ޔޫރަޕުގެ ގަދަބާރު ރެއާލް މެޑްރިޑަށް ހިތްޖެހުނީ ކްރިސްޓިއާނޯ ރޮނާލްޑޯގެ ސަބަބުން ކަމަށް އެ ޓީމާ އަލަށް ގުޅުނު ބްރެޒިލްގެ 18 އަހަރުގެ ފޯވާޑް އެންޑްރިކް ބުނެފިއެވެ.
ރެއާލްގެ ކުޅުންތެރިއެއްގެ ގޮތުގައި އެންޑްރިކް ވަނީ ދާދިފަހުން ދައްކާލާފައެވެ. ދައްކާލުމަށް ބޭއްވި މި ރަސްމިއްޔާތުގައި އެ ކުލަބުގެ ގިނަ އަދަދެއްގެ ސަޕޯޓަރުން ބައިވެރިވިއެވެ. މީގެއިތުރުން ރެއާލްގެ ރައީސް ފްލޮރެންޓީނޯ ޕްރޭޒްވެސް ބައިވެރިވިއެވެ.
މި ރަސްމިއްޔާތުގައި ވާހަކަދައްކަމުން އެންޑްރިކަށް ވަނީ ރޮވިފައެވެ. އޭނާގެ ވާހަކައިގައި ބުނީ ރެއާލަށް ބަދަލުވުމުން ވަރަށް ބޮޑަށް އުފާވެފައިހުރި ކަމަށެވެ. އަދި ދުނިޔޭގެ އެންމެ ބޮޑު ކުލަބަށް ކުޅުން އެއީ އޭނާގެ ކުޑައިރުުގެ ހުވަފެނެއް ކަމަށާއި, މިއަދު އެ ހުވަފެން ހަގީގަތަކަށް ވެފައިވާ ކަމަށެވެ.
ސަޕޯޓަރުންނާ ވާހަކަދެއްކި ވަގުތު ރޮވުނު ސަބަބާއި ގުޅޭގޮތުން ނޫސްވެރިން ވަނީ ސުވާލުކޮށްފައެވެ. އެ ސުވާލުތަކުގެ ޖަވާބުގައި އެންޑްރިކް ދެއްކީ ރޮނާލްޑޯގެ ވާހަކައެވެ. އެއީ ކުޑައިރުން ފެށިގެން ބޭނުންވީ ރޮނާލްޑޯ ފަދަ ކުޅުންތެރިއެއްގެ ގޮތުގައި ވުމަށް ކަމަށާއި ރެއާލަށް ސަޕޯޓުކުރަން ފެށީވެސް ރޮނާލްޑޯގެ ސަބަބުން ކަމަށެވެ. އަދި ރޮނާލްޑޯ ގޮތަށް ހުވަފެންތަކުގައި ކުލަޖެހެން ފެށިތަން ފެނުމުން އުފާވިވަރުން ރޮވުނީ ކަމަށްވެސް އެންޑްރިކް ބުންޏެވެ.
މިވަގުތު ދެކުނު އެމެރިކާ ސަރަހައްދުގެ އެންމެ އުއްމީދީ އެއް ކުޅުންތެރިއަކީ އެންޑްރިކް އެވެ. އޭނާ ވަނީ ޔޫރަޕުގެ ގަދަބާރުތަކާ ދެކޮޅަށް ކުޅުނު މެޗުތަކުގައި މޮޅު ކުޅުމެއް ދައްކާފައެވެ.