ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕަރޭޝަން (ސާކް)ގެ ސެކްރެޓަރީ ޖެނެރަލް އެމްޑީ ގޮލަމް ސަރުވާރު މިއަދު ރާއްޖެ ވަޑައިގެންފިއެވެ.
ފޮރިން މިނިސްޓްރީން ނެރުނު ބަޔާނެއްގައި ބުނީ، މި ދަތުރުފުޅަކީ އޭނާ މަގާމާ ހަވާލުވެ ވަޑައިގެންނެވުމަށްފަހު ގައުމުތަކަށް ތައާރަފު ވުމަށް ކުރައްވާ ދަތުރުފުޅެއް ކަމަށެވެ.
ސަރުވާރު ސާކްގެ 15 ވަނަ ސެކްރެޓަރީ ޖެނެރަލްގެ މަގާމާ ހަވާލުވެވަޑައިގަތީ މިދިޔަ އަހަރުގެ އޮކްޓޯބަރު މަހެވެ.
ފޮރިން މިނިސްޓްރީން ބުނީ، އޭނާ މި ދަތުރުފުޅުގައި ރައީސް ޑރ. މުޙައްމަދު މުޢިއްޒާއި ފޮރިން މިނިސްޓަރު މޫސާ ޒަމީރުގެ އަރިހަށް އިޙްތިރާމްގެ ޒިޔާރަތެއް ކުރައްވާނެ ކަމަށެވެ. އަދި، ފޮރިން ސެކްރެޓަރީ ފާތިމަތު އިނާޔާއާ ބައްދަލުކުރެއްވުމަށް ވެސް ހަމަޖެހިފައިވާ ކަމަށް މިނިސްޓްރީން ބުނެއެވެ.
މި ދަތުރުފުޅުގައި ގޮލަމް ސަރުވާރާއެކު އޭނާގެ އަނބިކަނބަލުން ތަސްލީމާ ސަރުވާރާއި ސާކް ސެކްރެޓޭރިއެޓް ޑިރެކްޓަރު ޝާހިޔާ އަލި މަނިކާއި ބަވެޝް ރ. ޓްރިވެޑީ ވެސް ބައިވެރިވެވަޑައިގަންނަވައެވެ.
ދަތުރުފުޅު ނިންމެވުމަށްފަހު ގޮލަމް ސަރުވާރު ފުރާވަޑައިގަތުމަށް ހަމަޖެހިފައިވަނީ އަންނަ ބުރާސްފަތި ދުވަހެވެ.