ބޮލީވުޑްގެ ފިލްމީ ތަރި ސިދާތު މަލްހޯތުރާގެ ނަމުގައި ސޯޝަލް މީޑިއާ މެދުވެރިކޮށް ބަޔަކު މީހުން ފައިސާ ހޯދަމުން ދާތީ އެ ކަމަށް ސަމާލުވެ ތިބުމަށް ސަޕޯޓަރުންގެ ގާތުން ސިދާތު އެދިއްޖެއެވެ.
ސިދާތު ވަނީ އަމިއްލަ ސޯޝަލް މީޑިއާ މެދުވެރިކޮށް މިކަމާ ގުޅިގެން ޚާއްސަ ބަޔާނެއް ވެސް ނެރެފައެވެ. މި ބަޔާނުގައި ބުނެފައިވާ ގޮތުން ސިދާތާއި އޭނާގެ އާއިލާ އަދި ސަޕޯޓަރުންގެ ނަމުގައި ބަޔަކު މީހުން އަންނަނީ ފައިސާ ހޯދުމަށް މަސައްކަތް ކުރަމުންނެވެ.
އެހެންނަމަވެސް، މިހާތަނަށް ސިދާތުގެ ޓީމުގެ ފަރާތުން ވެސް މިފަދަ އެއްވެސް މުއާމަލާތެއް އެއްވެސް މީހަކާ އެކު ކޮށްފައިނުވާނެ ކަމަށާއި ގޮތް ނޭނގޭ ބައެއްގެ ފަރާތުން އެފަދަ މެސެޖެއް ލިބިދާނެތީ އެކަމަށް ސަމާލުވުމަށް "ޝޭރްޝާހް"ގެ އެކްޓަރު ވަނީ އެދިފައެވެ.
ބަތަލާ ކިއާރާ އަދުވާނީގެ ފިރިމީހާގެ ސަމާލުކަމަށް މިކަން އައިސްފައިވަނީ އެމެރިކާއަށް ނިސްބަތްވާ ސިދާތުގެ ސަޕޯޓަރެއްގެ އަތުން 50 ލައްކަ ރުޕީސް ގެއްލި އެކަމުގެ ޒިންމާ ސިދާތުގެ ފޭން ޕޭޖުތައް ހިންގާ އިދާރީ މީހުންނަށް އަމާޒުކުރުމާ ގުޅިގެންނެވެ.
ސިދާތު މަލްހޯތުރާ އަންހެނުން ކިއާރާ އަދުވާނީއާ އެކު -- ފޮޓޯ/ވެރައިޓީ
ސިދާތުގެ ބަޔާނުގައި އެކްޓަރު ބުނެފައިވަނީ، ކެރިއަރުގައި ސާބިތުކަންމަތީ ދެމިހުރުމަށް އެންމެ ބޮޑު ހިތްވަރެއް ލިބެނީ ސަޕޯޓަރުންގެ ފަރާތުން ކަމަށާއި ސަޕޯޓަރުންނަށް އިތުބާރުކޮށް އެ މީހުންގެ ރައްކާތެރިކަން ކަށަވަރުކުރުމަކީ އެންމެ އިސްކަންދޭ ކަންކަން ކަމުގައެވެ.
ސިދާތު އެންމެ ފަހުން ބެލުންތެރިންނަށް ފެނިފައިވަނީ މި އަހަރު ރިލީޒްކުރި ފިލްމު "ޔޮދާ"އިންނެވެ. މީގެ އިތުރުން އެމޭޒަން ޕްރައިމްއިން ގެނެސްދިން ސީރީޒް "އިންޑިއަން ޕޮލިސް ފޯސް"ގެ ވެސް މުހިއްމު ރޯލަކުން ސިދާތު ވަނީ ފެނިފައެވެ.