ވެލާނާ އިންޓަނޭޝަނަލް އެއާޕޯޓަށް ހައިވޭއިން ވަދެގެން އަންނައިރު ފެންނާން ހުންނާނެހެން ބިނާކުރި "ވެލްކަމް މޮނިއުމެންޓް" މިއަދު ހުޅުވައިފިއެވެ.
މި ބިނާގައި ވެލާނާ އެއާޕޯޓުގެ ނަން ބޯޑަކާއި އޭގެ މަތީގައި ލެޑު ސްކްރީނެއް ހަރުކޮށް ގަޑި ފެންނަހެން ދައްކައިފައި ވެއެވެ. މި ބިނާ ފަރުމާކޮށްފައިވަނީ ދިވެހި ގަލު ވަޑާން ރަމްޒުކޮށްދޭ ފަރުމާއަކަށެވެ.
މި ބިނާ ބަހައްޓާފައި ހުރީ ހައިވޭއިން ގޮސް ހުޅުލެއަށް އަރާ ދިމާލުގައި މަގުގެ މެދުގައެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނީ ވެލާނާ އިންޓަނޭޝަނަލް އެއާޕޯޓުގައި މިފަދަ ބިނާ އެއް ހުޅުވުމަކީ ލިބޭ ވަރަށް ބޮޑު އުފަލެއް ކަމަށެވެ.
އެމްއޭސީއެލް އިން ބުނީ މިހާރު ހިނގަމުންދާ އެއާޕޯޓް އިވެންޓުތައް ދައްކާ އިންޓަގްރޭޓެޑް އެލްއީޑީ ސްކްރީނެއް ހިމެނޭ މި ބިނާއަކީ އާ ޓާމިނަލްގެ ޑިޒައިން ފުރިހަމަކޮށްދޭ އެއްޗެއް ކަމަށެވެ.
ވެލާނާ އެއާޕޯޓުގައި ހެދި "ވެލްކަމް މޮނިއުމެންޓް" އިފްތިތާޙްކޮށްފި--ފޮޓޯ: އެމްއޭސީއެލް
މި މޮނިއުމެންޓް ހުޅުއްވައި ދެއްވީ މިއަދު ހެނދުނު ބޭއްވި ރަސްމިއްޔާތެއްގައި އެ ކުންފުނީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދާއި ޑެޕިއުޓީ މެނޭޖިން ޑިރެކްޓަރުން ކަމަށްވާ މުހައްމަދު ލަމްއާނާއި މުޖުތަބާ ލަތީފެވެ.
މީގެއިތުރުން މި ބިނާއަކީ ސްޓްރަކްޗަރަލް ޑިވެލޮޕްމަންޓްތަކުގެ ތެރެއިން ވީއައިއޭގައި ފަސިންޖަރުންގެ ތަޖުރިބާ އިތުރުކުރުމަށް ކުރަމުންދާ މަސައްކަތުގެ ބައެއް ކަމަށް އެ ކުންފުނިން ބުނެއެވެ.
އެއާޕޯޓުގެ އާ ޓާމިނަލް އިމާރާތް ކުރަން ހަވާލުކުރީ ސައުދި އަރަބިއްޔާގެ ބިން ލާދިން ގްރޫޕާ އެވެ. އެ ކުންފުނިން އެ މަސައްކަތް ކުރަނީ ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ)އާ ހަވާލުކޮށްގެންނެވެ.
އެއާޕޯޓުގެ އާ ޓާމިނަލް މިއަހަރުގެ ޕީކް ސީޒަނަށް ނިންމުމަކީ ރައީސް ޑރ މުހައްމަދު މުއިއްޒުގެ އަމާޒެކެވެ.