މި މަހުގެ 15 ވަނަ ދުވަހު ސިނަމާތަކަށް ގެންނަން ތާވަލުކޮށްފައި އޮތް ފިލްމު "ކޭލް ކޭލް މޭ"އިން ފިލްމު "ހެރާ ޕެރީ" އަދި "ނޯ އެންޓްރީ"ގެ ހަނދާންތައް އައުކުރުވައިފި ކަމަށް ބައެއް ބެލުންތެރިން ބުނެފިއެވެ.
މި ފިލްމުގެ ޓީޒާ އާއްމުކުރުމާއެކު ގިނަ ބަޔަކު ވަނީ ފިލްމަށް އިންތިޒާރުކުރާ ކަމަށާއި އަކްޝޭ އާއި ފަރުދީން ޚާންގެ ހެއްވާ މަޖާ ރޯލްތައް ބަލައިލުމަށް ކެތްމަދުވެފައިވާ ކަމަށް ބުނެފައެވެ. ބޮޑު ކާސްޓެއް ހިމެނޭ "ކޭލް ކޭލް މޭ"ގެ ޑައިރެކްޓަރަކީ މުދައްސަރު އަޒީޒެވެ. މި ފިލްމަކީ 2016ވަނަ އަހަރު ރިލީޒްކުރި އިޓަލީ ފިލްމު "ޕާފެކްޓް ސްޓްރޭންޖާސް"ގެ ރިމޭކްއެކެވެ.
ޓީ-ސީރީސް އާއި ވަކާއޫ ފިލްމްސްއިން ގެނެސްދޭ ހެއްވާ މަޖާ މި ކޮމެޑީ ފިލްމުން ފެންނާނެ މުހިއްމު ތަރިންގެ ތެރޭގައި އަކްޝޭ ކުމާރު، އެމީ ވާކް، ތާޕްސީ ޕަންނޫ، ވާނީ ކަޕޫރު، ފަރުދީން ޚާން، ޕްރަގަޔާ ޖޭސްވާލް އަދި އަދިތިޔާ ސީލް ހިމެނެއެވެ.
ފިލްމު "ކޭލް ކޭލް މޭ"ގެ މަންޒަރެއްގައި އަކްޝޭ ބަތަލާ ވާނީ ކަޕޫރާ އެކު--ފޮޓޯ/ބޮލީވުޑްހަންގާމާ
ފިލްމީ ދާއިރާގައި 14 އަހަރު ވަންދެން ދުރުގައި އުޅުމަށްފަހު ފަރުދީން ޚާން ބެލުންތެރިންނާ ބައްދަލުކުރާ މި ފިލްމަކީ 2007ވަނަ އަހަރު އަކްޝޭ އާއި ފަރުދީން ކުޅުނު ފިލްމު "ހެއި ބޭބީ"ގެ ހަނދާންތައް ވެސް އާ ކުރުވާނެ ފިލްމެއް ކަމަށް ބެލުންތެރިން ވަނީ ބުނެފައެވެ.
ފިލްމު "ހެރާ ޕެރީ"ގައި ފެނުނު ކަހަލަ ރޯލަކުން އަކްޝޭ ފެނި "ނޯ އެންޓްރީ"ގައި ފެނުނު ކަހަލަ ރޯލަކުން ފަރުދީން ފެނުމަށްވުރެ ވަކި އިތުރު އުފަލެއް އެބައޮތްތޯ ވެސް ބެލުންތެރިޔަކު ވަނީ ބުނެފައެވެ.