އާސީޒަނަށް ތައްޔާރު ވުމުގެ ގޮތުން އެމެރިކާއަށް މިހާރު ޕްރީ ސީޒަން ޓުއާ ކުރަމުންދާ އިންގްލިޝް ޕްރިމިއާ ލީގުގެ ލިވަޕޫލް އާއި އާސެނަލް ކުޅުނު ރަހްމަތްތެރި ކަމުގެ މެޗު ލިވަޕޫލްއިން ކާމިޔާބު ކޮށްފިއެވެ.
ފިލަޑެލްފިއާގެ ލިންކަން ފައިނޭންޝިއަލް ފީލްޑްގައި ކުޅުނު މި މެޗު ލިވަޕޫލްއިން ކާމިޔާބު ކޮށްފައިވަނީ ދެ ލަނޑު އެއް ލަނޑުންނެވެ. މި މެޗުގައި ފެނިގެންދިޔަ ތިންލަނޑުވެސް ފެނިގެންދިޔައީ ފުރަތަމަ ހާފުގައެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އާސެނަލްއިންނެވެ. ނަމަވެސް މި މެޗުގެ ފެށުން ރަނގަޅުވީ ލިވަޕޫލްގެއެވެ. މި ގޮތުން މެޗުގެ 13 ވަނަ މިނެޓުގައި މުހަންމަދު ސަލާހް ވަނީ ލަނޑެއް ޖަހާ މެޗުގެ ލީޑު ލިވަޕޫލަށް ނަގައިދީފައެވެ. އަދި ލިވަޕޫލްއިން ވަނީ މެޗުގެ 34 ވަނަ މިނެޓުގައި ފަބިއޯ ކަވާލިއޯ ކާމިޔާބު ކުރި ލަނޑާއެކު މެޗުގެ ލީޑު ފުޅާކޮށްފައެވެ.
މި މެޗުގައި އާސެނަލްގެ ހަމައެކަނި ލަނޑު މެޗުގެ 40 ވަނަ މިނެޓުގައި ޖަހައިދިނީ ކައި ހަވާޓްޒްއެވެ.
މި މެޗުގެ ދެވަނަ ހާފަށް ދެ ޓީމުން ވެސް ނިކުތީ ގިނަ ބަދަލު ތަކަކާއެކުއެވެ. އެހެންކަމުން ދެވަނަ ހާފުގެ މެޗުގެ ކުޅުން ދަންވެގެންދިޔަތަން ފެނިގެންދިޔައެވެ. އަދި މިއާއެކު ދެވަނަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެވެ.
ލިވަޕޫލްގެ އާ ކޯޗު އާން ސްލޮޓް އަންނަނީ އޭނާ ބޭނުންވާ ގޮތަށް ޓީމް ބައްޓަށް ކުރުމަށް މަސައްކަތް ކުރަމުންނެވެ. އަދި ރަހްމަތްތެރިކަމުގެ މެޗުތަކުގައި ރަނގަޅު ނަތީޖާތަކެއް ވެސް ވަނީ ހޯދަން ފަށައިފައެވެ.
އެމެރިކާއަށް ލިވަޕޫލް ކުރަމުންދާ ދަތުރުގެ ފަހު މެޗުގައި މިއަންނަ ހޮނިހިރު ދުވަހު ބައްދަލުކުރާނީ އަމިއްލަ ލީގަށް ނިސްބަތްވާ މެންޗެސްޓާ ޔުނައިޓެޑާއެވެ.
އާސެނަލްއިން ވަނީ ރޭގެ މެޗަށްފަހު އިނގިރޭސިވިލާތަށް އެނބުރި ގޮސްފައެވެ. އާސެނަލް ދެން ވާދަކުރާނީ އެ ޓީމުގެ އެމިރޭޓްސް ސްޓެޑިއަމްގައި ކުޅުމަށް ހަމަޖެހިފައިވާ ރަހްމަތްތެރިކަމުގެ މުބާރާތެއްގައި ޖަރުމަނު ބުންޑެސްލީގާގެ ބަޔާ ލެވަކޫސެން އާއި ފްރެންޗް ލީގު އާންގެ އޮލިމްޕިކް ލިއޯން އާއެވެ.