ދިވެހި ފުލުހުން ބާރުގެ ބޭނުން ހެޔޮ ގޮތުގައި ބޭނުން ނުކުރާ ކަމަށާއި، އެހެންވެ، ފުލުހުންނަށް އިތުރު ބާރުތައް ލިބިދޭ ގޮތަށް ރައްޔިތުންގެ މަޖިލީހަށް ހުށަހަޅައިފައިވާ ސައިބާ ކްރައިމްގެ ބިލަކީ ވަރަށް ނުރައްކާތެރި ބިލެއް ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރޭ ވިދާޅުވެއްޖެއެވެ.
ޔާމީންގެ ޕީޕަލްސް ނެޝަނަލް ފްރަަންޓް (ޕީއެންއެފް)އިން ބޭއްވި ޖަލްސާއެއްގައި އެ މަނިކުފާނު ވިދާޅުވީ ފުލުހުން ބާރުގެ ބޭނުން ނަހަމަ ގޮތުގައި ބޭނުން ކުރުމުން އެ މައްސަލަ ބަލައި، ކުރެވޭނެ ކަމެއް ނޯންނަ ކަމަށެވެ. އެފަދަ މައްސަލަތައް ނެޝަނަލް އިންޓެގްރިޓީ ކޮމިޝަން ފަދަ ތަނަކަށް ހުށަހެޅުމުން ވެސް ކުރިއަށްނުދާ ކަމަށް އެ މަނިކުފާނު ވިދާޅުވިއެވެ.
ޔާމީން ވިދާޅުވީ މިހާރު ހުށަހަޅައިފައިވާ ބިލުން ފުލުހުން ބޭނުންވާ ކޮންމެ ބަޔެއްގެ ޑިވައިސްތައް މޮނިޓާ ކުރުމުގެ ފުރުސަތު ލިބޭ ކަމަށާއި އެއީ އަމިއްލަ މައުލޫމާތު ރައްކާތެރިކުރުމުގެ ހައްގަށް އަރައިގަތުން ކަމަށެވެ.
"މިހާރު ވެސް ފޯނުތައް އަޑުއަހާ، މިހާރު ވެސް އެ ގާބިލިއްޔަތު އެބަހުރި ފުލުހުންގެ ވެސް، އެމްއެންޑީއެފްގެ ވެސް އެބަހުރި. ދެން މިހާރު މި ދިޔައީ ސައިބާ ސްޕޭސްއަށް ސައިބާ ކްރައިމްގެ ނަމުގައި މިހާރު ބިލެއް ފޮނުވައިގެން މި އުޅެނީ އަނެއްކާވެސް އިތުރަށް ރައްޔިތުންގެ ޕްރައިވެޓް ރައިޓްސް އިންފްރިންޖު ކުރަން،" ޔާމީން ވިދާޅުވިއެވެ.
އެ މަނިކުފާނު ވިދާޅުވީ އެފަދަ ގާނޫނެއް ހަދާއިރު އެންމެ ބޮޑު މައްސަލައަކީ ފުލުހުން ބާރުގެ ބޭނުން ހެޔޮ ގޮތުގައި ބޭނުން ނުކުރުން ކަމަށެވެ. އެގޮތުން ފުލުހުންގެ އިންޓެލިޖެންސް ރިޕޯޓަކަށް ބަލައި ''ވާނުވާ ބަންދު'' ޖެހުމުގެ ހައްގު ގާނޫނު އަސާސީން ފަނޑިޔާރުންނަށް ލިބިދީފައިވާކަން ފާހަގަކުރައްވައި ޔާމީން ވިދާޅުވީ، އެ މާއްދާގެ ބޭނުން ވެސް މިހާރު ވެސް ފުލުހުން ނަހަމަ ގޮތުގައި ބޭނުން ކުރާ ކަމަށެވެ.
އެގޮތަށް ކަންތައްތައް އޮއްވައި، ފުލުހުންނަށް އިތުރު ބާރުތައް ލިބިދޭ ގާނޫނެއް ހެދުމަކީ މައްސަލައެއް ކަމަށާއި މިހާރު ވެސް ފުލުހުންނަށް ލިބިދީފައިވާ ބާރުތަކުން ކޯޓު އޯޑަރެއް ހޯދައިގެން، ފޯނު ފަދަ ޑިވައިސްތައް ބެލޭނެ ކަމަށް ޔާމީން ވިދާޅުވިއެވެ.
"ގާނޫނު އަސާސީ އޭރު ޑްރާފްޓް ކުރީ ވަރަށް އިޚުލާސްތެރި ނިޔަތަކާއެކީ. އެއްގޮތަކަށް ވެސް ދައުލަތުގެ މުއައްސަސާތަކުން އެބިއުޒް ކޮށްފާނެ ކަމަށް ބަލައިފައެއް ނޫން. އެކަމަކު އެބިއުޒް އެ ކުރަނީ ސިޔާސީ ލީޑަރުން، އިސް މަގާމުތަކަށް އަންނަ މީހުންގެ ބިރުވެރިކަން ނޫނީ އެ މީހުން ވަލްނަރަބަލް ވީމަ އެބިއުޒް ކުރަނީމި އެެހެން މީހުންގެ ހައްގުތަކަށް އަރައިގަންނަނީ، މިހެން ލިބޭ ހަނި ޖާގަތަކުން،" ޔާމީން ވިދާޅުވިއެވެ.
އެ މަނިކުފާނު އިތުރަށް ވިދާޅުވީ ކުރީގެ ރައީސް އިބްރާހީމް މުހައްމަދު ޞާލިޙްގެ ސަރުކާރުގައި އާއި މި ސަރުކާރުން އަމަލު ކުރާ ގޮތުން ފުލުހުންގެ އަގު އިޔާދަ ނުކުރެވޭ ވަރަށް ވެއްޓި، އެ މުއައްސަސާއަށް ރައްޔިތުންގެ އިތުބާރު ގެއްލިފައިވާ ކަމަށެވެ.
ރައްޔިތުންގެ މަޖިލީހުގެ ޖުޑީޝަރީ ކޮމިޓީން އަންނަނީ ސައިބާ ކުށްތަކާ ގުޅޭ ތިން ބިލެއް ދިރާސާކުރަމުންނެވެ. އެއީ ގާނޫނުލް އުގޫބާތަށް އިސްލާހު ގެނައުމުގެ ބިލަކާއި ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލަކާއި ޖިނާއީ އެހީތެރިކަން ބަދަލުކުރުމުގެ ގާނޫނަށް އިސްލާހު ގެނައުމުގެ ބިލެކެވެ.
އޭގެ ތެރެއިން ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލުގައި ސައިބާ ކުށްތައް ހުއްޓުވުމުގައި ތަންފީޒީ އިދާރާތަކަށް އިތުރު ބާރުތަައް ލިބޭނެ އުސޫލުތައް ހިމަނާފައިވެއެވެ.
މި ބިލުގެ މަގުސަދަކީ ސައިބާ ކުށްތައް ހުއްޓުވުމަށްޓަކައި ގާނޫނު ތަންފީޒުކުރާ އިދާރާތަކަށް ލިބިދޭން ޖެހޭ ބާރުތައް ލިބިދިނުމާއި އެފަދަ ކުށްތައް ތަހުގީގުކޮށް ދައުވާކުރުމުގައި އަމަލުކުރާނެ އިޖުރާއީ އުސޫލުތައް ކަނޑައެޅުން ކަމަށް ބަޔާންކޮށްފައިވެއެވެ.