އިންގްލިޝް ޕްރިމިއާ ލީގުން ނިމިދިޔަ ސީޒަންގައި ރެލިގޭޓްވި ލޫޓަން ޓައުންގެ މެދުތެރެއިން މުހިންމު ދައުރެއް އަދާކުރި ރޮސް ބާކްލީ, ޕްރިމިއާ ލީގުގެ އެސްޓަން ވިލާއަށް ސޮއިކޮށްފިއެވެ.
ބާކްލީވަނީ 2020-2021 ވަނަ އަހަރުގެ ސީޒަންގައި ޗެލްސީގެ ކުޅުންތެރިއެއްގެ ގޮތުގައި ހުރިއިރު ވިލާއަށް ލޯން އެއްބަސްވުމެއްގެ ދަށުން ކުޅެފައެވެ. އެހެންކަމުން ބާކްލީއަށް ވިލާއަކީ އާ ޓީމަކަށް ނުވާނެއެވެ.
ބާކްލީވަނީ މިދިޔަ ސީޒަންގައި ލޫޓަންއަށް ޕްރިމިއާ ލީގުގެ 32 މެޗުގައި ކުޅެފައެެވެ. ލޫޓަންގެ ކޯޗު ރޮބް އެޑްވާޑްސް ބުނީ ބާކްލީއާއެކު އެއް އަހަރު މަސައްކަތް ކުރަން ލިބުމުން ހިތްހަމަ ޖެހޭ ކަމަށެވެ. އަދި ބާކްލީ އަކީ އިންގްލަންޑް ޓީމުން ޖާގަހޯދުމަށް އަދިވެސް އުންމީދު ކުރާ ކުޅުންތެރިއެއް ކަމަށާއި އެހެންކަމުން އެޖާގަހޯދުމަށް ފުރުސަތު އޮތީ ޕްރިމިއާ ލީގުގައި ކުޅެގެންކަމުން އޭނާ އެގޮތަށް ނިންމީ ކަމަށެވެ. އަދި މިކަން ކްލަބްގެ ހުރިހާ ފަރާތްތަކުންވެސް ގަބޫލު ކުރާނެކަމަށް އޭނާ ބުންޏެވެ.
އެވަޓަންއިން ކުޅެން ފެށި ބާކްލީ ވަނީ އެޓީމަށް އަށް އަހަރުގެ ތެރޭގައި 150 މެޗު ކުޅެފައެވެ. އޭނާ ޗެލްސީއާ ގުޅުނީ 2018 ވަނަ އަހަރު 15 މިލިއަން ޕައުންޑްގެ އަގަކަށެވެ. އަދި ޗެލްސީގައި ހޭދަކުރި ފަސް އަހަރު އޭނާވަނީ 100 މެޗު އެޓީމަށް ކުޅެދީފައެވެ. ލޫޓަންއަށް ބަދަލުވުމުގެ ކުރިން ބާކްލީވަނީ ފްރެންޗް ލީގު އާންގެ ނީސްއަށް ވެސް އެއް ސީޒަންގައި ކުޅެފައެވެ.
ވިލާއިންވަނީ އިޓާލިއަން ސެރީއާގެ ޔުވެންޓަސްއަށް ކުޅޭ ސެމިއުލް އީލިން ޖޫނިއާ އާއި އެންޒޯ ބަރެނޭޗިއާ ވެސް އެޓީމަށް ގެންގޮސްފައެވެ. މިދެކުޅުންތެރިން ވިލާއަށް ސޮއިކޮށްފައިވަނީ 22 މިލިއަން ޔޫރޯގެ އަގަކަށެވެ.
މިދެކުޅުންތެރިން ވިލާއަށް ގެންގޮސްފައި ވަނީ ވިލާގެ މެދުތެރެއިން ފާހަގަ ކޮށްލެވޭ ކުޅުމެއް މިދިޔަ ސީޒަންގައި ދެއްކި ޑަގްލަސް ލުއިޒް ޔުވޭއަށް ގެންދިޔަތާ އެއް ދުވަސް ފަހުންނެވެ.
މިދިޔަ ހުކުރު ދުވަހު ވިލާއިންވަނީ ޗެލްސީއަށް ކުޅެމުންދިޔަ އިއާން މާޓްސެންވެސް އެޓީމަށް ގެންގޮސްފައެވެ.