އަންނަ މަހު ނެރުމަށް ތައްޔާރުވާ ބިރުވެރި ފިލްމު "ސާޔާ"ގެ ފުރިހަމަ ޓްރެއިލަރު އާންމުކޮށްފިއެވެ.
ތަފާތު އެކި ޖޯންރާތަކުގެ ފިލްމުތަކުން ފެނުމުގެ އިތުރުން ފިލްމުތައް އުފެއްދުމުގައި ވެސް މަގުބޫލުކަން ހޯދާފައިވާ އެކްޓަރު އަދި ޑައިރެކްޓަރު ޔޫސުފް ޝަފީއު (ޔޫއްޕެ) އުފައްދާ މި ބިރުވެރި ފިލްމު އިއުލާނުކޮށްފައިވަނީ މިދިޔަ މަހުގެ ފަހުކޮޅުގައެވެ.
ޔޫއްޕެގެ ސްކްރީންޕްލޭއަކަށް އުފައްދާ މި ފިލްމުގެ ޑައިރެކްޝަންގެ މަސައްކަތް ވެސް ކުރާނީ އޭނާއެވެ. މި ފިލްމުގެ މުހިއްމު ރޯލަކުން ވެސް ޔޫއްޕެ ފެންނާނެއެވެ. މިހާރު ޕޯސްޓް ޕްރޮޑަކްޝަންގައި އޮތް ސާޔާގެ ޕްރޮޑަކްޝަންގެ މަސައްކަތް ކޮށްފައިވަނީ އިސްމާއިލް ޝަފީއެވެ.
ޔޫއްޕެގެ ޕްރޮޑަކްޝަން "ޝައި ޕްރޮޑަކްޝަން" އިން ދާދި ފަހުން އާންމުކޮށްފައިވާ ޓްރެއިލާއިން ފިލްމުގެ ތަފާތު އެކި މަންޒަރުތައް ފެނިގެން ދެއެވެ. ފިލްމުގެ ލީޑް ކެރެކްޓަރަށް އެކި ކަހަލަ މީހުން އެކި ގޮތްގޮތަށް އަނިޔާ ކުރަމުންދާ މަންޒަރުތަކަކީ ޓްރެއިލާއިން އެންމެ ގިނައިން ފެނިގެން ދިޔަ މަންޒަރުތަކެވެ.
މި މަންޒަރުތަކުގެ ފަހަތުގައިވާ ސަބަބު ވަރަށް އަވަހަށް އެނގިގެން ދާނެއެވެ. ފިލްމުގެ ޓްރެއިލަރުން މި ފިލްމުގެ ބިރުވެރިކަމާއި ތުރިލާ އަދި ތަފާތު އެކި ސިއްރުތަކާ ގުޅިފައިވާކަން ފެނިގެން ދެއެވެ. މުޅި ފިލްމުގެ ޓްރެއިލަރުން އެންމެ ބޮޑަށް ފާހަގަކުރެވިގެން ދިޔައީ ލީޑް އެކްޓަރު އައިމިނަތު ރަޝްފާގެ އެކްޓިން ހުނަރެވެ.
ލޯބީގެ ބިރުވެރި މި ފިލްމު ރިލީޒްކުރަން ހަމަޖެހިފައިވަނީ އަންނަ މަހުގެ ހަތްވަނަ ދުވަހުގައެވެ.
ޔޫއްޕެއާއި ރަޝްފާގެ އިތުރުން ފިލްމުގެ އިތުރު ރޯލުން އިބްރާހީމް ޖިހާދު (ޖިމީ) ވެސް ފެނިގެންދާނެއެވެ.
ސާޔާއަކީ ޔޫއްޕެ އުފައްދާ ފުރަތަމަ ބިރުވެރި ފިލްމެއް ނޫނެވެ. މިދިޔަ އަހަރު މަޝްހޫރު ބަތަލާ ނިއުމާ މުހައްމަދާއެކު ވަނީ "ކަޅަކި" ނަމުގައި ވެސް ބިރުވެރި ފިލްމެއް ރިލީޒްކޮށްފައެވެ. އޭގެ އިތުރުން "އެ ދަތުރު"އާއި "ދައުވަތު" ފަދަ ފިލްމުތަކަކީ ވެސް ޔޫއްޕެގެ ބިރުވެރި ފިލްމުތަކެވެ.