ފޮރިން މިނިސްޓަރު މޫސާ ޒަމީރު ސްރީލަންކާއަށް ކުރެއްވި ރަސްމީ ދަތުރުފުޅު ނިންމަވާލައްވައިފިއެވެ.
މިނިސްޓަރުގެ މިދަތުރުފުޅަކީ ލަންކާގެ ފޮރިން މިނިސްޓަރު އަލީ ސަބްރީގެ ދައުވަތަކަށް ރާއްޖެއާއި ސްރީލަންކާއާ ދެމެދު އޮތް ގުޅުން އިތުރަށް ބަދަހިކުރުމަށް ކުރެއްވި ދަތުރުފުޅެކެވެ.
މި ދަތުރުފުޅުގައި، ސްރީލަންކާ ގެ ރައީސް ރަނިލް ވިކްރަމަސިންގްއާއި ބޮޑުވަޒީރު ޑިނޭޝް ގުނަވަރުދަނާއާއި ބައްދަލު ކުރެއްވިއެވެ.
އަދި، ޚާރިޖީ ވަޒީރު އަލީ ސަބްރީއާ ބައްދަލު ކުރައްވައި ދެ ގައުމުގެ ގުޅުން އިތުރަށް ހަރުދަނާ ކުރުމަށް ކުރެވިދާނެ ކަންކަމާ ބެހޭގޮތުން މަޝްވަރާ ކުރެއްވިއެވެ.
އަދި، ސްރީލަންކާއަށް ދަތުރުކުރާ ފަރާތްތަކާއި އެ ގައުމުގައި ދިރިއުޅޭ ދިވެހިންނަށް ލުއިފަސޭހަ ގޮތްތައް ހަމަޖެއްސުމާ ބެހޭގޮތުން މަޝްވަރާކުރެއްވިއެވެ.
މީގެ އިތުރުން، މި ދަތުރުފުޅުގައި ޒަމީރު ވަނީ ލަންކާގައި ދިރިއުޅުއްވާ ދިވެހީންނާއި ބައްދަލުކުރައްވައި، ސްރީލަންކާގައި ހުންނަ ރާއްޖޭގެ ހައި ކޮމިޝަނަށް ޒިޔާރަތްކުރައްވައި މިޝަންގެ މުވައްޒަފުނާވެސް ބައްދަލު ކުރެއްވިއެވެ.
މި ދަތުރުފުޅުގައި މިނިސްޓަރުގެ އަރިހުގައި ސްޓޭޓް މިނިސްޓަރު ޝެރީނާ އަބްދުއްސަމަދު، އެޑިޝަނަލް ސެކްރެޓަރީ ޝިރުޒިމަތު ސަމީރު އަދި ޑިރެކްޓާ ޖެނެރަލް އައިޝަތު ފަރީނާ ބައިވެރިވެވަޑައިގަތެވެ.
ފާހަގަކޮށްލެވޭ ގޮތުގައި މި މަހުގެ ކުރީކޮޅު ޒަމީރު ވަނީ އިންޑިއާއަށް ވެސް ރަސްމީ ދަތުރެއް ކުރައްވާފައެވެ.