ގއ. ނިލަންދޫ ސިއްހީ މަރުކަޒު އަބަދު ހުންނަނީ ލައްޕާފައި ކަމަށް ބުނެ އެރަށު ބައެއް މީހުން ނުރުހުން ފާޅުކޮށްފިއެވެ.
ނިލަންދޫ މީހުން ބުނަނީ އެ ރަށު ސިއްހީ މަރުކަޒު ހުންނަނީ އަބަދު ލައްޕާފަ ކަމަށާއި އެކަށީގެންވާ ބޭސްފަރުވާ އެ ރަށުން ނުލިބޭ ކަމަށެވެ.
"ކޮންމެ ބައްޔެއްވެގެން ދިޔައަސް ދެނީ އަފަމޯލް ގުޅައެއް. ޓެސްޓްތަކެއް ވެސް ނުހެދޭ" އެ ރަށުގެ މީހަކު "ސަން"އަށް މައުލޫމާތު ދެމުން ބުންޏެވެ.
އެ ރަށު މީހުން ބުނީ ބަލިވެގެން ސިއްޙީ މަރުކަޒަށް ދާއިރު މަރުކަޒު ލައްޕާފައި ހުންނާތީ އެތައް އުނދަގުލަކާ ކުރިމަތިވާ ކަމަށެވެ.
ރަށުން ބޭސްފަރުވާއާއި އެހެނިހެން ޚިދުމަތްތައް ރަނގަޅަށް ނުލިބޭތީވެ ނިލަންދޫގެ ގިނަ ބަޔަކުވަނީ މާލެއަށް ދިރުއުޅުން ބަދަލުކޮށްފައެވެ.
އެގޮތަށް ދިރިއުޅުން ބަދަލުކުރި ނިލަންދޫއަށް ނިސްބަތްވާ މީހަކާ ސުވާލުކުރުމުން ބުނީ ރަށުގައި އުޅެން މާ ބޭނުންވާ ކަމަށެވެ. ނަމަވެސް މާލެ ބަދަލުވާން ޖެހުނީ ރަށުން ލިބެންޖެހޭ ޒަރޫރީ ބޭނުންތައް، ޚާއްސަކޮށް ބޭސް ފަރުވާގެ ޚިދުމަތް ނުލިބޭތީ ކަމަށެވެ.
"ރަށުގައި ހުންނަނީ އަށް ގަޑިއިރު ހުޅުވާ ސިއްހީ މަރުކަޒެއް. އެތަން ހުންނާނީ އަބަދު ލައްޕާފައި، އަށް ގަޑިއިރު އެކަންޏެއް ނޫން މީހުން ބަލިވަނީ އެއް. ބޭނުންވަނީ 24 ގަޑިއިރު ޚިދުމަތްދޭ ހޮސްޕިޓަލެއް ރަށުގައި ހުރުން،" އޭނާ ބުންޏެވެ.
މި ކަމާ ގުޅިގެން އެ ރަށު ސިއްޙީ މަރުކަޒުގެ އިދާރީ މުވައްޒަފަކާ ގުޅުމުން ބުނީ މިނިސްޓަރީގެ ގަވައިދުގެ ދަށުން އަށް ގަޑިއިރު އެރަށުގެ ސިއްހީ މަރުކަޒު ހުޅުވާ ކަމަށާއި، ލެބޯޓަރީއާ ނުލާ އާންމު ޚިދުމަތްތައް އެ މަރުކަޒުން ދެމުންދާ ކަމަށެވެ.
އަދި ރަސްމީ ގަޑީގެ އިތުރުން އެއްގަޑި އިރު މަރުކަޒު ހުޅުވާކަމަށާއި އަދި އޮންކޯލް އެމަޖެންސީތަކުގައި މަރުކަޒު ގަވައިދުން ހުޅުވަމުންދާ ކަމަށް މަރުކަޒުގެ އިދާރީ ބޭފުޅަކު މައުލޫމާތު ދިނެވެ.
ގއ. ނިލަންދޫގެ މުޅި ޖުމުލަ އާބާދީއަކީ 1240 މީހުން ނަމަވެސް ރަށުގައި ދިރިއުޅެނީ ގާތްގަނޑަކަށް 572 މީހުންނެވެ. ރަށުން ލިބޭ ހިދުމަތްތަކަށް ބަލާއިރު، ގުރޭޑް 10 އަކާ ހަމައަށް ކިޔަވައިދޭ ސްކޫލަކާއި، މެޖިސްޓްރޭޓް ކޯޓެއްގެ އިތުރުން ޕޮލިސް ޕޯސްޓެއް ރަށުގައި ހުރެއެވެ.