައިރީގައި އޮންނަ އަސްކަރީ ދެ ސަރަހައްދަކަށް ޑްރޯންތަކެއް ހަމަލާތަކެއް ފޮނުވައިލާފައިވާއިރު، އެހެން ސަރަހައްދެއްގައި އޮތް އިސްރާއީލުގެ އަސްކަރީ އުޅަނދަކަށް ވެސް ހަމަލާދީފައިވާ ކަމަށެވެ.
އެކަމާ ގުޅިގެން އިސްރާއީލުގެ އަސްކަރިއްޔާއިން ބުނީ ލުބުނާނުން ހުރަސްކުރަމުން ދިޔަ ގިނަ އަދަދެއްގެ ޑްރޯންތައް ދެނެގަނެ، އެއް ޑްރޯން ވައްޓައިލައިފައިވާ ކަމަށެވެ. އެގޮތުން އެ ގައުމުގެ އައްސޭރިފަށުގެ ސިޓީ ނަހަރިޔާގެ ދެކުނުން އާންމުންގެ އެތައް ބަޔަކަށް އަނިޔާވެފައިވާ ކަމަށް އިސްރާއީލުން ބުނެއެވެ.
އިސްރާއީލުގެ އަސްކަރިއްޔާއިން ނެރުނު ބަޔާނެއްގައި ބުނީ އެ މީހުންގެ ވައިގެ ސިފައިން ވަނީ ލުބުނާނުގެ ދެކުނުގައި ހިޒްބުﷲގެ ދެ ފެސިލިޓީއަކަށް ހަމަލާދީފައެވެ.
އަންގާރަ ދުވަހު ލުބުނާނުގެ ބޯޑަރުގެ އުތުރުން ގާތްގަނޑަކަށް 30 ކިލޯމީޓަރު ދުރުގައި އޮންނަ މައިފަޑޫން ޓައުންގެ ގެއަކަށް ދިން ހަމަލާގައި ހަތަރު މީހަކު މަރުވެފައިވާ ކަމަށް ސަލާމަތީ މަސްދަރަކުން މީގެކުރިން ވަނީ ބުނެފައެވެ. އަދި އެ ހަތަރު މީހުންނަކީ ހިޒްބުﷲ ގެ ހަނގުރާވެރިން ކަމުގައިވެސް މަސްދަރުތަކުން ބުނެފައިވެއެވެ.
މިދިޔަ ހަފްތާ ޝަހީދުކޮށްލި ފުއާދު ޝުކްރުގެ މަރުގެ ބަދަލު ހިފާނެ ކަމަށް ހިޒްބުﷲ ގެ ލީޑަރު ހަސަން ނަސްރުﷲ ވަނީ ވިދާޅުވެފައެވެ.
ފުއާދު ޝުކްރު ޝަހީދުކޮށްލުމުގެ ބަދަލު ހިފާނެކަމަށް ހިޒްބުﷲ އިން ވައުދުވުމާއި، ފަލަސްތީނުގެ މިނިވަން ކަމަށް މަސައްކަތްކުރާ ހަމާސް ޖަމާއަތުގެ ސިޔާސީ ގޮފީގެ ވެރިޔާ އިސްމާއީލު ހަނިއްޔާ އީރާނުގައި ހުންނަވަނިކޮށް މިދިޔަ ހަފްތާ މަރާލި މައްސަލައިގެ ބަދަލު ހިފާނެ ކަމަށް އީރާނުން ވެސް ބުނެފައިވުމަކީ މެދުއިރުމަތީގައި ބޮޑު ހަނގުރާމައެއް ފެށިދާނެ ކަމުގެ ކަންބޮޑުވުން އެބައޮތް ކަމަށް މަޝްރަހު ދިރާސާކުރާ ފަރާތްތަކުން ބުނެއެވެ.
އޮކްޓޫބަރު ހަތް ވަނަ ދުވަހު އިސްރާއީލުން ފަލަސްތީނުގެ ޣައްޒާގައި ހަނގުރާމަ ފެށިފަހުން އިސްރާއީލާއި ހިޒްބުﷲ އިން އަންނަނީ ކޮންމެ ދުވަހަކު ކަހަލަ ގޮތަކަށް ހަމަލާތައް ބަދަލުކުރަމުންނެވެ.