މި ސަރުކާރުގެ ސިޔާސަތަކީ ދަނޑުވެރިކަމުގެ ސިނާއަތަކީ ރާއްޖޭގައި ފުޅާކުރެވޭ ސިނާއަތަކަށް ހެދުން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ ގއ. ނިލަންދޫއަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ.
ރަމަޟާން މަސް އައުމުގެ ކުރިން، ދަނޑުވެރިކަމުގެ ބާވަތްތައް ފަސޭހަ ނިޒާމެއްގެ ތެރެއިން ވިކޭނެ ގޮތް ހަދައިދިނުމަކީ ނިލަންދޫ ރައްޔިތުން ވަރަށް ބޮޑަށް އެދިފައިވާ ކަމެކެވެ.
ރައީސް ވިދާޅުވީ އެގްރޯނެޓް ނުއުވޭ ކަމަށާއި، އެ ނިޒާމުގެ ތެރެއިން ރާއްޖޭގެ ދަނޑުވެރިކަން ސިންދަފާތުކޮށް, އިތުރަށް ކުރިއެރުވުމުގެ މަސައްކަތަށް ސަރުކާރުން ވަރަށް ބޮޑު އިސްކަމެއް ދޭ ކަމަށެވެ.
އެ ގޮތުން ރާއްޖޭގައި އުފެއްދޭ ކާބޯތަކެތީގެ ބާވަތްތައް ރާއްޖެއަށް ބޭނުންވާ ވަރަށް އުފެއްދުމަށް ވެސް ސަރުކާރުން މަސައްކަތްތަކެއް ކުރަމުންދާ ކަމަށް ރައީސް ވިދާޅުވިއެވެ.
އެ ކަމުގެ އިންވެސްޓްމަންޓުތަކަށް ފުރުސަތު ދީގެން، އެ މަސައްކަތް ވަރަށް ބާރަށް ކުރަމުން އަންނަ ކަމަށް ރައީސް ވަނީ ވިދާޅުވެފައެވެ.
"...ދަނޑުވެރިންނަށް އޮތީ އުފާ ފާގަތިކަން ރާއްޖޭގައި. ދަނޑުވެރިކަމުގެ ސިނާއަތް މިއަދާ ހަމަޔަށް އޮތް ހިސާބަށްވުރެ އިތުރަށް ރަނގަޅުކޮށް، ދަނޑުވެރިކަން އެއީ ރާއްޖޭގައި ހަމަ ވަރަށް ރަނގަޅަކަށް ފުޅާކުރެވޭ ސިނާއަތަކަށް ހެދުން އެއީ އަޅުގަނޑުމެންގެ މައިގަނޑި ސިޔާސަތު," ރައީސް ވިދާޅުވިއެވެ.
ދަނޑުވެެރިކަމަށް ޚާއްސަ ސަރުކާރުގެ ވުޒާރާއެއް އޮންނައިރު، އެ ވުޒާރާގެ ފަރާތުން އެ ސިނާއަތް ކުރިއެރުވުމަށް މަސައްކަތް ކުރަމުން އަންނަކަމަށް ރައީސް ވިދާޅުވިއެވެ. އެ ގޮތުން އެ މަނިކުފާނުވަނީ ނިލަންދޫއާއި މުޅި ރާއްޖޭގެ ހުރިހާ ދަނޑުވެރިން ހިމެނޭގޮތަށް، މި ޔަގީންކަން އަރުވައިފައެވެ.
މިދިޔަ ސަރުކާރުގައި ދަނޑުވެރިކަމާ ގުޅޭ މަސައްކަތްތައް ކުރަން އުފައްދާފައިވާ އެގްރޯނެޓް އުވާލައި، އެ ކުންފުނީގެ މަސައްކަތްތައް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑާ ހަވާލުކުރަން މި ސަރުކާރުން ކުރިން ވަނީ ނިންމައިފައެވެ.