މިދިޔަ އަހަރުގެ ޑިސެމްބަރު މަހު ރިލީޒްކުރި ރަންބީރު ކަޕޫރުގެ ފިލްމު "އެނިމަލް" ބެލުމަށްފަހު އާއްމުންގެ އިތުރުން ފިލްމު އިންޑަސްޓްރީގެ ވެސް ވަރަށް ގިނަ ބައެއްގެ ފާޑުކިޔުންތަކާ ކުރިމަތިލާން ޖެހުނު ކަމަށް އެކްޓަރު ބުނެފިއެވެ.
ޝޯ ހޯސްޓު ނިކިލް ކަމަތުގެ ޔޫޓިއުބު ޗެނަލްއަށް ދިން އިންޓަވިއުގައި ވާހަކަ ދައްކަމުން ރަންބީރު ބުނީ، އެންމެ ފުރަތަމަ ފިލްމު "އެނިމަލް"ގެ ސްކްރިޕްޓް އަޑު އެހުމަށްފަހު ބިރުވެރިކަން އިހުސާސް ކުރެވުނު ކަމަށެވެ.
އެހެންނަމަވެސް ފިލްމު "އެނިމަލް" ކުޅުމާ ހަމައަށް ބެލުންތެރިންނަށް އޭނާ ގިނައިން ފެނިފައި ވަނީ 'ގުޑް ބޯއި'އެއްގެ ގޮތުގައި ކަމަށާއި ބޭނުންވީ އެ މަންޒަރު ބަދަލުކޮށްލަން ކަމަށް ރަންބީރު ވަނީ ބުނެފައެވެ.
ރަންބީރަށް ލިބިފައިހުރި އެކްޓިންގް ހުނަރު ދެއްކުމަށް ލިބުނު އެ ފުރުސަތު ދޫކޮށްލަން ބޭނުންނުވީ ސަބަބު ކިޔައިދެމުން ރަންބީރު ބުނީ، ހެޔޮ ނިޔަތެއްގައި ފިލްމަށް އެއްބަސްވި ނަމަވެސް ގިނަ ބަޔަކު އެކަން މާނަ ކުރީ ވަރަށް ނުބައި ގޮތަކަށް ކަމަށެވެ.
ރަންބީރު ކަޕޫރު އަދި ރަޝްމިކާ ފިލްމު "އެނިމަލް"ގެ މަންޒަރެއްގައި--ފޮޓޯ/ބޮލީވުޑްހަންގާމާ
މީގެކުރިން ވެސް "އެނިމަލް"ގެ ޑައިރެކްޓަރު ސަންދީޕު ރެޑީ ވަންގާ ގެނެސްދިން "ކަބީރު ސިންގް" ފަދަ ފިލްމުތަކަށް ބެލުންތެރިންގެ ތެރެއިން ބަޔަކު ނުރުހުމުގެ ބަސްތައް ރައްދުކޮށްފައި ވާއިރު ބަޔަކު މީހުން ނިންމައިގެން ތިބީ ސަންދީޕުގެ ކޮންމެ ފިލްމަކަށް ވެސް ހަމަ އެއް ދަރަޖައެއް ދޭން ކަމަށް ރަންބީރު ބުނެފައިވެއެވެ.
ފިލްމު އިންޑަސްޓްރީއަށް ނިސްބަތްވާ ބައެއް މީހުން ރަންބީރާ ބައްދަލުކުރުމަށްފަހު "އެނިމަލް"އަކީ ރަންބީރު ކުޅެން އެހާ ރަނގަޅު ފިލްމެއް ނޫންކަމަށް ބުނެފައިވާ ކަމަށާއި އެ ފިލްމަށް ރަންބީރު އިންކާރު ނުކުރީ ކީއްވެތޯ ސުވާލު އުފައްދާފައިވާ ކަމަށް ވަނީ ބުނެފައެވެ.
ފިލްމު "އެނިމަލް"އަށް ދިމާވީ ނުރުހުމުގެ ފާޑުކިޔުންތަކާ އެކު ވެސް ރަންބީރު ބޭނުންވީ ހަނު ހުންނަން ކަމަށާއި މީގެކުރިން ވެސް އެއްވެސް ބަޔަކަށް ރައްދުދީ ޖަދަލު ކުރުމަކީ އެކްޓަރުގެ އާދައެއް ނޫން ކަމަށް މި އިންޓަވިއުގައި ވަނީ ބުނެފައެވެ.
ރަންބީރު އެންމެ އަވަހަށް ބެލުންތެރިންނަށް ފެންނާނީ އަންނަ އަހަރު ރިލީޒްކުރަން ތައްޔާރުވަމުން އަންނަ ފިލްމު "ރާމަޔާނާ"އިންނެވެ. މި ފިލްމަށްފަހު ރަންބީރު ދެން މަސައްކަތް ފަށާނީ އަންހެނުން އާލިއާ ބަޓްއާ އެކު މުހިއްމު ރޯލްއިން ފެންނާނެ ފިލްމު "ލަވް އެންޑް ވޯ"އިންނެވެ. މިއީ ޑައިރެކްޓަރު ސަންޖޭ ލީލާ ބަންސާލީގެ ފިލްމެކެވެ.