ނެޓްފްލިކްސްއިން މިހާތަނަށް އުފައްދާ އެންމެ އަގުބޮޑު ފިލްމުގެ ބަޖެޓު 300 މިލިއަން ޑޮލަރު ފަހަނަ އަޅައި ގޮސް, އަދިވެސް ބޮޑުވަމުންދާ ކަމަށް ޕްރޮޑަކްޝަނުން ބުނެފިއެވެ.
ނެޓްފްލިކްސްއިން ތައްޔާރުކުރަމުން އަންނަ ފިލްމު "އިލެކްޓްރިކް ސްޓޭޓް"ގެ މަސައްކަތް ކުރިއަށްދާއިރު ފިލްމުގެ ބަޖެޓު އަންނަނީ ދުވަހެއް ދުވަހަކަށް ބޮޑުވަމުންނެވެ.
މި ފިލްމުގެ ޕްރޮޑަކްޝަނުން ބުނާގޮތުގައި ފިލްމުގެ ބަޖެޓު މިހާރު ވަނީ 320 މިލިއަން ޑޮލަރަށް އަރާފައެވެ. މި އަދަދާއެކު މިހާތަނަށް އުފެއްދި އެންމެ އަގުބޮޑު ފިލްމުތަކުގެ ލިސްޓުގެ ތެރޭގައި މި ފިލްމުވެސް ހިމެނޭނެއެވެ.
މި ފިލްމުގެ ޕްރޮޑަކްޝަނުގައި ހިމެނެނީ މާވެލްގެ ތަފާތު ހިޓު ފިލްމުތައް އުފައްދާފައިވާ ރުސޯ ދެބެންނެވެ. މި ދެބެން މަސައްކަތް ކުރަމުން އަންނަ އިލެކްޓްރިކް ސިޓީ އަކީ ނެޓްފްލިކްސްއަށް ވަރަށް ބޮޑު ޕްރޮޖެކްޓެކެވެ.
ސައިފައި އެކްޝަން ފިލްމެއްގެ ގޮތުގައި ތައްޔާރުކުރާ މި ފިލްމުގެ މަސައްކަތް ކުރަމުން އަންނަތާ މިހާރު ހަތް އަހަރަށް ވުރެ ގިނަ ދުވަސް ވެއްޖެއެވެ.
މި ފިލްމުގެ ބަޖެޓު އެހާ ބޮޑު އިރު ކާސްޓުންގެ ތެރޭގައި ވެސް ގިނަ އަދަދަކަށް އޭލިސްޓު ތަރީން ހިމެނެއެވެ. އެގޮތުން ލީޑް އެކްޓަރުގެ ގޮތުގައި ހިމެނެނީ އެންމެ އަގުބޮޑު ޒުވާން އެކްޓަރު މިލީ ބޮބީ ބްރައުން އެވެ.
އޭގެ އިތުރުން ފިލްމުން ފެންނާނީ ކްރިސް ޕްރެޓް އާއި ކޭ ހުއައި ކުއާން އާއި މިޝެލް ޔޯ އާއި އެންތަނީ މެކީގެ އިތުރުން ޖިއަންކާލޯ އެސްޕަސީތޯ އަދި ސްޓެންލީ ޓުޗީ އެވެ.
މި ފިލްމުގައި ފެންނާނީ އާދަޔާ ޚިލާފު ބޮޑު ރޮބޮޓަކާއި ޒުވާނަކާއި އޭނާގެ އެކުވެރިން އެކި ސަރަހައްދުތައް ބަލައި، ތަފާތު އެކި ސިއްރުތައް ހޯދުމުގައި އުޅޭ މަންޒަރެވެ. ނެޓްފްލިކްސްއިން ހާމަކުރާގޮތުގައި މި އަހަރުގެ ތެރޭގައި ފިލްމު ރިލީޒް ކުރާނެއެވެ. ނަމަވެސް ފިލްމު ރިލީޒްކުރާ ސީދާ ތާރީޚެއް ނުބުނެއެވެ. އަދި ފިލްމުގެ އެއްވެސް މަންޒަރެއްވެސް މިހާތަނަށް ހާމަކޮށްފައެއް ނުވެއެވެ.