އިންޑިއާގެ ފިލްމީ ތަރިން ކަމަށްވާ ވަރުން ދަވަން އާއި ސަމަންތާ ރުތު ޕްރަބޫ ލީޑް ރޯލް ކުޅޭ ވެބް ސީރީސް "ސިޓަޑެލް: ހަނީ ބަނީ" ޕްރިމިއަ ކުރާ ތާރީޚު އިއުލާނުކޮށްފިއެވެ.
މި ވެބް ސީރީސް އެމޭޒަން ޕްރައިމްގައި ޕްރިމިއަކުރާ ތާރީޚާއެކު ސީރީސްގެ ފުރަތަމަ ޓީޒާ ޓްރެއިލާ ވެސް ވަނީ އާއްމުންނަށް ދައްކާލާފައެވެ. އެމޭޒަންއަށް ކާމިޔާބު ގިނަ ވެބް ސީރީސްތަކެއް އުފައްދައިދިން ރާޖް އާއި ޑީކޭ ޑައިރެކްޓްކުރާ މި ވެބް ސީރީސްގެ ގްލޯބަލް ޕްރިމިއާ ތާރީޚަކަށް ހަމަޖައްސާފައި ވަނީ މި އަހަރުގެ ނޮވެމްބަރު މަހުގެ ހަތް ވަނަ ދުވަހެވެ.
ޕްރޮޑިއުސަރުންގެ ގޮތުގައި އިންޑިއާގެ "ސިޓަޑެލް"ގައި މަސައްކަތް ކޮށްފައި ވަނީ މިދިޔަ އަހަރު އެމޭޒަން ޕްރައިމްގައި ޕްރިމިއަކުރި އެމެރިކަން ސްޕައި ތުރިލަ "ސިޓަޑެލް"ގެ އެގްޒެކެޓިވް ޕްރޮޑިއުސަރުން ރަސޯ ބްރަދާސް އެންތޮނީ އާއި ޖޯއެވެ.
ވަރުން ދަވަން އަދި ސަމަންތާ "ސިޓަޑެލް:ހަނީ ބަނީ"ގެ ޓީޒާ ރިލީޒްކުރި ހަފްލާގައި--ފޮޓޯ/ޓެލެގްރާފްއިންޑިއާ
މީގެ ދެ އަހަރު ކުރިން އިއުލާނު ކުރި އިންޑިއާގެ އުފެއްދުން "ސިޓަޑެލް" ހަނީ ބަނީ"އަކީ ވެސް ސްޕައި އެކްޝަން ތުރިލާއެކެވެ. އެކްޓަރު ވަރުން ދަވަންގެ ކެރިއަރުގެ ފުރަތަމަ މި ވެބް ސީރީސްގައި ދައްކުވައިދޭނީ 90އިގެ އަހަރުތަކުގެ ލުކްއެއް ކަމަށް އެމޭޒަން ޕްރައިމްގެ ފަރާތުން ވަނީ ބުނެފައެވެ.
ވަރުން އާއި ސަމަންތާގެ އިތުރުން މި ވެބް ސީރީސްގެ މުހިއްމު ރޯލް ކުޅޭނެ ތަރިންގެތެރޭ ތަޖުރިބާކާރު އެކްޓަރު ކޭކޭ މެނޮން ސައުތު ސިނަމާގެ ތަރި ސިމްރަން އަދި ސާގިބު ސަލީމް ހިމެނެއެވެ. ސަމަންތާ އާއި ކޭކޭ މެނޮންއާއެކު މީގެކުރިން ވެސް ރާޖް އާއި ޑީކޭ ވަނީ މަސައްކަތްކޮށްފައެވެ.