ސަރުކާރުގެ ކުންފުންޏެއް ކަމަށްވާ ރޯޑް ޑިވޮލޮޕްމެންޓް ކޯޕަރޭޝަން (އާރުޑީސީ)އިން ބައެއް މުވައްޒަފުން ވަކިކުރުމަށް ނިންމައިފިއެވެ.
މިކަމާ ގުޅިގެން "ސަން"އަށް މައުލޫމާތު ދެއްވަމުން އާރުޑީސީގެ މީޑިއާ އޮފިޝަލަކު ވިދާޅުވީ އާރުޑީސީގެ ހުޅުމާލޭ ފެސިލިޓީގެ މުވައްޒަފުންގެ ތެރެއިން މިވަގުތު ކުންފުންޏަށް ބޭނުންވާ މުވައްޒަފުން ފިޔަވައި އެހެން މުވައްޒަފުން ވަކި ކުރުމަށް ނިންމާފައިވާ ކަމަށެވެ.
އޭނާ ވިދާޅުވީ ހުޅުމާލޭގެ ފެސިލިޓީގައި ހިންގަމުންދާ އެކޮމަޑޭޝަން ފެސިލިޓީގެ މެނޭޖްމެންޓްގެ މަސައްކަތްތައް ހުއްޓާލަން ނިންމާފައިވާ ކަމަށާއި އެއީ ސަރުކާރުގެ ޕްރޮޖެކްޓްތަކަށް ބޭނުންކުރަން ނިންމާފައިވާ ބިމެއް ކަމަށެވެ.
އެ ފެސިލިޓީގައި ހިންގަމުން އައި ވިޔަފާރިއަކީ ގެއްލުމުގައި ހިންގަމުން އައި ވިޔަފާރިއެއް ކަމަށް ވެސް އޮފިޝަލް ވިދާޅުވިއެވެ.
އާރުޑީސީގެ މުވައްޒަފުންތަކަކަށް ފޮނުވާފައިވާ މެމޯގައިވާ ގޮތުން އެ މުވައްޒަފުން ވަކިކުރަނީ ވަޒީފާއާ ބެހޭ ގާނޫނުގެ 21 ވަނަ މާއްދާއަށް ރިއާޔަތްކޮށެވެ. އެ މާއްދާގައި ވާގޮތުން ވަޒީފާދޭ ފަރާތުގެ މާލީ ހާލަތު ދަށްވުމާ ގުޅިގެން މަގާމެއް އުނިކުރަންޖެހުމުގެ ސަބަބުން މުވައްޒަފަކު ވަޒީފާއިން ވަކިކުރުމަކީ އެކަށީގެންވާ ސަބަބެއް ކަމުގައި ބެލެވެއެވެ.
ނަމަވެސް މިގޮތަށް ވަޒީފާއިން ވަކި ކުރާނަމަ އެ މުވައްޒަފަކު ވަޒީފާގައި ޚިދުމަތްކޮށްފައިވާ މުއްދަތަށް އެއް އަހަރު ފުރިފައިނުވާ ނަމަ އެއް މަސްދުވަހުގެ ނޯޓިސް ނުވަތަ ނޯޓިސްގެ މުއްދަތަށްވާ ފައިސާ ދޭންޖެހޭނެއެވެ.
އާރްޑީސީއަކީ ފެށުނީއްސުރެ ގެއްލުމުގައި ހިންގަމުން އަންނަ ކުންފުންޏެކެވެ.