މި އަހަރު އެންމެ ގިނަ ބަޔަކު އެ ފިލްމަކަށް އިންތިޒާރުކުރާ ފިލްމު "ވެދާ"ގެ ޓްރެއިލާ ބެލުންތެރިންނަށް ދައްކާލައިފިއެވެ.
މި މަހުގެ 15ގައި ސިނަމާތަކަށް ގެންނަން ތާވަލުކުރެވިފައި އޮތް މި ފިލްމަކީ ޖޯން އަބްރަހަމް އަދި ބަތަލާ ޝަރުވަރީ ވާގު ލީޑް ރޯލް ކުޅެފައިވާ ވަރަށް ވަރުގަދަ އެކްޝަން ތުރިލާއެކެވެ. ފިލްމުގެ ވަރަށް ޚާއްސަ ރޯލަކުން ބަތަލާ ތަމަންނާ ބާޓިއާ ފެންނާނެކަން ޓްރެއިލާއިން ދައްކުވައިދެއެވެ. ޑައިރެކްޓަރު ނިކިލް އަދުވާނީގެ "ވެދާ"އަކީ ފިލްމު "ޕަތާން"ގައި ޖޯން ފެނުނު ކަހަލަ އަސްކަރީ އޮފިސަރެއްގެ ރޯލްއިން އެކްޓަރު ފެންނަ ފިލްމެކެވެ.
އެހެންނަމަވެސް އެ މަންޒަރު ބަދަލުވަނީ ބަދަލުހިފުމުގެ ރޫހަކާ އެކު ބަތަލާ ޝަރުވަރީއާ އެކު ޖޯން ފަށާ ތަޅާ ފޮޅުންތަކުގެ ވަރުގަދަ ސިލްސިލާއެއް ފެށުމާ ހިސާބުންނެވެ. ފިލްމުގައި ޖޯންއާ އެކު ޝަރުވަރީގެ ވެސް ވަރަށް ވަރުގަދަ އެކްޝަން ސީންތައް ފެންނާނެކަން ފިލްމުގެ ޓީޒާ ބަލާލުމުން ދޭހަވެއެވެ. ފިލްމުގައި ވިލެންގެ ރޯލްއިން ފެންނާނީ މި ފަހަކަށް އައިސް ގިނަ ފިލްމުތަކުން އަދި ވެބް ސީރީސްތަކުން ފެނިފައިވާ އެކްޓަރު އަބިޝޭކް ބެނަޖީއެވެ.
ފިލްމު 'ވެދާ'ގެ މަންޒަރެއްގައި ޖޯން އާއި ޝަރުވަރީ--ފޮޓޯ/ބޮލީވުޑްހަންގާމާ
ފިލްމުގެ ޓްރެއިލާ ބަލައިލުމަށްފަހު ބެލުންތެރިންގެ ގިނަ ބަޔަކު ބުނެފައި ވަނީ އަބިޝޭކް އާއި ޖޯންގެ ވަރުގަދަ ކުރިމަތިލުންތަކެއް ފެންނާނެތީ ފިލްމު ޝައުގުވެރިވާނެކަމަށެވެ.
ފިލްމު "ވެދާ" ރިލީޒްކުރާ ދުވަހު އަބިޝެކް ބެނަޖީ މުހިއްމު ރޯލް ކުޅެފައިވާ ފިލްމު "އިސްތިރީ 2" ރިލީޒްކުރެއެވެ. އަދި އެކްޓަރު އަކްޝޭ ކުމާރުގެ ފިލްމު "ކޭލް ކޭލް މޭން" ވެސް ރިލީޒްކުރާނެއެވެ.
"ވެދާ"އަކީ ޒީ ސްޓޫޑިއޯސް އާއި އެމްމޭ އެންޓަޓެއިންމަންޓް ކުންފުންޏާ ގުޅިގެން ގެނެސްދޭ ފިލްމެކެވެ.