އެމެރިކާގެ ސިޔާސީ މައިދާނަކީ ދުވަހަކުވެސް ހަނގުރާމައިގެ މައިދާނަކަށް ވެގެން ނުވާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ.
ބައިޑެން އެގޮތަށް ވިދާޅުވީ އެމެރިކާގެ ކުރީގެ ރައީސް ރައީސް ޑޮނަލްޑް ޓްރަމްޕް އަވަހާރަކޮށްލަން އިއްޔެ ދިން ހަމަލާ ކުށްވެރިކޮށް ގައުމާ މުޚާތަބުކުރައްވައި ދެއްވި ޚިތާބެއްގައެވެ.
ޚިތާބުގައި ބައިޑެން ވިދާޅުވެފައި ވަނީ އެމެރިކާގެ ސިޔާސީ މަޝްރަހު ވަރަށް ހޫނުވެފައިވާ ކަމަށެވެ.
"އަޅުގަނޑުމެންގެ ގަބޫލުކުރުންތައް ކިތަންމެ ވަރުގަދަ ނަމަވެސް، ދުވަހަކުވެސް އަނިޔާވެރި ކަމަށް ފުރުސަތު ދީގެން ނުވާނެ." ބައިޑެން ވިދާޅުވިއެވެ.
ޕްރައިމްޓައިމްގައި ބައިޑެން ދެއްވި ޚިތާބުގައި އެމެރިކާގެ ރައްޔިތުން އެއްބައިވުމަށް ގޮވާލައްވައި، ސިޔާސީ ހަމަނުޖެހުން އިތުރުވުމަކީ ނޮވެމްބަރު މަހު ބާއްވާ ރިޔާސީ އިންތިޚާބަށް އަސަރުކުރާނެ ކަމެއް ކަމަށް ވިދާޅުވިއެވެ.
ޓްރަމްޕުގެ ކަންފަތަށް އަމާޒުވި ހަމަލާ ދިނީ 20 އަހަރުގެ މީހެއް ކަމަށްވާ ތޯމަސް މެތިއު ކްރޫކްސް، ކައިރީގައި ހުރި އިމާރާތެއްގެ ފުރާޅުމަތީގައި އޮވެއެވެ. ސީކްރެޓް ސާވިސްގެ މެންބަރުން ވަނީ ހަމަ އެ ވަގުތު އޭނާއަށް ހަމަލާދީ މަރާލައިފައެވެ. މައްސަލަ ތަހުގީގުކުރާ އެފްބީއައި އިން ދަނީ ކްރޫކްސްގެ ފޯނު ހުޅުވޭތޯ ބަލައި ހަމަލާގެ މަގްސަދު ހޯދުމަށް މަސައްކަތް ކުރަމުންނެވެ.
ކްރޫކް އަކީ ޓްރަމްޕްގެ އަމިއްލަފުޅު ރިޕަބްލިކަން ޕާޓީގައި ރަޖިސްޓްރީވެފައިވާ މީހެކެވެ. ކްރޫކާއެކި ކިޔެވި ބައެއް ކުދިން ބުނި ގޮތުގައި އޭނާ އަކީ ބުލީގެ ޝިކާރައަކަށްވެފައިވާ މީހެކެވެ. އަދި އަބަދުވެސް ވަރަށް މަޑުން ހުންނަ ކްރޫކް އަކީ ސިޔާސީ ކަންކަމުގައި ވާހަކަ ދައްކާ މީހެއް ނޫން ކަމަށާއި ސޯޝަލް މީޑިއާގައިވެސް އެކްޓިވް މީހެއް ނޫން ކަމަށް އެ މީހުން ބުނެއެވެ.
ބޭރުގެ މީޑިއާތަކުން ރިޕޯޓުކުރާ ގޮތުގައި ކްރޫކްސް އެ ހަމަލާދީފައި ވަނީ ޓްރަމްޕްގެ ސްޓޭޖާ ގާތްގަނޑަކަށް 119 މީޓަރުން ދުރުންނެވެ. އަދި ހަމަލާދީފައި ވަނީ އެ ސަރަހައްދުގައި ހުރި ބިއްލޫރި އުފައްދާ ކާރުޚާނާއެއްގެ ފުރާޅު މަތީ އޮވެ ކަމަށްވެސް މީޑިއާތަކުން ރިޕޯޓުކޮށްފައިވެއެވެ.
އެމެރިކާގެ ސަލާމަތީ ޚިދުމަތްތަކުން އަންނަނީ އެއީ ޓްރަމްޕް އަވަހާރަކޮށްލަން ދިން ހަމަލާއެއްގެ ގޮތުގައި ތަހުގީގު ކުރަމުންނެވެ.