އިސްރާއީލުގެ ހަމަލާއެއް ލުބުނާނުގެ ވެރިރަށް ބެއިރޫތަށް އަމާޒުވެއްޖެއެވެ.
އިއްޔެ އިރުއޮއްސުނު ވަގުތު ބެއިރޫތުގެ ދެކުނު ސަރަހައްދަށް އިސްރާއީލުން ދިން ހަމަލާއެއްގައި ހިޒްބުاللهގެ އިސް ކޮމާންޑަރަކަށް އަމާޒުކޮށްފައިވާ ކަމަށް ލުބުނާނުގެ ސަލާމަތީ އިސް މަސްދަރަކުން ވަނީ ބުނެފައެވެ.
އިސްރާއީލުގެ އަސްކަރިއްޔާއިން ބުނީ މިދިޔަ ހަފުތާ ގޯލާންގެ އުސްބިންތަކަށް ދިން ރޮކެޓް ހަމަލާގައި އިސްރާއީލުގެ ކުޑަކުދިންތަކެއް މަރާލި ކޮމާންޑަރަކަށް އަމާޒުކޮށްގެން ބެއިރޫތަށް ހަމަލާއެއް ދީފައިވާ ކަމަށެވެ.
"މަޖްދާލް ޝަމްސްގައި ކުޑަކުދިންތަކެއް މަރާލުމާއި އިސްރާއީލުގެ އިތުރު އެތައް އާންމުންނެއް މަރާލުމުގެ ޒިންމާ ނަގަންޖެހޭ ހިޒްބުﷲގެ ކޮމާންޑަރަށް އިސްރާއީލު ސިފައިން ވާނީ ހަމަލާއެއް ދީފައި." އިސްރާއީލުގެ އަސްކަރިއްޔާއިން ނެރުނު ބަޔާނެއްގައި ބުނެފައިވެއެވެ.
އިސްރާއީލުގެ ހަމަލާއެއް ބެއިރޫތުގެ ހާރެތު ހްރެއިކް ސަރަހައްދުގައި ހުންނަ ހިޒްބުاللهގެ ޝޫރާ ކައުންސިލްގެ ވަށައިގެންވާ ސަރަހައްދަށް އަމާޒުކޮށްފައިވާ ކަމަށް ލުބުނާނުގެ ދައުލަތުގެ ގައުމީ ނޫސް އޭޖެންސީންވެސް ވަނީ ބުނެފައެވެ.
އެ ހަމަލާ އަމާޒުވެފައި ވަނީ އަށް ބުރީގެ އިމާރާތެއްގެ އެންމެ ފަހު ފަންގިފިލާއަށް ކަމަށާއި ހަމަލާދިނުމާއެކު، އެ ސަރަހައްދުގައި އެމްބިއުލާންސްތައް ހަރަކާތްތެރިވެފައިވާ ކަމަށް އޭއޭފްޕީގެ ފޮޓޯގްރާފަރަކާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.
އިސްރާއީލުން ހިފާފައިވާ ގޯލާން އުސްބިންތަކަށް ހޮނިހިރު ދުވަހު ދިން ހަމަލާއެއްގައި އިސްރާއީލުގެ އެތައް ބަޔަކު މަރުވުމުގެ ބަދަލު ހިފުމުގެ ގޮތުން ބެއިރޫތަށް ހަމަލާ ދޭނެ ކަމަށް އިސްރާއީލުން ވަނީ ބުނެފައެވެ.
އެ ހަމަލާގެ ޒިންމާ އިސްރާއީލާއި އެމެރިކާއިން ވަނީ ހިޒްބުﷲ ގެ ބޮލުގައި އަޅުވައިފައެވެ. ނަމަވެސް ހިޒްބުﷲ އިން ވަނީ އެކަން ދޮގުކޮށްފައެވެ.