އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ރައީސް ކަމަށް އިންތިޚާބު ނުވިނަމަ، 2020ވަނަ އަހަރުގެ ރިޔާސީ އިންތިޚާބަށް ނުފޫޒު ފޯރުވި ކަމުގެ ކުށް އެ މަނިކުފާނުގެ މައްޗަށް ސާބިތުވާނެ ކަމަށް ޑިޕާޓްމަންޓް އޮފް ޖަސްޓިސްއިން ކޮންގްރެސް އަށް ހުށަހެޅި ރިޕޯޓެއްގައި ބުނެފިއެވެ.
"ޝަރީއަތުގައި ހުކުމް ހޯދުމާއި ދެމެހެއްޓުމަށް ގަބޫލުކުރެވޭ ހެކިތައް ފުދޭ،" ސްޕެޝަލް ކައުންސެލް ޖެކް ސްމިތު ލިޔުއްވާފައިވާ އެ ރިޕޯޓުގައިވެއެވެ.
ސަތޭކަ ތިރީސް ހަތް ޞަފްހާގެ އެ ރިޕޯޓު ކޮންގްރެސްއަށް ފޮނުވީ ރިޕޯޓްގެ ދެ ބައިގެ ތެރެއިން ފުރަތަމަ ބައި ކަމަށްވާ އިންތިޚާބަށް ނުފޫޒު ފޯރުވުމުގެ މައްސަލައާ ބެހޭ ގޮތުން ލިޔެފައިވާ ބައި އާންމު ކުރުމަށް ގާޒީ އައިލީން ކެނަން ހުއްދަ ދެއްވުމުންނެވެ.
ރިޕޯޓުގައި ޓްރަމްޕާ ދެކޮޅަށް ހުށަހަޅާފައިވާ ދެ ވަނަ މައްސަލަ ކަމަށްވާ ގަވާއިދާ ޚިލާފަށް ސަރުކާރުގެ ސިއްރު ލިޔެކިޔުންތައް ގެންގުޅުއްވި ކަމަށް ތުހުމަތު މައްސަލައިގެ ތަފްސީލު ބައި އާންމު ކުރަން ޖެހޭތޯ ބެލުމަށް އެ ކަމަނާ ވަނީ ހަފްތާގެ ފަހުކޮޅު އަޑުއެހުމެއް ބާއްވަން ތާވަލުކޮށްފައެވެ.
ޓްރަމްޕް އެމެރިކާގެ ރައީސްކަމުގެ ހުވާ ކުރައްވާނީ މި މަހުގެ 20ވަނަ ދުވަހެވެ.
ޓްރަމްޕްގެ ދެ މައްސަލައަކާ ގުޅޭ އެ ރިޕޯޓު ނިންމެވުމަށްފަހު، ރިޕޯޓު ލިޔުއްވުމުގައި އިސްކޮށް އުޅުއްވި ޙާއްސަ ވަކީލު ޖެލް ސްމިތު ވަނީ މިދިޔަ ހަފްތާ އެ މަގާމުން އިސްތިއުފާ ދެއްވާފައެވެ.
އެމެރިކާގެ ޖަސްޓިސް ޑިޕާޓްމަންޓުން ޓްރަމްޕާ ގުޅޭ ތަހުގީގުތައް ބެލެހެއްޓުމަށް ސްމިތު އައްޔަން ކުރެއްވީ 2022 ވަނަ އަހަރުއެވެ. މަސްލަހަތު ފުށުއަރާ ހާލަތްތަކުގައި ޚާއްސަ ވަކީލުން އައްޔަން ކުރަނީ އެ ޑިޕާޓްމަންޓުންނެވެ.
ޓްރަމްޕްގެ މައްޗަށް ތުހުމަތު ކުރެވުނީ ގަވާއިދާ ޚިލާފަށް ލިޔެކިޔުންތައް ނަގައި އެމަނިކުފާނުގެ ގެކޮޅު ކަމަށްވާ ފްލޮރިޑާގެ މާ-އަ-ލަގޯ ރިސޯޓުގެ ކޮޓަރިތަކުގައި ރައްކާކޮށްފައިވާ ކަމުގެ ތުހުމަތުގައެވެ. އިންތިޚާބަށް ނުފޫޒު ފޯރުވުމުގެ މައްސަލައިގައި ޓްރަމްޕްގެ މައްޗަށް ތުހުމަތު ކުރަނީ 2020 ވަނަ އަހަރުގެ އިންތިޚާބުގެ ނަތީޖާ ބާތިލު ކުރަން ރޭވި ކަމުގެ ތުހުމަތެވެ.
އެ ދެ މައްސަލަވެސް ވަނީ ޓްރަމްޕްގެ މައްޗަށް ސާބިތުވެފައެވެ. ނަމަވެސް ޓްރަމްޕް ވަނީ ކުށަށް އިންކާރުރައްވައި އެއީ ސިޔާސީ ގޮތުން ކުރި ދައުވާއެއް ކަމަށް ވިދާޅުވެފައެވެ.
އިންތިޚާބުވެފައިވާ ރައީސެއްގެ މައްޗަށް ދައުވާ ނުކުރެވޭތީ، ސްމިތް ވަނީ މިދިޔަ ނޮވެމްބަރު މަހު އެ މައްސަލަތައް ނިންމާލާފައެވެ.