ދިވެހިރާއްޖޭގެ ޤައުމީ ޔުނިވާސިޓީ (އެމްއެންޔޫ)އާއި ސްޓޭޓް އިލެކްޓްރިކް ކޮމްޕެނީ ލިމިޓެޑްއާ (ސްޓެލްކޯ) ގުޅިގެން ކަރަންޓު ބިލު ބޮޑުވާމައްސަލައާ ގުޅޭ އިލްމީ ދިރާސާތަކެއް ކުރުމަށް އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސްޓެލްކޯގެ ފަރާތުން ސޮއިކުރެއްވީ އެމްޑީ ހުސެއިން ފަހުމީއެވެ. އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލަރު ޑރ. އައިޝަތު ޝެހެނާޒް އާދަމެވެ.
މިއަދުގެ ރަސްމިއްޔާތުގައި ވާހަކަދައްކަވުމުން ސްޓެލްކޯގެ އެމްޑީ ހުސެއިން ފަހުމީ ވިދާޅުވީ ސްޓެލްކޯއިން އިސްނަގައިގެން ގައުމީ ޔުނިވާސިޓީއާ އެކު ސޮއިކުރެވުނު ފަހުމުނާމާއަކީ އިލްމީ ދިރާސާތަކަށް ބިނާކޮށް، ބަސްބުނުމުގެ ގޮތުން ސޮއިކުރި ފަހުމުނާމާއެއް ކަމަށެވެ.
ސްޓެލްކޯގެ މެނޭޖިންގެ ޑިރެކްޓަރު ހުސެއިން ފަހުމީ-- ސަން ފޮޓޯ: އަމަން ލަތީފް
އަޅުގަނޑު ދެކޭގޮތުގައި ގައުމީ ޔުނިވާސިޓީއަކީ ވަރަށް މިނިވަން މުއައްސަސާއެެއް. ގައުމުގެ މުސްތަގުބަލުގައި ވެރިކަން ކުރާނެ ޖީލެއް ބިނާކުރާ ތަނެއް.
ފަހުމީ ވިދާޅުވީ ސްޓެލްކޯގެ އެދުމަކީ ގައުމުގައި އުފެދިފައި އޮތް ހިޔާލުތަފާތުވުންތަކާއި، ބައެއް ގެތަކުގެ ކަރަންޓު ބިލު ބޮޑުވާ މައްސަލައިގައި މިނިވަންކަމާ، އިންސާފުވެރިކަމާއެކު އިލްމީ ދިރާސާއެއް ކުރައްވާ އާންމު ކުރުން ކަމަށެެވެ.
"މިކަމަށްޓަކައި އަޅުގަނޑުމެން ކޮށްދެއްވާނެކަމަކީ އެއްވެސް ހިފެހެއްޓުމެއްނެތި، އަޅުގަނޑުމެނަށް ލިބެން ހުރި ހުރިހާ މައުލޫމާތެއް ދީ، ރައްޔިތުންނަށް އެކްސެސް ކުރުމުގެ ފުރުސަތު ދެއްވާނަން. އެކަމުގައި ނޯންނާނެ މިނެއް.
މިއަދުގެ ރަސްމިއްޔާތުގައި ވާހަކަދައްކަވަމުން ޝެހެނާޒް ވަނީ ސްޓެލްކޯއިން އިސްނަންގަވައިގެން ހަކަތައާ ބެހޭ އިލްމީ ދިރާސާތަކެއް ކުރުމަށް ރާއްޖޭގެ ގައުމީ ޔުނިވާސިޓީއަށް އިތުބާރުރަން ނިންމެވިކަމަށްޓަކައި ސްޓެލްކޯއަށް ޝުކުރު ދަންނަވާފައެވެ.
އެމްއެންޔޫގެ ވައިސް ޗާންސެލަރު ޝެހެނާޒް އާދަމް-- ސަން ފޮޓޯ: އަމަން ލަތީފް
ޝެހެނާޒް ވިދާޅުވީ މިފަހުމުނާމާގެ މައިގަނޑު މަގުސަދަކީ ސްޓެލްކޯއާއި ގައުމީ ޔުނިވާސިޓީ ގުޅިގެން، މި ދާއިރާގެ އިލްމީ ދިރާސާތައް ހެދުމާއި، މިދާއިރާއިން މަތީ ތައުލީމަށް ކިޔެވޭނެ ފުރުސަތު ފަހިކޮށްދިނުން ފަދަ ކަންތައްތައް ކުރުން ކަމުގައެވެ.
