އުރީދޫ މޯލްޑިވްސްއިން ކުޅުދުއްފުށި ސިޓީއަށްއަށް އެއްގަންކޮށްފައިވާ ބައިނަލްއަގުވާމީ ޕީސް ކޭބަލްއިން ޚިދުމަތް ދޭން ފަށައިފިއެވެ.
އުރީދޫއިން ކުޅުދުއްފުއްޓަށް ޕީސް ކޭބަލް އެއްގަންކޮށް، އެ ސިޓީގައި ގާއިމްކޮށްފައިވާ އުރީދޫގެ ލޭންޑިން ސައިޓާއި ގުޅާލައިފައި ވަނީ މިދިޔަ ފެބްރުއަރީ މަހުގެ ތެރޭގައެވެ. އެއީ ހުޅުމާލެ ފިޔަވައި އިތުރު ރަށަކަށް އިންޓަނޭޝަނަލް ސަބްމެރިން ކޭބަލެއް ގުޅި ފުރަތަމަ ފަހަރެވެ.
އެ ކޭބަލް މެދުވެރިކޮށް ޚިދުމަތް ދޭން ފަށައިފައިވާކަން އެ ކުންފުނިން އިއުލާން ކުރީ، އުރީދޫއަށް މިއަދު 19 އަހަރު ފުރުމުގެ މުނާސަބަތާ ގުޅުވައި ރޭ ބޭއްވި ނޫސްވެރިންގެ ބައްދަލުވުމުގައެވެ.
އެ ބައްދަލުވުމުގައި އުރީދޫގެ ސީއީއޯ އަދި މެނޭޖިން ޑިރެކްޓަރު ޚާލިދު އަލް ޚަމާދީ ވިދާޅުވީ ޕީސް ކޭބަލުން ރާއްޖެ، ސިންގަޕޫރާއި ޔޫރަޕާ ގުޅުވައިލަދޭ ކަމަށާއި އެ ޚިދުމަތް ލިބުމަކީ ވަރަށް ބޮޑު ކާމިޔާބީއެއް ކަމަށެވެ. އެ ކޭބަލާއެކު ކަނެކްޓިވިޓީ ރަނގަޅުވެ، ޚިދުމަތް ލަސްވުމުގެ މައްސަލައަށް ހައްލެއް ލިބޭނެ ކަމަށް އޭނާ ވިދާޅުވިއެވެ.
"މި އިންވެސްޓްމެންޓްގެ ފައިދާ ކަސްޓަމަރުންނަށް ފުރިހަމައަށް ބޭނުން ކުރެވޭނެކަން އަޅުގަނޑުމެން ކަށަވަރު ކުރާނަން،" އުރީދޫގެ ސީއީއޯ ވިދާޅުވިއެވެ.
އުރީދޫއިން މީގެ ކުރިން ބުނެފައިވަނީ، ޕީސް ކޭބަލްއާއެކު 5ޖީގެ ގާބިލްކަން އިތުރުކޮށް، އިޖާދީ ޚިދުމަތްތަކަށް ފުރުސަތު ހުޅުވި، ހަގީގީ ޑިޖިޓަލް ދިވެހިރާއްޖެއެއް ގާއިމުކުރުމަށް މަގުފަހިވާނެ ކަމަށެވެ.
އުރީދޫގެ އަހަރީ ދުވަހާ ގުޅުވައި ތަފާތު ޚިދުމަތްތަކާއި ޕްރޮމޯޝަންތައް ރޭ ތައާރަފުކޮށްފައިވެއެވެ.