ސެންޓަ ފޯ ޕޮލިސީ ސްޓަޑީސް (އެމްސީޕީއެސް)އިން ރާއްޖޭގެ ގާނޫނު އަސާސީއާއި އޭގެ ދަށުން ދައުލަތް ހިންގުމާ ގުޅޭ ގޮތުން ހަދަން ނިންމައިފައިވާ ދިރާސާގެ ތެރެއިން ބަލާނެ ކަންތައްތަކުގެ ތެރޭގައި މިނިވަން ޚާރިޖީ ސިޔާސަތަކީ ކޮބައިކަން ހިމެނޭ ކަމަށް ކުރީގެ ބަންޑާރަ ނައިބު އާޒިމާ ޝަކޫރު ރޭ ވިދާޅުވެއްޖެއެވެ.
ޕޮލިސީ ސްޓަޑީސް ސެންޓަރުން މިރޭ ބޭއްވި ރަސްމިއްޔާތެއްގައި ވަނީ، އެ ދިރާސާގައި އިސްކަންދޭނެ ބައެއް ދާއިރާތައް ފާހަގަކޮށްފައެވެ. އޭގެ ތެރެއިން އެއް ދާއިރާއަކީ މިނިވަން ޚާރިޖީ ސިޔާސަތުކަން އާޒިމާ ފާހަގަކުރެއްވިއެވެ.
"އަޅުގަނޑަށް ގަބޫލުކުރެވޭ ގޮތުގައި މިނިވަން ޚާރިޖީ ސިޔާސަތަކަށް މިވަނީ ދިވެހިރާއްޖެއާ ބެހޭ ގޮތުން ކަންކަން ނިންމުމުގައި، އަޅުގަނޑުމެންގެ އަމިއްލަ މަސްލަހަތު ގާއިމުކުރެވޭ ގޮތަށް އަމިއްލައަށް ކަންކަން ނިންމުމުގެ ބާރުވެރިކަން އަޅުގަނޑުމެންނަށް ލިބިދިނުން،" އޭނާ ވިދާޅުވިއެވެ.
އެ މިނިވަން ސިޔާސަތު ރާއްޖޭގައި ތަންފީޒު ކުރުމުގައި މިހާރު ގޮންޖެހުންތައް ހުރިކަން ފާހަގަކުރައްވައި އާޒިމާ ވިދާޅުވީ، ރާއްޖޭގައި އޮތީ ނަން އެލައިންޑް ނުވަތަ ވަކި ފަރާތަަކަށް ނުޖެހޭ ސިޔާސަތެއް ނޫން ކަމަށް ގިނަ ބަޔަކު ބުނާ ކަމަށެވެ. އަދި ނަން އެލައިންޑް ސިޔާސަތެއް މިޒަމާނުގެ ބޭނުން ކުރެވޭނެ ކަމާ މެދު ވެސް ބައެއް ފަރާތްތަކުން ސުވާލު އުފައްދާ ކަމަށާއި އެ މައުޟޫއާ ރާއްޖެއާ ގުޅުވައި ދިރާސާ ކުރާނެ ކަމަށް އޭނާ ވިދާޅުވިއެވެ.
އާޒިމާ ވިދާޅުވީ އެ ސިޔާސަތާ ގުޅޭ ގޮތުން ރާއްޖޭގައި އެންމެ ގިނައިން ދެކެވޭ ވާހަކަތަކުގެ ތެރޭގައި ޗައިނާގެ ދަރަނީގެ ދަންތުރައާއި އިންޑިއާ އައުޓް ހަރަކާތާއި ޖީއެމްްއާރު ކޮންޓްރެކްޓުގެ ވާހަކަ ހިމެނޭ ކަމަށެވެ.
އިންޑިއާ އައުޓާ ގުޅުވައި އާޒިމާ ވިދާޅުވީ، ރާއްޖޭގެ ޚާރިޖީ ސިޔާސަތު ބައްޓަން ކުރަންވީ ޕޯޑިއަމްތަކުގައެއް ނޫން ކަމަށާއި އެއީ ގައުމީ ސަލާމަތަށް އޮތް ބޮޑު މައްސަލައެއް ކަމަށެވެ.