"ސްޓެލްކޯއިން ފާއިތުވި 10 އަހަރުތެރޭގައި، 2014އިން 2024އަށް ދޫކުރި ކަރަންޓް ބިލްތަކުގެ ފުރިހަމަ ތަހުލީލީ ދިރާސާއެއް ހެދުމަކީ މި ފަހުމުނާމާގެ އެންމެ މުހިއްމު އެއް މަގްސަދު" ޝެހެނާޒް ވިދާޅުވިއެވެ.
ޝެހެނާޒް ވިދާޅުވީ ފާއިތުވި އަހަރުތަކުގައި ކަރަންޓް ބިލްގެ އަގުތަކާ ގުޅޭގޮތުން އާންމު ރައްޔިތުންގެ މެދުގައި ކަންބޮނޑުވުން ފާޅުކޮށްފައި ވާކަމަށާއި، މި ދިރާސާގެ އެންމެ ބޮޑު މަގްސަދަކީ ރައްޔިތުންގެ ކަންބޮނޑުވުންތައް ހައްލުކުރެވޭނެ ގޮތްތަކެއް ދެނެގަތުން ކަމަށެވެ.
މި ދިރާސާގައި މަސައްކަތްކުރަނީ ކަރަންޓު ބޭނުންކުރާ މިންވަރު ދުވާލުގެ އެކި ދަންފަޅިތަކުގައި ދެނެގަނެ، ބޭނުންކުރާ މިންވަރާއި މޫސުމީ ގުޅުމެއް ހުރިތޯ ދެނެގަތުމަށް ކަމަށް ޝެހެނާޒް ވިދާޅުވިއެވެ.
ހަމަމިއާއެކު ސްޓެލްކޯގެ ބިލިންގް ޕްރޮސެސްގެ ސައްހަކަމާއި، ހާމަކަން އިތުރުކުރުމަށް ކުރެވިދާނެ ކަންކަން ދެނެގަތުމަށް މި ދިރާސާގައި މަސައްކަތްކުރާނެ ކަމަށް އޭނާ ވިދާޅުވިއެވެ.
"އަޅުގަނޑުމެންގެ އުއްމީދަކީ މި ފަހުމުނާމާގެ ދަށުން ކުުރިއަށް ގެންދެވޭ ދިރާސާގެ އަލީގައި އާންމު ރައްޔިތުންނަށް ކަރަންޓުގެ ޚިދުމަތްތައް ފޯރުކޮށްދިނުމުގައި، ރައްޔިތުން ހިތްހަމަޖެހޭގޮތަށް ދެފުށް ފެންނަ ގޮތަށް، ޚިދުމަތް ފޯރުކޮށްދެވޭނެ ގޮތެއް ސްޓެލްކޯއަށް މަގުފަހިވެގެންދިއުން" ޝެހެނާޒް ވިދާޅުވިއެވެ.
އޭނާ ވިދާޅުވީ މި ދިރާސާގައި މީޓަރުތަކުން ދައްކާ އަދަދާއި، ބިލްކުރެވިފައިވާ އަދަދުތަކާއި އެއްވެސް ކަހަލަ ތަފާތެއް ހުރިތޯ ބަލައި، ބިލްތަކުގެ އަދަދު ސަރީހަކޮށް ކަށަވަަރުކުރެވޭނެ ކަމަށެވެ.
މި ދިރާސާގެ ސަބަބުން ހަކަތަ ބޭނުން ކުރުން ރަނގަޅަށް ބެލެހެއްޓުމާއި، ރައްޔިތުން ބާރުވެރިކުރެވޭނީ ކިހިނެއްތޯ ދެނެގަނެ، ހަކަތަ ބޭނުންކުރެވޭނެ ދާއިރާތަކާއި، ޚަރަދު ކުޑަކުރެވޭނީ ކޮން ދާއިރާތަކަކުންކަން ވެސް ދެނެގަނެވޭނެ ކަމަށެވެ.
ކަރަންޓު ބިލާ ގުޅޭގޮތުން ދިރާސާއެއް ހަދަން ސްޓެލްކޯއިން ނިންމާފައި ވާއިރު، ކަރަންޓު ބިލު ބޮޑުވާ މައްސަލައަކީ ކޮންމެ މަހަކު ވެސް ފެންމަތިވާ މައްސަލައެކެވެ. މިކަމާ ގުޅިގެން ރައްޔިތުން ވަނީ ސްޓެލްކޯ ކުރިމަތީގައި މުޒާހަރާ ވެސް ކުރިއެވެ.
ނަމަވެސް، މިމަހުގެ ވެސް ކަރަންޓު ބިލު ކުޑަ ނުވާކަމަށް ބުނެ ގިނަ ބަޔަކު ވަނީ ސޯޝަލް މީޑިއާގައި ހިތްހަމަނުޖެހުން ފާޅުކޮށްފައެވެ.