މި ހަފުތާގައި ޕްރިމިއާ ކުރުމަށް ހަމަޖެހިފައިވާ ފިލްމު "ސާޔާ" އަކީ މިއަހަރު އަޅުވާނެ އެންމެ ތަަފާތު އަދި އެންމެ ބިރުވެރި ފިލްމަށް ވާނެ ކަމަށް ފިލްމުގެ ޕްރޮޑިއުސަރު އިސްމާއީލް ޝަފީގު ބުނެފިއެވެ.
ތަފާތު އެކި ޖޯންރާތަކުގެ ފިލްމުތަކުން ފެނުމުގެ އިތުރުން ފިލްމުތައް އުފެއްދުމުގައި ވެސް މަގުބޫލުކަން ހޯދާފައިވާ އެކްޓަރު އަދި ޑައިރެކްޓަރު ޔޫސުފް ޝަފީއު (ޔޫއްޕެ) އުފައްދާ މި ބިރުވެރި ފިލްމު މި ހަފުތާ ބުދަ ދުވަހު ޕްރިމިއާ ކުރާނެއެވެ.
މި ފިލްމު ޕްރިމިއާ ކުރުމަށް ތައްޔާރުވަމުން އަންނަ އިރު މި ފިލްމުގެ ޓްރެއިލާގެ މަންޒަރުތަކުން ވެސް އެތައް ބައެއްގެ މެދުގައި ގިނަ ސުވާލުތަކެއް ވަނީ އުފެދިފައެވެ.
ފިލްމުގެ ޓްރެއިލަރުން މާ ގިނަ މައުލޫމާތުތަކެއް އާންމު ނުވި ނަމަވެސް ސަސްޕެންސް ވަނީ ވަރަށް ބޮޑަށް އިތުރު ކޮށްލާފައެވެ. އަދި ފިލްމުގެ ޕްރޮޑިއުސަރު ވެސް ބާރުދެނީ މި ސަސްޕެންސަށެވެ.
އިސްމާއީލް ޝަފީގު ދާދި ފަހުން ބުނެފައިވަނީ ސާޔާ އަކީ ތާފާތު ފިލްމަކަށް ވާނެ ކަމަށެވެ. އޭނާ ބުނެފައިވަނީ މި ފިލްމަކީ މިއަހަރު އަޅުވާ އެންމެ ބިރުވެރި އަދި ތަފާތު ފިލްމުގެ އިތުރުން އެންމެ އަސަރުގަދަ ލޯބީގެ ފިލްމަށް ވެސް ވާނެ ކަމަށެވެ.
އޭނާ ބުނީ މި ފިލްމު ވާނީ މުޅިި އޮލިމްޕަސް ތެރެ އެއްކޮށް ގުގުމާލާ ވަރުގެ ބިރުވެރި ފިލްމަކަށް ކަމަށެވެ. އެހެންވީމާ މި ފިލްމު ކޮންމެހެން ވެސް ބަލަން ޖެހޭ ކަމަށް އިޝާރާތް ކޮށްފައިވެއެވެ.
ޔޫއްޕެގެ ސްކްރީންޕްލޭއަކަށް އުފައްދާ މި ފިލްމުގެ ޑައިރެކްޝަންގެ މަސައްކަތް ވެސް ކުރާނީ އޭނާއެވެ. މި ފިލްމުގެ މުހިއްމު ރޯލަކުން ވެސް ޔޫއްޕެ ފެންނާނެއެވެ. ޔޫއްޕެއާއި ރަޝްފާގެ އިތުރުން ފިލްމުގެ އިތުރު ރޯލުން އިބްރާހީމް ޖިހާދު (ޖިމީ) ވެސް ފެންނާނެއެވެ.
ފިލްމުގެ ޓިކެޓު މިހާރު ވެސް ދޫކުރަމުން އަންނައިރު އޮލިމްޕަސް ކައުންޓަރުން ޓިކެޓު ލިބޭނެއެވެ. ޝޯގެ ޓިކެޓު ނެގުމަށް ގުޅާނީ 9372000 އަށެވެ.