ސެންޓްރަލް އެފްރިކަން ރިޕަބްލިކްގެ ތިން މިލިއަން ކުދިންނަކީ ދުނިޔޭގައި އެންމެ ހާލުގައި އުޅޭ، ހުރިހާ ޚިދުމަތަކުން މަހުރޫމުވެފައިވާ ކުދިން ކަމަށް އދގެ ކުޑަކުދިންނާބެހޭ އިދާރާ، ޔުނިސެފުން ބުނެފިއެވެ.
ކާބޯތަކެތި ނުލިބުމާއި، އެކަށީގެންވާ ސިއްހީ ފަރުވާ ނުލިބުމުގެ އިތުރުން ގައުމަށް ކުރިމަތިވެފައިވާ ހަމަނުޖެހުންތަކުގެ ސަބަބުން އެފްރިކާއަކީ އިންސާނީ ކާރިސާ އެންމެ ބޮޑު އެއް ގައުމަށް ވެފައިވާ ކަމަށްވެސް ޔުނިސެފުން ބުނެއެވެ.
އެ ގައުމުގެ ދެބައިކުޅަ އެއްބައި ކުދިންނަށް ސިއްހީ ހިދުމަތް ނުލިބޭއިރު، ގާތްގަނޑަކަށް 40 އިންސައްތަ ކުދިންނަށް ދިގު މުއްދަތަކަށް ކާނާ ލިބުން ވަނީ ދަތިވެފައެވެ. ސާފު ފެނާއި، ސާފުތާހިރުކަން ނުވަތަ ދުޅަހެޔޮ ކާނާ ލިބެނީ މަދު ބަޔަކަށެވެ.
ޖެނީވާގައި ނޫސްވެރިންނާ ވާހަކަ ދައްކަވަމުން ސެންޓްރަލް އެފްރިކަން ރިޕަބްލިކް (ސީއޭއާރު) ގައި ހުންނަ ޔުނިސެފްގެ މަންދޫބު މެރިޓްސެލް ރެލާނޯ އަރާނާ ވިދާޅުވީ ޣައްޒާގެ ހަނގުރާމައާއި އެހެނިހެން ހަމަނުޖެހުންތަކަށް ދުނިޔޭގެ ސަމާލުކަން ދިނުމުން ހާލުގައި ޖެހިފައިވާ އެފްރިކާ ކުދިންނަށް ލިބޭ ސަމާލުކަން ވަނީ ވަރަށް ބޮޑަށް ކުޑަވެފައެވެ.
ދުނިޔޭގެ އެންމެ ފަގީރު އެއް ގައުމު ކަމަށްވާ އެފްރިކާގައި ހިނގާ އަނިޔާވެރިކަން ފެށުނީ 2019 ވަނަ އަހަރުގެ ފެބްރުއަރީ މަހު ސަރުކާރާއި ހަތިޔާރު އެޅި 14 ޖަމާއަތަކާ ދެމެދު ސުލްހައިގެ އެއްބަސްވުމެއް އޮތް ނަމަވެސް އެކަމުގައި ސަރުކާރުގެ ކޮންޓްރޯލު ނެތިގެންދިޔަ ހިސާބުންނެވެ.