އަންނަ އަހަރު އެމެރިކާ، ކެނެޑާ އަދި މެކްސިކޯގައި ބާއްވާ ފީފާ ވޯލްޑް ކަޕަށް ފަހު ފަރަންސޭސިވިލާތުގެ ޤައުމީ ޓީމުގެ ކޯޗުކަމުން ޑިޑިއާ ޑޭޝޯމްޕް ވަކިވާން ނިންމާފައިވާކަން އޭނާ ހާމަކޮށްފިއެވެ.
އުމުރުން 56 އަހަރުގެ ޑޭޝޯމްޕަކީ ފަރަންސޭސި ޤައުމީ ޓީމުގެ ކޯޗުކަން އެންމެ ގިނަ ދުވަހު ކޮށްފައިވާ ކޯޗެވެ. އޭނާ އަންނަނީ 2012 ވަނަ އަހަރުން ފެށިގެން ފަރަންސޭސި ޤައުމީ ޓީމުގެ ކޯޗުކަން ކުރަމުންނެވެ. ޑޭޝޯމްޕްގެ ކޯޗުކަމުގެ ދަށުން ފަރަންސޭސި ޓީމު ވަނީ 2018 ވަނަ އަހަރުގެ ވޯލްޑް ކަޕް ކާމިޔާބުކުރުމުގެ އިތުރުން 2022 ވަނަ އަހަރުގެ ވޯލްޑް ކަޕްގެ ފައިނަލްގައި އެއްކޮޅުން ވާދަކޮށްފައެވެ. އަދި، 2016 ވަނަ އަހަރުގެ ޔޫރޯ މުބާރާތް ވެސް ކާމިޔާބުކޮށްފައިވެއެވެ.
ފަރަންސޭސި ބްރޯޑްކާސްޓާ 'ޓީއެފް ވަން'އާ ވާހަކަދައްކަމުން ޑޯޝޯމްޕްވަނީ 2026 ވަނަ އަހަރު މިކަން ނިމޭނެކަން ހާމަކޮށްފައެވެ. އެކަން އޭނާއަށް ވަރަށް ސާފުކޮށް ފެންނަ ކަމުގައި ވެސް ޑޭޝޯމްޕް ހާމަކުރިއެވެ. އޭނާ ބުނީ، ކޮންމެ މީހަކަށް ވެސް ހުއްޓާލަން ޖެހޭ ވަގުތު އައުމުން ހުއްޓާލަން ބުނެވެން ވާނެ ކަމަށެވެ. މިއަށް ފަހު ވެސް ދިރިއުޅުން އެބައޮތްކަން އެގެންޖެހޭ ކަމަށް އޭނާ ބުންޏެވެ.
ކުޅުންތެރިއެއްގެ ގޮތުގައި މެދުތެރެއަށް ކުޅެފައިވާ ޑޭޝޯމްޕަކީ ކުޅުންތެރިއެއްގެ އިތުރުން ކޯޗެއްގެ ގޮތުގައި ވޯލްޑް ކަޕް ކާމިޔާބުކުރުމުގެ ޝަރަފު ހޯދާފައިވާ ތިންވަނަ ކުޅުންތެރިޔާއެވެ. އޭނާގެ ކެޕްޓަންކަމުގެ ދަށުން ފަރަންސޭސީންވަނީ 1998 ވަނަ އަހަރުގެ ވޯލްޑް ކަޕް ކާމިޔާބުކޮށްފައެވެ. މި ޝަރަފު ލިބުނު އަނެއް ދެ ކުޅުންތެރިންނަކީ މާރިއޯ ޒަގަލޯއާއި ފްރާންްޒް ބެކެންބައުއާއެވެ.
ޑޭޝޯމްޕް ފަރަންސޭސި ޓީމާ ހަވާލުވެފައިވަނީ 2012 ވަނަ އަހަރުގެ ޔޫރޯގެ ކުއާޓާ ފައިނަލުން ބަލިވުމާ ގުޅިގެން އޭރު ހުރި ކޯޗު ލޯރެން ބްލަންކްގެ ބަދަލުގައެވެ. އޭގެ ކުރިން އޭނާ ވަނީ ކޯޗެއްގެ ގޮތުގައި މޮނާކޯ، ޔުވެންޓަސް އަދި އޮލިމްޕިކް މާސޭގައި ކޯޗު ކޮށްދީފައެވެ. މި ތިން ކްލަބާ އެކު ވެސް އެއް ތަށި ހާސިލުކޮށްފައިވެއެވެ.