އިޖުތިމާއީ މިންގަނޑާ ޚިލާފު މައުލޫމާތު ދައުރުކުރާތީވެ، އޮންލައިން ނޫހެއް ކަމަށްވާ ދެންމެ ވެބްސައިޓް ބްލޮކް ކުރުމަށް މޯލްޑިވްސް މީޑިއާ ކައުންސިލް (އެމްއެމްސީ)އިން އަންގައިފިއެވެ.
އެމްއެމްސީއިން ބުނީ "ދެންމެ" ނަމުގައި ހިންގާ ވެބްސައިޓުން، ދިވެހިރާއްޖޭގެ އާންމު އިޖުތިމާއީ މިންގަނޑާ ޚިލާފު، ބޭއަދަބީ، ހަޑިހުތުރު ބަހުން، އެކި މީހުންގެ ޒާތީ ކަންކަމާއި އަބުރާ ބެހި، އަންހެނުންގެ ގަދަރު ކުޑަވާގޮތަށް ލިޔުންތައް ފަތުރަމުންދާތީ އެ ކައުންސިލުން އިސްނަގައިގެން އެ މައްސަލަ ބަލާފައިވާ ކަމަށެވެ.
އެ ކައުންސިލުން ބުނީ އިޖުތިމާއީ މިންގަނޑާ ޚިލާފު ޚަބަރުތައް ދައުރުކުރަމުންދާތީ، އެތައް ބައެއްގެ ޝަކުވާ އެ ކައުންސިލަށް ލިބޭ ކަމަށެވެ.
"ދެންމެ" ވެބްސައިޓްއިން ތަކުރާރުކޮށް އިންޒާރު ދިނުމުންވެސް އިޖުތިމާއީ މިންގަނޑާ ޚިލާފު މައުލޫމާތު ފަތުރަމުންދާތީވެ، އެމްއެމްސީގެ ޝަކުވާ ބެލި ކޮމިޓީއިން ވަނީ އެ ވެބްސައިޓް ބްލޮކް ކުުރުމަަށް ކަމާ ބެހޭ ފަރާތްތަކަށް އަންގާފައި ކަމަށް އެ ކައުންސިލުން ބުންޏެވެ.
އެމްއެމްސީން ބުނީ އެފަދަ ކޮންޓެންޓް ނުފެތުރުމަށް 2013ގައި ވެސް އެ ވެބްސައިޓަށް އަންގައިފައިވާކަމަށެެވެ. ނަމަވެސް ދުވަސްކޮޅެއްގެ މެދުކެނޑުމަކަށްފަހު އެ ވެބްސައިޓްއިން ދަނީ އެކަހަލަ ލިޔުންތައް އަނެއްކާވެސް ފަތުރަމުން ކަމަށް އެ ކައުންސިލުން ބުންޏެވެ.