އައްޑޫ ސިޓީ ހިތަދޫގައި ބާރު ސްޕީޑުގައި ދުއްވާފައި ދިޔަ ސައިކަލެއް ވެލި ފުންޏަކަށް އެރުމުން އަނިޔާވި މީހަކު އިތުރު ފަރުވާއަށް މާލެ ގެންނަން ނިންމައިފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، ރޭ 23:49ހާއިރު ސައިކަލެއް ކޮންޓްރޯލް ނުވެ، ހިތަދޫގައި ފެންނ ހިންދާ ނިޒާމު ގާއިމުކުރުމަށް މަގު ކޮނެފައިވާ ހިސާބުން ވެލި ފުންޏަކަށް އަރައިފައިވާ ކަމަށެވެ.
އެ ހާދިސާގައި ސައިކަލް ދުއްވި 23 އަހަރިގެ ދިވެހި ފިރިހެން މީހާއަށް އަނިޔާވެގެން އައްޑޫ އެކުއެޓޯރިއަލް ހޮސްޕިޓަލްގައި ފަރުވާދެމުން އަންނަ ކަމަށާއި އޭނާ އިތުރު ފަރުވާއަށް މާލެ ފޮނުވަން އުޅޭ ކަމަށް ހޮސްޕިޓަލާ ހަވާލާދީ ފުލުހުން ބުންޏެވެ.
އެ ހާދިސާއާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ފުލުހުން ބުންޏެވެ.
ސައިކަލާއި ކާރު ފަދަ އުޅަނދުތައް ބާރު ސްޕީޑުގައި ދުއްވުމުން އެކްސިޑެންޓުވެ، މީގެ ކުރިން ބައެއް މީހުން ފުރާނަ ވެސް ގެއްލިފައި އެބަހުއްޓެވެ.