ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ)އިން ތަފާތު ކުޅިވަރާއި ކެރިއާ ގައިޑެންސްއާއެކު އަންނަ ހަފުތާގައި ފަހި ދުވަސް ބޭއްވުމަށް ނިންމައިފިއެވެ.
އެމްއެންޔޫއެއިން އެ ހަރަކާތް ބާއްވާނީ އަންނަ ހަފުތާގެ ބުދަ ދުވަހުގެ ހަވީރު 04:00އިން ރޭގަނޑު 10:00 އަށެވެ.
މި ހަރަކާތުގެ ތެރޭގައި، ދަރިވަރުންނަށް ޔުނިވާސިޓީގެ ކޯސްތަކަށް ކުރިމަތިލުމުގެ ފުރުސަތު ދީ، ފޯމު ބަލައިގަތުންވެސް ކުރިއަށްދާނެ ކަމަށް އެ ޔުނިވާސީޓީއިން ބުންޏެވެ.
މީގެއިތުރުން މި ހަރަކާތުގައި ޔުނިވާސިޓީގެ ފަންނީ ދާއިރާތަކުގެ ލެކްޗަރަރުން، އެބޭފުޅުންގެ ދާއިރާތަކުން މަތީ ތަޢުލީމު ހާސިލުކުރުމަށް ހުރި ފުރުސަތުތަކާ ބެހޭ މަޢުލޫމާތުތައް ފޯރުކޮށްދޭނެ ކަމަށް އެ ޔުނިވާސިޓީއިން ބުނެއެވެ. އަދި މަތީ ތަޢުލީމު ހާސިލުކުރުމަށް ވާންޖެހޭ ތައްޔާރީތަކުގެ މަޢުލޫމާތު ވެސް މި ހަރަކާތުގެ ބައިވެރިންނާ ހިއްސާކުރާނެކަމަށް ކަމަށް އެމްއެންޔޫއިން ބުންޏެވެ.
''ފަހި ދުވަސް'' ހަރަކާތުގައި މަޢުލޫމާތު ފޯރުކޮށްދެވޭ ބައެއް ދާއިރާތައް:
- ބަހާއި އިންސާނީ ޢިލްމުތަކުގެ ދާއިރާ
- ތަޢުލީމީ ދާއިރާ
- އިންޖިނީއަރިން ދާއިރާ
- ޞިއްޙީ ދާއިރާ
- ފަތުރުވެރިކަމާއި މެހެމާނުދާރީގެ ދާއިރާ
- ދީނީ ޢިލްމުގެ ދާއިރާ
- ސައިންސްގެ ދާއިރާ
- ޝަރީޢަތާއި ޤާނޫނުގެ ދާއިރާ
- ވިޔަފާރީގެ ދާއިރާ
- ނިޔެމިކަމުގެ ދާއިރާ
- ދަނޑުވެރިކަން އަދި ފައުންޑޭޝަން ކޯސްތަކުގެ ދާއިރާ
އެމްއެންޔޫގެ "ފަހި ދުވަސް" ހަރަކާތަކީ ކޮންމެ އިންޓޭކަކާ ދިމާކޮށް ކޯސްތަކަށް އަލަށް ވަންނަން ޝައުގުވެރިވާ މީހުންނަށް އެ ޔުނިވާސިޓީގެ ހުރިހާ ފެކަލްޓީތަކާއި ސެންޓަރުތަކާ ބެހޭ މައުލޫމާތު ފޯރުކޮށްދިނުމަށް ބާއްވާ ހަރަކާތެކެވެ.