މިއަދާ މާދަމާ ވެސް އެކި ސަރަޙައްދުތަކަށް ވިއްސާރަކުރާނެ ކަމަށާއި މި ފެށުނު އޮގަސްޓު މަހަކީ ރާއްޖޭގެ އެކި ކަންކޮޅުތަކަށް ވިއްސާރަ ކުރާނެ ދުވަސްތަކެއް ކަމަށް މޫސުމާ ބެހޭ ގައުމީ އިދާރާ (މެޓް) އޮފީހުން ބުނެފިއެވެ.
"ސަން" އަށް މައުލޫމާތުދެމުން މެޓުން ބުނީ ރާއްޖެއަށް ހުޅަނގު މޫސުމުގެ ވިއްސާރަ މި އަހަރުގެ މެއި މަހު ފެށިއްޖެ ކަމަށެވެ. އެގޮތުން މިއަދާއި މާދަމާ ރާއްޖޭގެ އެކި ހިސާބުތަކަށް ވިއްސާރަ ކުރާނެ ކަމަށް ބުންޏެވެ.
އަދި މި މަސްތެރޭ ރާއްޖެއަށް ވިއްސާރަކުރާނެ ކަމަށް ވެސް މެޓުން ބުންޏެވެ.
ވެތުވެދިޔަ 24 ގަޑިއިރަށް ބަލާއިރު އެންމެ ގިނަ އަދަދަކަށް ވާރޭ ވެހިފައި ވަނީ ހދ. ކުޅުދުއްފުއްޓަށެވެ. އެ ސިޓީއަށް ވަނީ 38.7 މިލިމީޓަރުގެ ވާރޭ ވެހިފައެވެ. ދެން އެންމެ ގިނައިން ވާރޭ ވެހިފައި ވަނީ ހއ. ކެލާއަށާއި ރ. އަލިފުށްޓަށެވެ.
އެ އޮފީހުން ހާމަކުރި ގޮތުގައި މިއަދުގެ އިރުއޮއްސި ހައެއް ޖެހުމާ ހަމައަށް އުތުރާއި މެދުރާއްޖެތެރޭގެ އެކި ހިސާބުތަކަށް ވިއްސާރަކުރާނެއެވެ. އަދި ބައެއް ރަށްތަކަށް ގުގުރުން އެކަށީގެންވާ ކަމަށާއި ދެކުނުގެ އަތޮޅުތަކަށް ކެރީގެ އަސަރު ކުރާނެ ކަމަށް އެ އޮފީހުން ބުންޏެވެ.
މެދުރާއްޖެތެރެއާއި އުތުރުގެ އަތޮޅުތަކަށް ހުޅަނގުދެކުނާއި ހުޅަނގުން، ދެކުނުގެ އަތޮޅުތަަކަށް އިރުދެކުނާއި ދެކުނުން ގަޑިއަކު ފަސް މޭލާއި 15 މޭލާ ދެމެދުގެ ބާރު މިނުގައި ވައިޖެހޭނެ ކަމަށް މެޓުން ވަނީ ލަފާކޮށްފައެވެ. އަދި ވިލާގަނޑުގައި ގަޑިއަކު 35 މޭލުގެ ބާރުމިނަށް ވައިގަދަވުން އެކަށީގެންވާ ކަމަށް ވެސް އެ އޮފީހުން ވަނީ ބުނެފައެވެ.
ރާއްޖޭގެ ކަނޑުތަކަށް ބަލާއިރު، އާދައިގެ ވަރަކަށް މަޑުވެފައި ވިލާގަނޑުގައި އާދައިގެ ވަރަކަށް ގަދަވާނެ ކަމަށް އެ އޮފީހުން ބުންޏެވެ. އަދި ރާޅުގެ އުސްމިނުގައި 2-5 ފޫޓު ހުންނާނެ ކަމަށް ވަނީ ލަފާކޮށްފައެވެ.
މޫސުން ގޯސްވެ، މި އަހަރު ވެސް އެކިވަރުގެ ގެއްލުންތައް މާލެއާއި އަތޮޅުތެރޭގެ އެކި ރަށްތަކަށް ލިބިފައިވެއެވެ. އެހެންކަމުން މޫސުން ގޯސް ދުވަސްތަކުގައި ކަނޑު ދަތުރު ކުރާއިރުއާއި، މޫދަށް އެރިއުޅުމުގައި ސަމާލުވުމަކީ އެދެވިގެންވާ ކަމެކެވެ.