ރާއްޖެއަކީ ބައިނަލްއަގުވާމީ ގާނޫނުތަކުގެ ތެރެއިން އަމިއްލަ ހައްގުތައް ހޯދަން ނުކުމެ ތިބި ބައެއް ކަމަށާއި މި ގައުމަކީ އޭޝިއާގެ ގައުމުތަކުގެ ތެރެއިން ތައުލީމީ މިންގަނޑު އެންމެ މަތި ގައުމު ކަމަށް އާޒިމާ ވިދާޅުވިއެވެ.
މިރޭ ބޭއްވި ބައްދަލުވުމުގެ ތެރެއިން --- ސަން ފޮޓޯ/ ނާއިޝް ނާހިދު
"އަޅުގަނޑުމެންގެ ޚާރިޖީ ސިޔާސަތަކީ އަޅުގަނޑުމެންގެ ތައުލީމީ ކެރުންތެރިކަން، ފޯރުންތެރިކަން ހުރި މީހުން. މީ ގައުމީ ސިޔާސަތަށް ހުރި މައްސަލައެކޭ. އަޅުގަނޑުމެންގެ އޮށްޓަރެއް ނެތްކަން، އަޅުގަނޑުމެންގެ ވިސްނުން ނެތްކަން، އަޅުގަނޑުމެންގެ ސްޓްރެޓެޖީ ނެތްކަން، އަޅުގަނޑުމެންގެ ޕޯޑިއަމްތަކުގެ ތެރޭގައި ބޭރު މީހުންނަށް ކިޔައިދޭކަށް ނުޖެހޭ،" އާޒިމާ ވިދާޅުވިއެވެ.
ޗައިނާގެ ދަރަނީގެ ދަންތުރައޭ ބުނެވޭ ވާހަކައާ ގުޅުވައި އޭނާ ވިދާޅުވީ، ރާއްޖެއަށް އެހީތެރިކަން ފޯރުކޮށްދޭ ގައުމުތަކާ ފާޅުކަން ބޮޑު ގޮތެއްގައި ޖެހިގަންނާކަށް ނުޖެހޭ ކަމަށާއި އެމީހުންނާ އެއްކޮށް މަސައްކަތް ކުރަން އެނގި، ގައުމީ މަސްލަހަތު ހިމާޔަތް ކުރަން އެނގެން ޖެހޭނެ ކަމަށެވެ.
އެކަންކަން ކުރަން އެނގޭ ވަރަށް ތައުލީމީ ބޭފުޅުން މި ގައުމުގައި ތިބި ކަން ފާހަގަކުރައްވައި އާޒިމާ ވިދާޅުވީ، އެފަދަ ކަންކަމަކީ ދުސްތޫރީ އޮނިގަނޑުގެ ބޭރުން އަދި އެތޭރޭން ވެސް ހިނގަން ޖެހޭ ކަންތައްތަކެއް ނޫން ކަމަށެވެ.
ޖީއެމްއާރު ކޮންޓްރެކްޓަކީ 'އަކުރުން ފިއްޔަށް' އޭނާ ދިރާސާކުރެއްވި ކޮންޓްރެކްޓެއް ކަން ފާހަގަކުރައްވައި އާޒިމާ ވިދާޅުވީ، އެ ކޮންޓްރެކްޓަކީ ގައުމީ ސަލާމަތަށް ނުރައްކާވާ ހާލަތުގައި އޮތް ކޮންޓްރެކްޓެއް ކަމަށެވެ.
"އަޅުގަނޑުމެންގެ މައި ދޮރާށި އެހެން ބަޔަކާ ހަވާލު ކުރީ ޓެކްސޭޝަންއާއި އެއާޕޯޓް ފީސްއާއި ދެން ހުރި ހުރިހާ ކަމެއް އެއްކޮށް ބަދަލު ކުރުމުގެ ހައްގާއި އެކުގައި. ނުވިތާކަށް އަޅުގަނޑުމެންގެ ރަންވޭގެ އެއްބައި ބުރިކޮށްލުމުގެ ހައްގާވެސް އެކުގައި،" އޭނާ ވިދާޅުވިއެވެ.
އެހެންވެ، އާޒިމާ ވަނީ އެ މައްސަލައަކީ ގާނޫނީ އުސޫލުތަކެއް ނެތިގެން ރާއްޖޭގައި ހިނގި ކަމެއް ނޫން ކަމަށް ވިދާޅުވެފައެވެ.