ރީތިވެ ޒީނަތްތެރިވުމުގެ ގޮތުން މޭކަޕް ކުރުމަކީ މިއަދު ވަރަށް ގިނަ ބައެއްގެ މެދުގައި އާއްމުކަމެކެވެ. ބައެއް މީހުން ތަންކޮޅެއް ގަދައަށް މޭކަޕް ކުރާއިރު އަނެއް ބައި މީހުންނަކީ ވަރަށް ލުއި މޭކަޕް ސްޓައިލަށް ލޯބިކުރާ ބައެކެވެ.
މި ކުޑަކުޑަ ދިވެހިރާއްޖެއަށް ބެލިކަމުގައި ވިޔަސް ކޮންމެވެސް ކަހަލަ މޭކަޕެއް ނުކޮށް ބޭރުތެރެއަށް ނުވަތަ މަސައްކަތުގެ މާޙައުލަށް ނުކުންނަ މީހުން ވަރަށް މަދޭ ދެންނެވުން ދޮގަކަށް ނުވާނެއެވެ.
މޭކަޕް ކުރުމަށް ވަކި އުމުރެއް ނެތްއިރު ސަމާލުކަންދިނުން މުހިއްމު ކަމަކީ ކޮށްފައިހުރި މޭކަޕް ފިލުވާލަން ހަނދާން ކުރުމެވެ. ހާއްސަކޮށް ނިދަން އޮށޯތުމުގެ ކުރިން މިކަން ކުރުމަށް ހާއްސަ ސަމާލުކަމެއް ދިނުން ކޮންމެހެންވެސް މުހިއްމެވެ. އާއްމުކޮށް މޭކަޕް ކުރާ މީހެއްނަމަ މިކަމާ ބެހޭ މައުލޫމާތު ނޭނގި ހުރުމަކީ ވެސް ނާދިރު ކަމެކެވެ.
މޭކަޕް ދޮވެލުމުގައި ސަމާލުކަންދޭންވާ ގިނަ ކަންތައްތައް ހުރޭ--ފޮޓޯ/ޕިންޓްރެސްޓް
މުޅި ދުވަހު ބޭރުތެރޭގައި އުޅުމަށްފަހު ހަށިގަނޑަށް ލިބިފައި ހުންނަ ވަރުބަލިކަމާ އެކު ބައެއް މީހުންގެ ސިކުނޑިން މިކަން ކައްސާލާ ފަހަރުވެސް އާދެއެވެ. ކޮށްފައި ހުރި މޭކަޕާ އެކު ނިދަން އޮށޯވެއްޖެނަމަ ގައިގެ ހަންގަނޑަށް އެކަމުން ނޭދެވޭ އަސަރު ކުރުމަށް މުޅި ރޭގަނޑުގެ ވަގުތުތައް ހޭދަވެއެވެ.
އެގޮތުން މޫނުގައި އުނގުޅާފައިހުރި ފައުންޑޭޝަން ނުފިލުވުމުގެ ސަބަބުން ހަންގަނޑު ކުރަކިވެ މޫނުގައި ބިހި ނެގުމަށް މަގުފަހި ކުރުވައެވެ. ހަމައެއާއެކު ލޮލުގައި އަޅާފައި ހުންނަ އަނދުން އަދި އެސްފިޔައިގައި ހާކާފައި ހުންނަ މަސްކަރާ ނުފިލުވާނަމަ ލޯ ހިރުވާ ލޮލުގައި ޖަރާސީމު އުފެދެން މާގިނަ ވަގުތެއް ނުނަގައެވެ.
މޭކަޕް ދޮވެލުމަށްފަހު ރަގަޅަށް މޫނު މޮއިސްޗަރައިޒް ކުރުމަށް ސަމާލުކަންދޭންވާނެ--ފޮޓޯ/އެވްރީޑޭހެލްތު
ހާއްސަކޮށް އެކްޒިމާ އަދި ސޮރިއަސިސް ފަދަ ހަމުގެ މައްސަލަ ހުންނަ މީހުން މިކަމަށް ހާއްސަ ސަމާލުކަމެއް ދިނުން މުހިއްމެވެ.
މޭކަޕް ފިލުވުމުގެ ނުވަތަ ދޮވުމުގެ މަރުހަލާގައި ހާއްސަ ސަމާލުކަމެއް ދޭންވާ ކަންތައްތަކުގެ ތެރޭ، ތިމާގެ ހަންގަނޑަށް އެންމެ އެކަށޭނެ މޭކަޕް ރިމޫވާ ބޭނުންކުރުން، މަޑު ފޮތިކޮޅެއް މިކަމުގައި ބޭނުންކުރުން، މޭކަޕް ފޮހެލުމަށްފަހު ރީތިކޮށް މޫނު ދޮވެލުން އަދި އެއަށްފަހު މޫނުގައި މޮއިސްޗަރައިޒައެއް ބޭނުންކުރުން ހިމެނެއެވެ.
މޫނުގައި ހުންނަ މޭކަޕް ފިލުވުމަށްފަހު ކަރާއި، ކަނދުރާ އަދި ކަންފަތް ރީތިކޮށް ސާފުކޮށްލުމަކީ ވެސް ހާއްސަ ސަމާލުކަމެއް ދިނުން މުހިއްމު ކަމެކެވެ.