ކެނެޑާގައި ކާރު ވަގަށް ނެގުމުގެ މައްސަލަ އިތުރުވާން ފަށައިފިއެވެ.
ފާއިތުވި މަސްތަކުގައި އެ ގައުމުގެ އެންމެ އާބާދީ ބޮޑު ދެ ޕްރޮވިންސް ކަމަށްވާ، ކިއުބެކް އާއި އޮންޓާރިއޯގެ ބޮޑެތި ސިޓީތަކުން އެތައް ހާސް ކާރެއް ވަނީ ވަގަށް ނަގައިފައެވެ.
އޭގެ ތެރެއިން ގިނަ ކާރުތައް ފަހުން ފެނިފައި ވަނީ އެފްރިކާ، އޭޝިއާ، ޔޫރަޕް އަދި މެދުއިރުމަތިންނެވެ. ކާރުތަކުގައި ހަރުކޮށްފައި ހުރި ޓްރެކް ޑިވައިސްތަކާއި ސެންސާތައް ބޭނުންކޮށްގެންވެސް ބައެއް ކާރުތައް ވަނީ ހޯދައިފައެވެ.
ފުލުހުންގެ އެންމެ ފަހުގެ ތަފާސް ހިސާބުތަކަށް ބަލާއިރު އެންމެ ބޮޑަށް އަމާޒުކޮށްފައިވަނީ މޮންޓްރިއަލް އާއި ޓޮރޮންޓޯއަށެވެ.
ޓޮރޮންޓޯގައި 2021 އާއި 2023 އާ ދެމެދު ކާރުތަކާއި ލައިޓް ޓްރަކްތަކުގެ ވައްކަންތައް ވޭތުވެދިޔަ ހަ އަހަރު ދުވަހުގެ ތެރޭގައި 150 އިންސައްތަ އިތުރުވެފައިވެއެވެ. ހަމަ އެ މުއްދަތުގައި ކިއުބެކްގައި 58 އިންސައްތަ އަދި އޮންޓޭރިއޯގައި 48 އިންސައްތައަށް ވައްކަން އިތުރުވެފައިވެއެވެ.
ކާރުތައް ގިނައިން ވަގަށް ނަގާފައިވަނީ ރޭގަނޑު މީހުން ނިދާފަތި ތިބޭ ގަޑިތަކުގައި ކަމަށާއި ބައެއް ފަހަރު ބަޑިން ބިރުދައްކައިގެންވެސް ފޭރޭ ކަމަށް ފުލުހުން ބުނެއެވެ.
ތަޖުރިބާކާރުން ވިދާޅުވާ ގޮތުގައި ކާރު ވަގަށް ނެގުމުގެ މައްސަލަ އިތުރުވީ، ކޯވިޑުގެ ބަލިމަޑުކަމުގެ ދުވަސްވަރު، ރައްކާތެރިވުމަށް އަޅައިފައިވާ ފިޔަވަޅުތަކުގެ ސަބަބުން އެއްގަމު އުޅަނދު އުފައްދާ މިންވަރު ދަށްކުރުމުންނެވެ.
އެ މައްސަލައާ ގުޅިގެން މީގެ ހަފްތާއެއްހާ ދުވަސް ކުރިން ކެނެޑާގެ ފުލުހުންނާއި ސަރުކާރު ގުޅިގެން ވަނީ ސަމިޓެއް ވެސް ކުރިއަށްގެންގޮސްފައެވެ. އެ ސަމިޓްގައި ބޮޑުވަޒީރު ޖަސްޓިން ޓްރޫޑޯގެ ވަނީ ކީ ހެކިން ޑިވައިސްތައް ވިއްކުމާއި ބޭނުންކުރުމަކީ ގާނޫނާ ހިލާފު ކަމެއް ކަމަށް ކަނޑައަޅާނެ ކަމަށް ވިދާޅުވެފައެވެ.
އަދި ކާރު ވަގަށް ނަގާ މީހުންނަށް ހަރުކަށި އަދަބު ދިނުމާއި ކެނެޑާގެ ބޯޑާ އެޖެންސީއަށް އިތުރު ވަސީލަތްތަކެއް ދޭނެ ކަމަށް ވެސް ޓްރޫޑޯ އިއުލާން ކުރެއްވިއެވެ.