ދިރާގުގެ އެމްބެސެޑަރަކަށް ޒުވާން ރާޅާއެރުންތެރިޔާ ކަޔާން ހަމަޖައްސައިފިއެވެ.
އާޓިފިޝަލް ބީޗުގައި މިއަދު ބޭއްވި ހާއްސަ ހަރަކާތެއްގައި ކަޔާނަށް ރަސްމީކޮށް ބްރޭންޑް އެމްބެސެޑަރުކަން ހަވާލުކޮށްދެއްވީ ދިރާގުގެ ބްރޭންޑް އެންޑް މާކެޓިން ކޮމިއުނިކޭޝަންސް ޑިރެކްޓަރު މުހައްމަދު މިރުޝާން ހަސަން އެވެ.
ކަޔާނަކީ ރާޅާއެރުމުގެ ކުރިއަރަމުން އަންނަ ތަރިއެކެވެ. އެގޮތުން، އޭނާއަކީ މިހާރު ރާއްޖޭގެ 18 އަހަރުން ދަށުގެ އެއްވަނައިގައި އޮތް ރާޅާ އެރުންތެރިޔާ އަދި ޖޫނިއާ ކެޓަގަރީން ތިން ޗެމްޕިއަންކަން ހޯދާފައިވާ ތަރިއެކެވެ.
މިއަދު ބޭއްވި ހަރަކާތުގައި ދިރާގުގެ ބްރޭންޑް އެންޑް މާކެޓިން ކޮމިއުނިކޭޝަން ޑިރެކްޓާ މުހައްމަދު މިރުޝާން ހަސަން ވިދާޅުވީ އެމްބެސެޑަރުކަން ކަޔާން ފަދަ ކުރިއަރަމުން އަންނަ ހުނަރުވެރި ޒުވާނަކަށް ލިބުމަކީ އެ ކުންފުންޏަށް ލިބުނު ޝަރަފެއް ކަމަށެވެ.
އޭނާ އިތުރަށް ފާހަގަކުރެއްވި ގޮތުގައި ކުންފުނިން ޒުވާނުން ބާރުވެރިކުރުވުމަށް ވަރަށް ބޮޑަށް އަހަންމިއްޔަތުކަންދޭ ކަމަށާއި އެންމެ ރަނގަޅު ގޮތުގައި ދެމިހުރުމަށް ކަޔާންގެ މަސައްކަތްތައް ކުރިއަށް ގެންދިއުމަށް ހިތްވަރު ދެއްވިއެވެ.
ދިރާގުން ވަނީ މިއަހަރުގެ ދުނިޔޭގެ ކަނޑުތަކުގެ ދުވަހުގެ މުނާސަބަތުގައި ކުޑަކުދިންގެ ރާޅާއެޅުމުގެ ހަރަކާތެއް ވެސް އާޓިފިޝަލް ބީޗުގައި މިއަދު ބާއްވައިފައެވެ.
ދިރާގުން ކަނޑުތަކުގެ ދުވަހުގެ މުނާސަބަތުގައި ބޭއްވި ކުޑަކުދިންގެ ރާޅާއެޅުމުގެ ކްލިނިކް ޕްރޮގްރާމްގެ ތެރެއިން--- ފޮޓޯ: ދިރާގު
މޯލްޑިވްސް ސާފިންް އެސޯސިއޭޝަން (އެމްއެސްއޭ) އިން އެންޑޯސްކޮށްފައިވާ މި ސްޕެޝަލް ސާފް ކްލިނިކް ކުރިއަށް ގެންގޮސްފައިވަނީ ޔޫތު ބްރޭންޑްގެ އާ އެމްބެސެޑަރު ކަޔާނާ އެކުގައެވެ.
މި ސެޝަން މެދުވެރިކޮށް ޒުވާން ބައިވެރިންނަށް ކަނޑާ ބެހޭ މައުލޫމާތު ލިބިގެން ދިޔައެވެ. މީގެ އިތުރުން ތަފާތު ރާޅާއެޅުމުގެ ޕޮއިންޓްތަކާއި ރައްކާތެރިކަމުގެ އިރުޝާދުތައް ކިޔައިދިނެވެ.
މިދިޔަ މަހު ދިރާގުން ވަނީ އެކުންފުނީގެ ބްރޭންޑް އެމްބެސެޑަރުކަން، އޮލިމްޕިކްސްއަށް ކޮލިފައިވުމުގެ ޝަރަފު ރާއްޖޭން ފުރަތަމަ ފަހަރަށް ހޯދި ޓޭބަލް ޓެނިސް ތަރި ފާތިމަތު ދީމާ ޢަލީއަށް ދީފައެވެ.
ދިރާގުގެ ބްރޭންޑް އެމްބެސެޑާޝިޕް ޕްރޮގްރާމް ކުރިއަށް ގެންދާތާ ދިހަވަރަކަށް އަހަރަށްވުރެ ގިނަ ދުވަސް ވެފައިވާއިރު، މި ޕްރޮގްރާމްއަކީ މުޖުތަމަޢުގެ ފާހަގަކޮށްލެވޭ ބައެއް ފަރާތްތަކާ ގުޅިގެން ކުރިއަށް ގެންދާ ޕްރޮގްރާމެއް ކަމަށް އެކުންފުނިން ބުނެއެވެ.
އޭގެ ތެރޭގައި އަހުމަދު ނާޝިދު (ޒީރޯ ޑިގްރީ)، އިބްރާހިމް އަރީފް (ސާފާ)، އަބްދުލް ގަފޫރު އަލީ (ގައްބެ)، ހަސަން ސައީދު،ޒޫނާ ނަސީމް (ޒޫންޓީ) އާއި އިތުރު އެތައް ބައެއް މީހުން ހިމެނޭކަމަށް ދިރާގުން ބުންޏެވެ.