ބަތަލާ ކަރީނާ ކަޕޫރު ޚާން މުހިންމު ރޯލް ކުޅެފައިވާ ކްރައިމް ތުރިލާ ފިލްމު "ދަ ބަކިންގްހަމް މާޑާސް" މި އަހަރުގެ ސެޕްޓެމްބަރު މަހު ސިނަމާތަކަށް ގެންނަން ނިންމާފައިވާކަން އިއުލާނުކޮށްފިއެވެ.
މަގުބޫލު ޑައިރެކްޓަރު ހަންސަލް މެހެތާގެ މި މާޑާ-މިސްޓްރީ ފިލްމުގެ ޕްރޮޑިއުސަރަކީ ކަރީނާ ދާދި ފަހުން މުހިއްމު ރޯލެއް ކުޅުނު ފިލްމު "ކްރޫ"ގެ ޕްރޮޑިއުސަރު އެކްތާ ކަޕޫރެވެ. އެކްތާއާ އެކު މިހާތަނަށް މަސައްކަތްކުރި ދެ ފިލްމަކީ ހެއްވާ މަޖާ ހާދިސާތައް އެކުލެވޭ ދެ ފިލްމަށްވީ ނަމަވެސް ފިލްމު "ދަ ބަކިންގްހަމް މާޑާސް"އަކީ ވަރަށް ސީރިއަސް ހާދިސާތައް ދައްކުވައިދޭ ނާޒުކު ފިލްމެކެވެ.
ކަރީނާ ކަޕޫރު ޚާން،ޑައިރެކްޓަރު ހަންސަލް މެހެތާ އަދި ޕްރޮޑިއުސަރު އެކްތާ ކަޕޫރު --- ފޮޓޯ/ބޮލީވުޑްހަންގާމާ
މިދިޔަ އަހަރު އިނގިރޭސިވިލާތުގެ ލަންޑަންގައި ބޭއްވި ބީއެފްއައި ލަންޑަން ފެސްޓިވަލުގައި މި ފިލްމު ސްކްރީން ކުރުމާ އެކު ވަރަށް ގިނަ ބައެއްގެ ތައުރީފު ފިލްމަށް ލިބުނެވެ. އޭރު ފިލްމުގެ ޕޯސްޓަރުތަކާ އެކު މި ފިލްމުގެ ބައެއް މަންޒަރުތައް އިންޓަނެޓުގައި ދައުރުވާން ފެށުމުން ފިލްމު ބަލަން ވަރަށް ބޮޑު ޝައުގުވެރިކަމެއް އާއްމުން ފާޅުކުރިއެވެ.
ކަރީނާގެ އިތުރުން އޭޝް ޓަންޑަން އަދި ސެލެބްރިޓީ ޝެފް ރަންވީރު ބްރާ މުހިންމު ރޯލުތަކުން ފެންނާނެ "ދަ ބަކިންގްހަމް މާޑާސް" ސިނަމާތަކަށް ގެންނަން ނިންމާފައިވަނީ ސެޕްޓެމްބަރު މަހުގެ 13ވަނަ ދުވަހުއެވެ.