އިނގިރޭސި ޕްރިމިއާ ލީގުގައި ބްރައިޓަން އެންޑް ހޯވް އެލްބިއަންއިން އާސެނަލް މޮޅުވިޔަ ނުދީ ހިފަހައްޓާލައިފިއެވެ.
ބްރައިޓަންގެ ދަނޑުގައި ކުޅުނު މި މެޗު ނިމުނީ 1-1 އިން އެއްވަރުވެގެންނެވެ.
މެޗުގެ 16 ވަނަ މިނެޓުގައި އާސެނަލްގެ ޒުވާން ކުޅުންތެރިޔާ އީތަން އެންވަނޭރީ ވަނީ ލަނޑެއް ޖަހައި އެ ޓީމަށް ލީޑު ނަގައިދީފައެވެ. މި ލަނޑުގެ އިތުރުން ވެސް އާސެނަލަށް ވަނީ ލަނޑު ޖަހާނެ ރަނގަޅު ފުރުސަތު ފުރަތަމަ ހާފުގައި ލިބިފައެވެ. ނަމަވެސް، އެ ޓީމަށް ލިބުނު ފުރުސަތުތަކުގެ ބޭނުން ހިފޭގޮތެއްނުވިއެވެ. ނަތީޖާއަކަށްވީ ބްރައިޓަންއިން މެޗުގެ 61 ވަނަ މިނެޓުގައި ލިބުނު ޕެނަލްޓީއަކުން މެޗުގެ ނަތީޖާ ހަމަހަމަކުރުމެވެ. މި ޕެނަލްޓީ ލިބުނީ ބްރައިޓަންގެ ޖާއޮ ޕެޑްރޯ އަތުން ބޯޅަ ހޯދަން އުޅުމުގެ ތެރޭގައި އާސެނަލްގެ ޑިފެންޑަރު ވިލިއަމް ސަލީބާއަށް ފައުލް ކުރެވުމާ ގުޅިގެންނެވެ.
ވީއޭއާރުން ބަލާފައި ވެސް ނިންމީ އެއީ ޕެނަލްޓީއެއް ކަމަށެވެ. އެ ޕެނަލްޓީ ލަނޑަކަށް ހަދައިދިނީ ޕެޑްރޯއެވެ.
މެޗު އެއްވަރުވި ނަމަވެސް އާސެނަލް އޮތީ 40 ޕޮއިންޓާ އެކު ދެވަނައިގައެވެ. އެއްވަނައިގައި އޮތް ލިވަޕޫލާ ދެމެދު ފަސް ޕޮއިންޓުގެ ފަރަގެއް އެބައޮތެވެ. އެކަމަކު، ލިވަޕޫލް އަދި ދެ މެޗު ނުކުޅެ އެބައޮތެވެ.
ރޭ ލިބުނު ޕޮއިންޓާއެކު ބްރައިޓަން އޮތީ 28 ޕޮއިންޓާ އެކު 10 ވަނައިގައެވެ.