އެއާޕޯޓުގެ ތެރޭގައި ފަސިންޖަރުންނަށް ފަސޭހަ ކުރުމަށް ޓަކައި ޓްރެފިކް ފްލޯ ބަދަލުކުރުމުގެ މަސައްކަތް ކުރަމުންދާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ބުނެފިއެވެ.
އެމްއޭސީއެލް އިން ބުނީ އެއާޕޯޓުގެ ތެރޭން ދަތުރު ނެގޭ ތަންތަނަށް ބަދަލު ގެނެސްގެން، ފަސިންޖަރުންނަށް ފަސޭހަ ކުރުމަށް ޓަކައި ޓްރެފިކް ފްލޯ ބަދަލުކުރުމުގެ މަސައްކަތް މިހާރު ކުރަމުން އަންނަ ކަމަށެވެ.
މީގެކުރިންވެސް އެއާޕޯޓް ޓްރެފިކް ހައްލުކުރުމަށް ކަމާބެހޭ ފަރާތްތަކުން މަޝްވަރާ ކުރިއެވެ. މި މަސައްކަތް ކުރީ، ހޯމް މިނިސްޓްރީއާއި އެމްއޭސީއެލް، ޓްރާންސްޕޯޓް މިނިސްޓްރީ އަދި ފުލުހުން ހިމެނޭގޮތަށެވެ.
އެއާޕޯޓުގެ ޓްރެފިކް ފްލޯއަށް ބަދަލު ގެންނަނީ --- ސަން ފޮޓޯ/ ފަޔާޒު
އެއާޕޯޓު ކިޔޫގައި އޮންނަ ޓެކްސީތަކުން ގަވާއިދާ ހިލާފަށް އަމަލުކުރާކަމުގެ ޝަކުވާ ވެސް އޭރު ބޮޑުވިއެވެ.
އެހެންކަމުން، އެއާޕޯޓުގައި ފުލުހުން ހަރަކާތްތެރިވާން ފަށައި، ގަވާއިދާ ޚިލާފަށް އެއާޕޯޓުގައި ހަރަކާތްތެރިވާ ޓެކްސީތަކާ މެދު ފިޔަވަޅުއަޅަން ޓްރާންސްޕޯޓް މިނިސްޓްރީން ނިންމިއެވެ. އަދި، ގަވާއިދާ ޚިލާފަށް ޓެކްސީ ކުރުމުގައި ބައިވެރިވާ ބިދޭސީންނާ މެދު ހަރުކަށި ފިޔަވަޅުތަކެއް އެޅުމަށް ވެސް އެ މިނިސްޓްރީން ނިންމިއެވެ.
މިހާރު އޮންނަ ގޮތުން އެއާޕޯޓަށް ވަދެގެން ޕާކިންއާ ހަމައަށް އޮންނަނީ ވަރަށް ބޮޑަށް ކިއު ހެދިފައެވެ. ޕްރައިވެޓް ކާރުތަކާއި ޓެކްސީތަކުން މުޅި އެއާޕޯޓް އޮންނަނީ ފުރިފައެވެ. ޓެކްސީ އިންތިޒާމު ހުންނަ ގޮތުން ޓާމިނަލުން ނިކުމެވޭ ސަރަހައްދު ވެސް އޮންނަނީ ވަަރަށް ބޮޑަށް ތޮއްޖެހިފައެވެ.
ކުރިއަށް އޮތީ ޓޫރިޒަމްގެ ޕީކް ސީޒަންއެވެ. ކޮންމެ އަހަރެއްގެ ވެސް ފަހުކޮޅަކީ ގިނަ އަދެއްގެ ފަތުރުވެރިން ރާއްޖެއަށް ޒިޔާރަތްކުރާ ދުވަސްވަރެކެވެ.
މިއާއެކު ރާއްޖޭގެ ވެލާނާ އިންޓާނޭޝަލް އެއާޕޯޓްއަށް ކޮންމެ އަހަރަކު ވެސް މި ދުވަސްވަރުގައި ވަރަށް ބާރުބޮޑުވެއެވެ. އެހެންކަމުން، ޕީކް ސީޒަން އައުމުގެ ކުރިން ޓްރެފިކް ފްލޯގެ މައްސަލަތައް ހައްލުކުރުމަކީ ވަރަށް މުހިއްމު ކަމެކެވެ.