އެއާ ފްރާންސް އާއި ބަޖެޓް އެއާލައިނެއް ކަމަށްވާ ޓްރާންސްއޭވިއާ ފްރާންސްއިން ލުބުނާނުގެ ވެރިރަށް ބެއިރޫތަށް ކުރާ ދަތުރުތައް އަންގާރަ ދުވަހުގެ ނިޔަލަށް މެދުކަނޑާލައިފައިވާ ކަމަށް އެ ކުންފުނިތަކުގެ ބެލެނިވެރި ކުންފުނި އެއާ ފްރާންސް-ކޭއެލްއެމްއިން ބުނެފިއެވެ.
ދަތުރުތައް މެދުކަނޑައިލީ އެ ސަރަހައްދުގެ ސަލާމަތީ ކަންކަމާމެދު ކަންބޮޑުވާތީ ކަމަށް ވެސް އެ ކުންފުނިން ވަނީ ބުނެފައެވެ.
ފްރާންސްގެ ދެ އެއާލައިނުން ފުރަތަމަ އެ ރޫޓުގެ ހިދުމަތް ދިނުން ހުއްޓާލީ ހޯމަ ދުވަހުއެވެ. އެއީ އިސްރާއީލު ހިފައިފައިވާ ގޯލާންގެ އުސްބިންތަކަށް ދިން ރޮކެޓް ހަމަލާތަކަކާ ގުޅިގެން އެކަމުގެ ބަދަލު ހިފާނެ ކަމަށް އިސްރާއީލުން ބުނިތާ އެއް ދުވަސް ފަހެވެ.
ފްލައިޓްތައް މެދުކަނޑައިލި ނަމަވެސް ރިޒަވޭޝަން ހަދާފައިތިބި ފަސިންޖަރުންނަށް އިތުރު ޚަރަދެއް ނުކޮށް ރީބުކް ކުރެވޭނެ ކަމަށް ކުންފުނީގެ ތަރުޖަމާނު ވިދާޅުވިއެވެ. އަދި ބެއިރޫތު ފްލައިޓްތައް ކެންސަލް ކުރި ނަމަވެސް އިސްރާއީލުގެ ވެރިރަށް ތެލް އަވީވަށް ކުރާ ދަތުރުތައް ކުރިއަށް ގެންދާނެ ކަމަށް ތަރުޖަމާނު ވިދާޅުވިއެވެ.
ގޯލާންގެ އުސްބިންތަކަށް ދިން ރޮކެޓް ހަމަލާގެ ސަބަބުން އީރާނުގެ ތާއީދު އޮންނަ ލުބުނާނުގެ ހަތިޔާރު އެޅި ޖަމާއަތް ހިޒްބުالله އާއި އިސްރާއީލާ ދެމެދު ބަދަލުކުރަމުންދާ ހަމަލާތައް އިތުރަށް ގޯސްވެދާނެ ކަމުގެ ބިރު ވަނީ އުފެދިފައެވެ.
ރޮކެޓް ހަމަލާއާ ގުޅިގެން ބެއިރޫތަށް ދާ ބައެއް އެއާލައިންތަކުން ފްލައިޓްތައް ކެންސަލް ކުރި ނަމަވެސް ފަހުން ވަނީ އަލުން ދަތުކުރަން ފަށައިފައެވެ.
އިސްރާއީލަށް ހަމަލާ ދިނީ ލުބުނާނުން ކަމަށް އިސްރާއީލާއި އެމެރިކާއިން ވެސް ވަނީ ބުނެފައެވެ. ނަމަވެސް އެކަމުގެ ލުބުނާނުގެ އެއްވެސް އަތެއް ނުވާ ކަމަށް ލުބުނާނުން ވަނީ ބުނެފައެވެ.
މިދިޔަ އޮކްޓޫބަރު މަހުގެ ހަތް ވަނަ ދުވަހު އިސްރާއީލުން ޣައްޒާގައި ހަނގުރާމަ ފެށިފަހުން އިސްރާއީލާއި ހިޒްބުﷲ އިން އަންނަނީ ގާތްގަޑަކަށް ކޮންމެ ދުވަހަކުހެން ހަމަލާތައް ބަދަލުކުރަމުންނެވެ.