ޔުއޭފާ ވިމެންސް ޗެމްޕިއަންސް ލީގު ގްރޫޕް ބީގައި ރެއާލް މެޑްރިޑް ފެމިނީނޯއިން ސެލްޓިކް ވިމެން ބަލިކޮށްފިއެވެ.
ރެއާލްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 4-0 އިންނެވެ.
މެޗުގެ ހަތްވަނަ މިނެޓުގައި ކެރޮލީން ވެއާވަނީ މެޗުގެ ފުރަތަމަ ލަނޑު ރެއާލަށް ކާމިޔާބުކޮށްދީފައެވެ.
މެޗުގެ ފުރަތަމަ ހާފުގައި އިތުރު ލަނޑެއް ފެނިގެން ގޮސްފައެއް ނުވެއެވެ. ނަމަވެސް، ލަނޑު ޖަހާނެ ރަނގަޅު ފުރުސަތު ރެއާލަށް ލިބިގެންދިޔައެވެ.
މެޗުގައި ރެއާލްގެ ދެވަނަ ލަނޑު އެ ޓީމަށް ކާމިޔާބު ކުރެވުނީ މެޗުގެ 72 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިޔާ ސިގްނާ ބްރޫންއެވެ. ރެއާލުން ކާމިޔާބުކުރި ތިންވަނަ ލަނޑު މެޗުގެ 80 ވަނަ މިނެޓުގައި ކެރޮލީން މޮލާ ކާމިޔާބުކޮށްދިންއިރު، ފަހު ލަނޑު މެޗުގެ 83 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ ލިންޑާ ކައިސޭޑޯއެވެ.
މި ކާމިޔާބީއާ އެކު ރެއާލް ފެމިނީނޯއިން ވަނީ މި ފަހަރުގެ މުބާރާތުގައި ފުރަތަމަ ކާމިޔާބީ ހޯދާ، ލިބިފައިވާ ތިން ޕޮއިންޓާ އެކު ގްރޫޕްގެ ދެވަނައަށް ކުރިއަށް ޖެހިލާފައެވެ. ސެލްޓިކް ވިމެން އޮތީ ޕޮއިންޓެއް ނުލިބި ގްރޫޕްގެ އެންމެ ފުލުގައެވެ.