ރައްޔިތުންނަށް ބޭނުންވާ ޒަރޫރީ އެތައް ކަމެއް ފުރިހަމަނުވެ ހުއްޓައި، ނިކަމެތިން ޙައްޖަށް ފޮނުވަން ސަރުކާރުގެ ބައިތުލްމާލުން ނުވަތަ ޒަކާތު ފައިސާއިން ޚަރަދުކޮށްގެން ނުވާނެ ކަމަށް މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒް އަބްދުއްލަތީފް މިއަދު ވިދާޅުވެއްޖެއެވެ.
ސަރުކާރުން ހިލޭ ޙައްޖަށް ފޮނުވަން ނިންމި 1،000 މީހުންގެ ތެރެއިން މި އަހަރު ފުރާ 50 މީހުން މިއަދު ޙައްޖަށް ފުރައިފިއެވެ.
އެ ކަމާ ގުޅިގެން 'ސަން'އާ ވާހަކަދައްކަވަމުން އިޔާޒް ވިދާޅުވީ، ޙައްޖު ވާޖިބުވެގެންވަނީ އެ ކަމަށް ތަނަވަސްކަމާއި ސިއްހީ ގޮތުންނާއި އަދި އެ ނޫން ވެސް ގޮތްގޮތުން މަގުފަހިވެފައި އޮތް މީހުންނަށް ކަމަށެވެ. އެއީ، ކޮންމެ މީހަކު މަރުވުމުގެ ކުރިން ކޮންމެހެން އަދާކުރަންޖެހޭ ވާޖިބެއް ނޫން ކަމަށް ވެސް އޭނާ ވިދާޅުވިއެވެ.
"ކީރިތި ގުރުއާނުގައި ﷲ ވަހީކުރައްވަނީ ޙައްޖު ވާޖިބުވެގެންވަނީ އެ ކަމުގެ ތަނަވަސްކަން ލިބިގެންވާ މީހުންނަށް. މުދަލާއި ފައިސާގެ ގޮތުން ވެސް، އަދި ސިއްޙީ ގޮތުން ވެސް އަދި ދަތުރުކުރުމުގެ މަގު ވެސް. މި ހުރިހާ ގޮތަކުން އެ ކަމަށް މަގު ތަނަވަސްވެގެންވާ މީހުން. އެއީކީ އެއްވެސް ހާލެއްގައި ސަލާންޖަހައިގެން ލޯން ނަގައިގެން މީހުންގެ އެހީތެރިކަން ހޯދައިގެން ކުރަންޖެހޭ ކަމެއް ނޫން،" އިޔާޒް ވިދާޅުވިއެވެ.
އޭނާ ވިދާޅުވީ، ދައުލަތުގެ ޚަރަދުގައި މީހުން ޙައްޖަށް ފޮނުވާނީ ދައުލަތަކީ ވަރަށް ފުދުންތެރި ދައުލަތެއް ކަމުގައިވާނަމަ ކަމަށެވެ.
އެކަމަކު، ރާއްޖެ މިހާރު ވެސް އޮތީ އިގުތިސާދީ ގޮތުން ދަތި ހާލަތެއްގައިކަން ފާހަގަކުރައްވައި އިޔާޒް ވިދާޅުވީ، މި ވަގުތު ދިވެހީންނަށް ބޭނުންވާ އެތައް ޒަރޫރީ ކަންތައްތަކެއް ނުފުދި އެބަހުރި ކަމަށާއި އެހެންކަމުން ދައުލަތުގެ މާލިއްޔާއިން ނިކަމެތިން ޙައްޖަށް ފޮނުވުމަކީ ރަނގަޅު ކަމެއް ނޫން ކަމަށެވެ. އަދި، އެއީ ދީނީ ކަމަކަށްވުރެ ބޮޑަށް ސިޔާސީ ކަމެއްގެ ގޮތުގައި އޭނާ ވަނީ ސިފަކުރައްވައިފައެވެ.
އިޔާޒް ވިދާޅުވީ، ރައްޔިތުންގެ މަޖިލީހުގެ މާލިއްޔަތު ކޮމިޓީގައި މަޖިލީހުގެ ނައިބު ރައީސް އަހުމަދު ނާޒިމް ދެއްކެވި ވާހަކައިން ވެސް ގައުމު އޮތީ މާލީ ގޮތުން ވަރަށް ދަތި ހާލަތެއްގައިކަން އެނގޭ ކަމަށެވެ. އަދި، ބޭސްފަރުވާއާއި އެ ނޫން ވެސް އެކިއެކި ޒަރޫރީ ކަންކަމުގައި ދިވެހީން ވަރަށް ބޮޑަށް ހާލުގައި އުޅޭއިރު ޙައްޖަށް ނިކަމެތިން ފޮނުވަން ޚަރަދުކުރުމަކީ ގޯހެއް ކަމަށް އޭނާ ގަބޫލުކުރައްވައެވެ.
"ޒަރޫރީ ކަންތައް ހުރިއިރުގައި ޙައްޖުކުރުން ކަހަލަ ކަންތައްތައް މިއީ ސިޔާސީ ކަމެއް ކަމުގައި ހަދައިގެން ކުރުން އެއީ އެއްގޮތަކަށް ވެސް ދީނީ ގޮތުން ރަނގަޅުކަމެއް ކަމުގައެއް ނުބުނެވޭނެ. މިއީ ވަރަށް ބޮޑު ގޯހެއް،" އޭނާ ވިދާޅުވިއެވެ.
"ސަރުކާރުގެ ވައުދެއްގެ ގޮތުގައި ހަދައިގެން ނިކަމެތިން ޙައްޖަށް ފޮނުވުން އެ ގޮތަށް ކަންތައްކުރާނަމަ އެއީ ސިޔާސީ ކަމެއް އެ ކުރެވެނީ، އެއީ އެއްވެސް ގޮތަކަށް ދީނީ ކަމަކަށް ވާނެ ކަމަކަށް އަޅުގަނޑަށް ގަބޫލެއް ނުކުރެވޭ،"
މި ސަރުކާރުގެ ފަސް އަހަރު ތެރޭގައި 1،000 ނިކަމެތިން ސަރުކާރުގެ ޚަރަދުގައި ޙައްޖަށް ފޮނުވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. އެ ވައުދާ އެއްގޮތަށް މި އަހަރު 50 މީހުން ޙައްޖަށް ފޮނުވަން ސަރުކާރުން ވަނީ ނިންމައިފައެވެ. އެ އެންމެން މިހާރު ޙައްޖަށް ފުރައިފިއެވެ.