އިޒްރޭލު ޕާސްޕޯޓް މަނާކުރަން ރާއްޖެއިން ނިންމި ނިންމުން ބަދަލުނުކުރާނަމަ، އެމެރިކާގެ އެހީ ރާއްޖެއަށް ނުލިބޭ ގޮތް ހަދަން އެ ގައުމުގެ ގާނޫނު ހަދާ މަޖިލީހަށް ބިލެއް ހުށަހަޅަން ތައްޔާރުވެއްޖެއެވެ.
އެމެރިކާގެ އެކްސިއޯސް ނޫހުގައިވާ ގޮތުން އެ ބިލު އެކުލަވާލުމުގައި އިސްކޮށް އުޅުއްވަނީ ކޮންގްރެސްގެ ތިރީގޭގެ މެންބަރު ޖޯޝް ގޮޓްހައިމާ އެވެ.
ވެރިކަން ކުރާ ޑިމޮކްރެޓިކް ޕާޓީގެ މެންބަރެއް ކަމަށްވާ ގޮޓްހައިމާ 'ޕްރޮޓެކްޓިން އެލައިޑް ޓްރެވެލް ހިޔާ'ގެ ނަމުގައި ބިލު އެކުލަވާލައްވަނީ ރިޕަބްލިކަން ޕާޓީގެ މެންބަރުންތަކަކާ ވެސް ގުޅިގެން ކަމަށް އެ ނޫހުގައިވެއެވެ.
ކޮންގްރެސްގައި އިޒްރޭލުގެ ދިފާއުގައި އެންމެ ބޮޑަށް މަސައްކަތް ކުރައްވާ އެއް މެންބަރު ކަމަށްވާ ގޮޓްހައިމާ ވިދާޅުވީ އިޒްރޭލުގެ ހުރިހާ ރައްޔިތުން މަނާކޮށްފައިވާ ގައުމަކަށް އެމެރިކާގެ ޓެކްސް ޑޮލަރު ފޮނުވައިގެން ނުވާނެ ކަމަށެވެ.
އިޒްރޭލު ޕާސްޕޯޓް މަނާކުރުމަކީ ޔަހޫދީންނަށް ނަފުރަތުކުރުން ކަމަށާއި، ރާއްޖޭގެ ނިންމުން ބަދަލުނުކުރަނީސް އެމެރިކާއިން ފައިސާ ދީގެން ނުވާނެ ކަމަށް އޭނާ ވިދާޅުވިއެވެ.
އެމެރިކާގެ އޭޖެންސީ ފޯ އިންޓަނޭޝަނަލް ޑެވެލޮޕްމެންޓް އެންޑް ދަ ސްޓޭޓް ޑިޕާޓްމެންޓްއިން އާންމުކޮށްފައިވާ މައުލޫމާތުގައިވާ ގޮތުން، 2019 އާއި މިދިޔަ އަހަރާ ދޭތެރޭ އެގައުމުން ރާއްޖެއަށް 36 މިލިއަން ޑޮލަރުގެ މާލީ އެހީތެރިކަން ފޯރުކޮށްދިފައިވެއެވެ.
އިޒްރޭލުން ފަލަސްތީނަށް ދެމުންދާ ހަމަލާތަކާ ގުޅިގެން އިޒްރޭލުގެ މީހުންނަށް ރާއްޖެ ނާދެވޭގޮތަށް އެ ގައުމުގެ ޕާސްޕޯޓު މަނާކުރަން ގާނޫނުތަކަށް ބަދަލުގެންނަން މިދިޔަ އާދިއްތަ ދުވަހު އޮތް ވަޒީރުންގެ މަޖިލީހުގެ ބައްދަލުވުމުގައި ވަނީ ނިންމައިފިއެވެ.
ގާނޫނަށް އިސްލާހު ގެންނަން ވަޒީރުންގެ މަޖިލީހުން ނިންމިއިރު، އިޒްރޭލު މީހުންނަށް ރާއްޖެ އެތެރެނުވެވޭ ގޮތަށް އިމިގްރޭޝަން ގާނޫނަށް އިސްލާހު ގެންނަން ވިހިވަނަ ރައްޔިތުންގެ މަޖިލީހަށް ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް ވަނީ އިސްލާހެއް ހުށަހަޅުއްވައިފައެވެ.
މިދިޔަ އަހަރުގެ އޮކްޓޫބަރު މަހުގެ ހަތްވަނަ ދުވަހުން ފެށިގެން އިޒްރޭލުން ފަލަސްތީނުގެ އާންމުންނަށް އަމާޒުކޮށްގެން ދެމުންގެންދާ ލާއިންސާނީ ހަމަލާތަކުގައި މިހާތަނަށް 36،000 އަށްވުރެ ގިނަ މީހުން ވަނީ ޝަހީދުކޮށްލައިފައެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.