މާދަމާގެ މަޖިލިސް ކޮމެޓީއަށް މަރުކަޒީ ބޭންކު, އެމްއެމްއޭގެ ގަވަރުނަރު އަލީ ހާޝިމާއި އޮޑިޓާ ޖެނެރަލް ހުސައިން ނިޔާޒުގެ އިތުރުން ކޮމިޝަނާ ޖެނެރަލް އޮފް ޓެކްސޭޝަން ހަސަން ޒަރީރު ހާޒިރުކުރުމަށް ނިންމައިފިއެވެ.
"ސަން"އަށް މައުލޫމާތު ލިބިފައި ވާގޮތުގައި މި ތިން ބޭފުޅުން ހާޒިރުކުރުމަށް ނިންމާފައި ވަނީ މިހާރު ރާއްޖޭގެ މާލީ ހާލަތު އޮތް ގޮތުގެ މައުލޫމާތު ސާފުކުރުމަށް ޓަކައެވެ.
މާދަމާގެ 11:00އަށް ތާވަލުކުރެވިފައިވާ ރައްޔިތުންގެ މަޖިލީހުގެ މާލިއްޔަތު ކޮމެޓީއަށް މި ބޭފުޅުން ހާޒިރުކުރުމަށް ނިންމާފައި ވަނީ އެ ބޭފުޅުންގެ ފަރާތުން މަޖިލީހުގެ ކޮމެޓީއިން ސާފުކުރަން ބޭނުންވާ މައުލޫމާތު ސާފުކުރުމަށެވެ.
ގަވަރުނަރު ހާޝިމް މާދަމާގެ ކޮމެޓީއަށް ހާޒިރު ކުރާއިރު އޭނާ ވަކި ކުރަން ރައީސް ޑރ. މުހައްމަދު މުއިއްޒަށް ލަފާ ދިނުމަށްވެސް މާލިއްޔަތު ކޮމިޓީން ވަނީ ފާސްކޮށްފައެވެ. މި މައްސަލަ މިހާރު އޮތީ މަޖިލީހުގެ ތަޅުމުގައެވެ.
ގަވަރުނަރު ހާޝިމް ވަކި ކުރުމަށް ހުށަހެޅުއްވީ ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމެވެ. މެމްބަރު ނާޒިމް ވަނީ ގަވަރުނަރު ވަކިކުރަން ލަފާ ދެނީ ގައުމުގެ އިގުތިސޯދު ހީނަރުވެ، އަލުން އަނބުރާ އިއާދަކުރަން އުނދަގޫ ހިސާބަކަށް ދިޔައިރު، އެމްއެމްއޭއަށް މަނިޓަރީ ޕޮލިސީ އޭގެ އެންމެ އެކަށޭނެ ގޮތުގައި ހިންގަމުންދާ ތަން ފެންނަމުން ނުދާތީ ކަމަށް ވިދާލުވެފައެވެ.